Dios Ta Faboresé un Rasa Riba Otro?

▪ Nò, pasobra Beibel ta bisa klaramente: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”​—Echonan 10:34, 35.

Dios su punto di bista riba e asuntu akí ta muchu mas elevá ku esun di hende imperfekto. Hopi hende ta kere ku sierto rasa—por lo general, esun di nan—ta superior na otro. E prehuisio akí ta reflehá Charles Darwin su ideanan, kende a skirbi: “Lo yega e dia . . . riba kua e rasanan di hende sivilisá kasi sigur lo eliminá i remplasá e rasanan salbahe.” Lamentablemente, hopi hende en bèrdat a sufri maltrato na man di esnan ku ta konsiderá ku nan rasa ta superior.

Pero tin motibu pa kere ku un rasa ta superior na otro? Akaso sensia a proba ku algun rasa ta genétikamente superior? Al kontrario, Bryan Sykes eksperto den genétika i profesor di Oxford a deklará: “No ta eksistí ningun base genétiko pa klasifiká rasa. . . . Semper nan ta puntra mi si tin un DNA griego òf un gene italiano, pero ta bisto ku no tin. . . . Nos tur ta hopi ligá na otro.”

E afirmashon akí ta na armonia ku loke e Skritura ta siña nos, esta, ku Dios a krea ún hòmber i ún muhé, for di kua nos tur ta bini. (Génesis 3:20; Echonan 17:26) Pues, den Dios su bista tin un solo rasa—e rasa humano.

Pa Yehova, no ta hende su koló di kueru òf aparensia ta konta. Mas bien, loke ta konta p’e ta algu muchu mas importante—nos kurason òf e persona ku nos ta di paden. E ta deklará: “Hende ta husga otro a base di nan aparensia, pero ami ta husga hende pa loke tin den nan kurason.” (1 Samuel 16:7, Contemporary English Version) Ta bon pa nos tene e punto akí na mente; e por ta di gran animashon pa nos. Dikon?

Kisas hopi di nos, sea kual sea nos rasa, no ta muchu kontentu ku sierto aspekto di nos aparensia; ma nos no por hasi mashá na esei. Pero sí nos por mehorá loke ta mas importante—e pensamentu- i sintimentunan di nos kurason. (Kolosensenan 3:​9-11) Si nos ta franko ku nos mes, nos lo ripará ku nos tin e tendensia di sinti nos mes sea mas òf kisas ménos ku hende di otro rasa. Siendo ku ningun di e dos puntonan di bista akí no ta kuadra ku Yehova su manera di pensa, nos tin ku hasi esfuerso pa saka e sintimentunan akí for di nos kurason.​—Salmo 139:​23, 24.

Segun ku nos ta hasi esfuerso pa mira tantu nos mes komo otro hende meskos ku Yehova ta hasi, nos por konta ku su yudansa. Su Palabra ta bisa nos: “Wowo di SEÑOR ta move bai bini dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) Esaki ta konta pa nos tur sin importá di kua rasa nos ta.