Un Karta pa Noe

“APRESIABLE Noe, diferente biaha mi a lesa tokante bo den Beibel i kon bo a konstruí un arka den kua abo i bo famia a sobrebibí e Diluvio.”

Asina un karta skirbí dor di un hobensita di 15 aña ku yama Minnamaria a kuminsá. El a entregá e karta pa partisipá den un kompetensia di skirbimentu entre studiantenan di 14 pa 21 aña. E kompetensia a ser organisá dor di servisio postal finlandes, e Federashon di Maestronan Finlandes di Idioma Materno, i e Sosiedat di Literatura Finlandes. E partisipantenan mester a skirbi un karta basá riba un buki. Nan por a dirigí nan karta n’e eskritor di e buki òf na un personahe den dje. Di tur e kartanan ku a ser entregá, e maestronan a skohe mas ku 1.400 di nan i a manda nan p’e hurado dje kompetensia. Anto e hurado a skohe esun mihó, despues dies pa e di dos lugá i dies mas pa e di tres lugá. Minnamaria tabata sumamente kontentu ku su karta tabata den e di tres grupo.

Pakiko Minnamaria, un studiante teenager, a skirbi su karta pa Noe, un hòmber ku a biba rònt di 5.000 aña pasá? E ta bisa: “E promé kos ku a dal na mi mente tabata Beibel. Mi konosé personahenan di Beibel hopi bon. Mi a lesa asina tantu tokante nan ku, pa ami, ta komo si fuera nan ta na bida. Mi a skohe Noe pasobra su bida tabata hopi fasinante i distinto di mi.”

E karta ku Minnamaria a skirbi pa Noe ta terminá ku e siguiente palabranan: “Ainda bo ta un ehèmpel di fe i obedensia. Bo bida ta animá tur persona ku ta lesa Beibel pa biba nan fe.”

E karta aki di un hóben lesadó di Beibel ta un bon ehèmpel di ku en bèrdat Beibel “ta bibu i aktivo” den bida di tantu hende hóben komo hende grandi.—Hebreonan 4:12.