Di Edat Pero sin Soledat

DEBÍ na e efektonan di edat avansá, hopi hende ta bira desabilitá, isolá for di otro hende den komunidat. Esei no tabata e kaso ku Fernand Rivarol, kende a muri na edat di 95 aña na Ginebra, Suisa. E tabata biba su so, pasobra su esposa a muri i su yu muhé kasá tabatin su mes kas. Ounke generalmente Fernand no por a sali for di kas, e no tabata sinti soledat. Hopi biaha e tabata sinta na un mesa den sala, ku e bosina di telefòn den su man, i tabata bèl hende pa kòmbersá ku nan tokante asuntunan spiritual.

Durante Fernand su bida interesante, tabatin un tempu sí ku e tabata na kadena, na moda di papia. Dikon? Pasobra nèt na aña 1939, tempu ku Fernand ku su kasá a bira Testigunan di Yehova aktivo, Segundo Guera Mundial a kuminsá na Europa. Fernand a pega na su desishon basá riba Beibel pa no kousa ningun hende daño. Debí na esaki el a pèrdè su trabou i mester a sinta vários kastigu di prizon, pa un total di sinku aña i mei. Durante e tempu ei e no por tabata huntu ku su kasá i su yu muhé chikitu.

Mirando bèk na e tempu ei, Fernand a bisa: “Pa hopi hende a parse ku mi a bandoná un trabou stabil i a laga mi famia na kaya. Hende tabata despresiá mi i trata mi manera un kriminal. Tòg ora mi pensa riba e añanan difísil ei, mi ta kòrda mas ku tur kos kon Yehova a sostené nos i yuda nos. Entretantu, hopi aña a pasa, pero mi konfiansa den Yehova te ainda ta mesun firme ku e tabata e tempu ei.”

Ta e fe aki di Fernand a motiv’é pa kompartí su speransa bíbliko ku otro hende via telefòn. Ora e tabatin un bon kòmbersashon ku un persona, e tabata manda literatura bíbliko p’e via pòst. Despues, e tabata bèl e persona atrobe pa wak si el a disfrutá di e publikashon. Tabatin biaha ku hende a kontest’é ku un karta di apresio, i esei tabata hasié hopi kontentu.

Por sosodé ku un persona manera Fernand ta tuma kontakto ku bo den bo área. Pakiko no skucha loke e tin di bisa pa asina bo por haña sa kiko e ta kere? Testigunan di Yehova semper ta dispuesto pa kompartí nan kreensianan ku bo.