Sinseridat un Kualidat Deseabel, Pero Esei So Ta Basta?

SINSERIDAT ta realmente deseabel den nos bida di tur dia? Un hende sinsero ta un hende ku no ta fingi; mas bien, e ta onesto i franko. No tin duda ku e kualidat aki ta yuda fortalesé bon relashon ku otro hende. Apòstel Pablo a duna e spièrtamentu: “Obedesé esnan ku ta boso shonnan riba tera, no pa bista, manera esnan ku solamente ta agradá hende, ma ku sinseridat di kurason, i ku temor pa Señor.” (Kolosensenan 3:22) Ken lo no keda kontentu di por tin un persona sinsero asina ta traha p’e? Awe, hende sinsero tin mas chèns di haña un trabou i manten’é.

Pero loke ta hasi sinseridat asta mas deseabel ta e bon efekto ku esei tin riba nos relashon ku Dios. E israelitanan di antigwedat a risibí Dios su bendishon ora nan a warda e leinan i fiestanan kuidadosamente. Ora Pablo a papia tokante limpiesa den kongregashon, el a stimulá e kristiannan: “Laga nos selebrá e fiesta, no ku zürdeg bieu, ni ku e zürdeg di malisia i maldat, ma ku e pan sin zürdeg di sinseridat i bèrdat.” (1 Korintionan 5:8) Pa Dios aseptá nos adorashon, sinseridat no ta djis un kualidat deseabel sino tambe esensial. Sin embargo, tuma nota ku sinseridat so no ta basta. E mester ta basá tambe riba loke ta bèrdat.

Kisas e personanan ku a konstruí Titanic i e pasaheronan riba dje a kere sinseramente ku e barku grandi aki no por a senk. Sin embargo, riba su biahe inougural na 1912, el a dal den un ijsberg i 1.517 hende a pèrdè nan bida. Algun hudiu di promé siglo kisas a kere sinseramente den nan manera di adorá Dios, pero nan selo no tabata “segun konosementu.” (Romanonan 10:2) Pa nos ta bon mirá den bista di Dios, nos kreensianan sinsero mester ta basá riba informashon eksakto. Testigunan di Yehova den bo komunidat gustosamente lo yuda bo analisá kiko kier men sirbi Dios ku sinseridat i bèrdat.