PREGUNTA KU BEIBEL TA KONTESTÁ
Hende por biba pa semper?
Kiko Dios a hasi pa libra nos di morto?
E promé hende, Adam, a biba vários siglo. Sinembargo, ku tempu el a bira bieu i muri. Desde e tempu ei, hende a purba tur sorto di kos pa evitá ku nan ta bira bieu i muri. Ma te ainda niun no a logra. Dikon? Adam su desobedensia a pone ku el a peka kontra Dios i no por a biba pa semper mas. Komo ku nos a heredá piká for di Adam, nos tambe ta bira bieu i muri.—Lesa Génesis 5:5; Romanonan 5:12.
Pa nos por biba pa semper, un hende tin ku paga un reskate pa nos. (Yòb 33:24, 25, BPK) Reskate ta e preis ku ta ser pagá pa libra un hende; i den nos kaso, pa libra nos for di morto. (Éksodo 21:29, 30) Hesus a paga e reskate akí ora el a muri pa nos.—Lesa Huan 3:16.
Kon nos por biba pa semper?
No ta tur hende lo ser librá di malesa i morto. Hende ku desobedesé Dios, manera Adam a hasi, lo pèrdè nan bida. Ta solamente esnan ku haña pordon di nan pikánan lo biba pa semper.—Lesa Isaías 33:24; 35:3-6.
Pa nos haña pordon di nos pikánan, nos mester dal paso. Nos mester siña konosé Dios pa medio di un estudio di su Palabra. Beibel ta siña nos kon nos por disfrutá di un mihó bida i tambe kon nos por haña e aprobashon di Dios i bida eterno.—Lesa Huan 17:3; Echonan 3:19.