Informe di Proklamadónan di Reino

“Esaki Sí Ta Nobo pa Mi!”

DOROTA, un predikadó di tempu kompletu di Testigunan di Yehova na Polonia, a kompañá su yu hòmber di 14 aña na un chekeo rutinario n’e klínika di skol. Durante e eksaminashon, e dòkter, Janina,a a puntra Dorota kon ta bai ku e yu su tareanan di kas.

“Ora mi no por, mi yu ta prepará sena pa nos tur seis den kas,” Dorota a kontestá. “Tambe e ta limpia kas i yuda drecha kos na kurpa di kas. E ta gusta lesa i e ta un bon studiante.”

“Esaki ta inkreibel,” Janina a kontestá. “Mi tin 12 aña ta traha akí, i nunka mi a yega di tende un kos asin’aki.”

Mirando ku esaki tabata un oportunidat pa duna testimonio, Dorota a splik’é: “Awe hopi mayor no ta dunando nan yunan e edukashon adekuá. P’esei hopi bes nan yunan tin masha poko balor propio.”

“Kon bo por sa tur e kosnan aki?” Janina a puntra. “Mayoria mayor no tin niun idea di e kosnan aki.”

“Beibel ta un fuente presioso di e tipo di informashon ei,” Dorota a kontest’é. “Por ehèmpel, di akuerdo ku Deuteronomio 6:6-9, edukashon di nos yunan ta kuminsá ku edukashon di nos mes. E balornan ku nos kier inkulká den nos yunan no mester ta den nos mes mente i kurason promé?”

“Esaki ta inkreibel,” Janina a remarká. “Esaki ta inkreibel!” Anto el a puntra Dorota kon Beibel a yud’é lanta su yunan i eduká nan.

“Nos ta studia Beibel tur siman ku nos yunan,” Dorota a splik’é. “Nos ta usa un buki ku yama Loke hovenan sa puntra—Contesta práctica.”b Anto Dorota a sigui kont’é di e buki i a menshoná algun di e temanan ku e ta trata.

“Esaki sí ta nobo pa mi!” Janina a sklama. “Mi por a wak e buki ei?”

Un ora despues, Dorota a regresá ku e buki.

“Ki religion boso ta?” Janina a puntra, segun ku e tabata tira un bista den e buki.

“Ami ta un Testigu di Yehova.”

“Kon Testigunan di Yehova ta trata hende di otro religion?”

“Meskos ku ami ta trata dòkter—ku rèspèt,” Dorota a kontest’é, anto el a agregá: “Di mes, nos tin gana pa nan haña sa e bèrdat di Beibel.”

“Ya kaba mi ta sinti mi muchu mas mihó,” Janina a konfesá.

Na fin di su bishita, Dorota a animá Janina mashá pa lesa Beibel. “Bo bida lo haña nifikashon i esei lo yuda bo den bo trabou.”

“Bo a ègt duna mi smak pa hasi esei,” Janina a atmití.

Ku takto i determinashon, Dorota a probechá bon di un bishita di rutina na ofisina di dòkter pa duna un tremendo testimonio.—1 Pedro 3:15.

[Nota]