“Pakiko Nos Ta Aki?”

E GANADÓ di Premio Nobel i sobrebibiente di e Holokousto nazi, Elie Wiesel, a yega di yam’é “e pregunta di mas importante ku un ser humano ta konfrontá.” Kua esei ta? E pregunta: “Pakiko nos ta aki?”

Abo a yega di pensa riba e pregunta ei? Hopi hende a hasié, pero sin haña kontesta. E historiadó britániko Arnold Toynbee, den un intento pa identifiká e propósito di bida, a skirbi: “E berdadero meta di hende ta pa glorifiká Dios i alegrá den Dje pa semper.”

Ta interesante pa nota ku mas ku tres mil aña pasá un otro hòmber, konosí komo un bon opservadó di bida, ya kaba a señalá e kontesta fundamental. Rei sabí Salomon a bisa: “E konklushon di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na [òf, “ta e deber di,” NW] kada persona.”—Eklesiastés 12:13.

Dios su Yu, Hesukristu, a apoyá e prinsipio básiko aki. Tempu ku e tabata riba tera, el a hasi tur su esfuerso pa glorifiká su Tata selestial. Mediante su sirbishi na su Kreadó, Hesus a enrikesé su bida. Esei a satisfas’é i sosten’é di tal manera ku e por a bisa: “Mi kuminda ta pa hasi e boluntat di esun ku a manda mi.”—Juan 4:34.

Pues anto, pakiko nos ta aki? Meskos ku Hesus, Salomon i hopi otro sirbidó di Dios, nos por haña berdadero propósito den bida i felisidat duradero ora nos ta hasi e boluntat di Dios. Lo bo ke sa mas tokante kon pa adorá Dios ku “spiritu i bèrdat”? (Juan 4:24) Gustosamente Testigunan di Yehova den bo komunidat lo yuda bo haña kontesta riba e pregunta: “Pakiko nos ta aki?”