E Búskeda pa Kontesta

“Despues ku nos a haña kontesta pa e pregunta ‘kon’ pa gana nos pan di kada dia, i a rondoná nos mes ku artíkulonan di luho ku un tempu tabata inimaginabel—manera e komodidat di èrkondeshen, zonidu ekselente di CD, outo luho—nos ta haña nos ta puntra nos mes ‘pakiko’ nos ta na bida. Pakiko hiba e lucha aki? Kiko ta e propósito?” —David G. Myers, profèser di sikologia na Hope College, Holland, Michigan, Merka.

KON lo bo kontestá e preguntanan di e profèser aki? Tin hende asta ta puntra si ta bale la pena dediká tempu pa buska e kontestanan. Sin embargo, purba ignorá e preguntanan ei ta meskos ku purba ignorá un piedra chikitu den bo sapatu. Bo por sigui kana, pero lo bo no sinti bo kómodo.

Bo a yega di puntra bo mes si bida tin propósito? Si ta asina, bo no ta e úniko. Segun Enkuesta Mundial di Norma i Balor, un di e estudionan di mas grandi riba tereno di norma i balor humano ku hende a yega di hasi, mas i mas hende den hopi pais ta pensa riba e “propósito di bida.”

Si bo ke haña berdadero pas mental, bo tin ku haña kontesta pa tres pregunta importante.

Di unda nos a bin?

Kiko ta e propósito di bida?

Kiko lo tin den futuro?

Unda bo por haña kontesta konfiabel pa e preguntanan importante aki? E siguiente artíkulonan lo duna kontesta ku no ta basá riba spekulashon ni filosofia sino riba e Palabra di Dios, Beibel. Nos kier invitá bo pa habri bo Beibel i wak kiko e ta bisa.