Ki Klase di Nòmber Bo Ta Trahando?

BO A yega di lesa un notisia di morto kompañá pa un biografia kòrtiku den un korant lokal? Òf bo a yega di mira un relato ekstenso di e bida i logronan di un persona ku a fayesé? Bo a puntra bo mes: ‘Kiko hende lo bisa di mi?’ Kuantu hende ta pensa mes riba kon nan lo wòrdu rekordá despues di nan morto? Pues, puntra bo mes frankamente: Kiko hende lo bisa di bo awe si bo a muri ayera? Ki klase di reputashon bo ta trahando? Kon lo bo kier pa Dios i esnan ku a konosé bo rekordá bo?

E eskritor sabí di e buki bíbliko di Eklesiastés a bisa: “Un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.” (Eklesiastés 7:1) Pakiko e dia di bo morto ta mihó ku e dia ku bo a nase? Esei ta pasobra bo no ta nase ku un sierto reputashon. Bo no tin un registro di bida ainda. Ta e manera ku bo ta hiba bo bida lo resultá den sea un bon òf un mal reputashon. Pa esnan ku den transkurso di añanan a traha un bon nòmber, e dia di nan morto den e sentido ei en bèrdat ta mihó ku e dia di nasementu.

Nos tin un eskoho anto. Por sierto, tur dia nos tin ku hasi hopi eskoho ku lo determiná e reputashon ku nos lo keda kuné dia nos muri, spesialmente kon Dios lo rekordá nos. P’esei mes, e mesun hebreo sabí a skirbi: “Rekuerdo di e hustu ta bendishoná, ma nòmber di e malbado lo putri.” (Proverbionan 10:7) Ku otro palabra, Dios ta rekordá bo p’e bendishoná bo. Esei sí ta un onor!

Si nos ta sabí, nos lo pone meta pa agradá Dios dor di biba na armonia ku su normanan. Esei ta nifiká sigui e prinsipionan básiko ku Kristu a ekspresá: “‘Stima SEÑOR bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé. I e di dos ta semehante: ‘Stima bo próhimo manera bo mes.’ Riba e dos mandamentunan aki henter e Lei i e Profetanan ta basá.”—Mateo 22:37-40.

Algun hende ta wòrdu rekordá pa nan obranan di karidat i riba tereno sosial, komo defensor di derecho sivil, òf pa nan logronan den komersio, siensia, medisina òf otro aktividatnan. Pero kon abo lo kier wòrdu rekordá?

E poëta eskoses Robert Burns (1759-96) a bisa ku e tabatin gana pa un poder duna nos e don di mira nos mes manera otro hende ta mira nos. Abo por mira bo mes na un manera ophetivo i bisa ku bo tin un bon reputashon den bista di Dios i di otro hende? Riba término largu nos relashonnan ku otro hende sigur ta mas importante ku kualkier kos ku nos lo por logra riba término kòrtiku den e mundu di deporte òf negoshi. P’esei e pregunta ta: Ki efekto nos trato ku otro hende—nos kòmbersashon, nos manera, nos body language—tin riba nan? Nan ta mira nos komo hende aserkabel òf komo hende seku? Komo amabel òf brutu? Komo fleksibel òf muchu estrikto? Komo kariñoso i suave òf antipátiko i indiferente? Komo un persona ku ta kritiká pa desanimá otro òf komo un konsehero edifikante? Laga nos analisá algun ehèmpel for di pasado i di tempu moderno pa mira kiko nos por siña.

[Plachi na página 3]

Robert Burns tabatin gana pa un poder duna nos e don di mira nos mes manera otro hende ta mira nos

[Rekonosementu]

For di e buki A History of England