Dios Su Punto di Bista di e Mortonan

MORTO di un ser kerí ta un kos masha duru mes. E bashí, e soledat i e sintimentu di pèrdida ta inmenso. Pèrdida di un ser kerí por pone un hende sintié impotente, pasobra sin importá kon riku òf poderoso e por ta, òf kuantu influensia e por tin, ningun hende riba tera aktualmente por lanta un persona for di morto.

Sin embargo, nos Kreadó ta mira asuntunan di un manera diferente. Ya ku el a forma e promé ser humano di stòf, no ta difísil p’e hasi esaki den kaso di un hende morto. P’e motibu aki, Dios por mira e mortonan komo si fuera nan ta na bida. Tokante sirbidónan fiel di pasado ku a muri, Hesus a bisa: “Pasobra pa e tur ta biba.” Ku otro palabra, desde Dios su punto di bista nan tur ta bibu.—Lukas 20:38.

Ora Hesus tabata riba tera, el a haña poder pa resusitá e mortonan. (Juan 5:21) Pues, e tin e punto di bista di su Tata relashoná ku esnan ku a muri fiel. Por ehèmpel, ora su amigu Lázaro a muri, Hesus a bisa su disipelnan: “Ami ta bai pa mi lant’é for di soño.” (Juan 11:11) Desde e punto di bista di hende, Lázaro tabata morto, pero pa Yehova i Hesus, Lázaro tabata drumí.

Bou di e Reino di Hesus, lo tin “un resurekshon di tantu e hustunan komo e malbadonan.” (Echonan 24:15) Ku tempu, esnan ku a resusitá lo haña edukashon for di Dios i lo tin e speransa di biba pa semper riba tera.—Juan 5:28, 29.

Sí, morto di un ser kerí por kousa hopi doló i pena, i esaki ta algu ku por dura pa hopi tempu. Pero ora nos ta mira morto di hende for di e punto di bista di Dios, esei por duna nos hopi konsuelo i yena nos ku speransa.—2 Korintionan 1:3, 4.