Pakiko Bo Mester Ta Interesá den Beibel?

Sin duda, Beibel ta e buki mas gustá na mundu. Dikon? Pa kuminsá, bo por identifiká bo mes ku e relatonan di bida real ku e ta kontené. Esakinan ta papia di hende ku di bèrdat a eksistí, di nan relashon ku otro hende i ku Dios. For di e relatonan akí bo por siña lèsnan práktiko. Pa motibu di Beibel su lenguahe kla i simpel, por a tradusié den sientos di idioma, i hende di kualke époka òf kualke parti di mundu por komprond’é. Ademas, su prinsipionan semper ta duna bon resultado.

Pero mas importante ainda, Beibel no ta djis un buki ku ta papia di Dios, sino ku e ta bini di Dios, manera e mes ta indiká. E ta menshoná Dios su nòmber, su personalidat i su propósito inkambiabel pa tera i pa humanidat. Beibel ta konta tambe di un lucha universal, un lucha largu entre bon i malu: un historia fasinante ku un final felis. Pues, ora bo lesa Beibel ku un mente habrí, bo ta pone e base pa bo fe i speransa.

Den Beibel nos ta haña informashon ku nos no ta haña niun otro kaminda. Por ehèmpel, e ta bisa nos e bèrdat tokante e siguiente tópikonan:

• Kon hende a kuminsá eksistí i dikon tin tantu sufrimentu

• Loke Dios a hasi pa salba humanidat

• Loke Hesus a hasi pa nos

• E futuro di tera i di humanidat

Dikon bo no ta djis tira un bista riba e siguiente páginanan i mira pa bo mes kiko Beibel ta papia di dje?