Loke Dios A Hasi pa Salba Humanidat

Dios a primintí fiel Abraham ku e “desendiente” primintí lo a bini for di su famia. Pa medio di e persona ei, hende di “tur e nashonnan” lo ser bendishoná. (Echonan 3:25) Ku tempu, Yakòb, nietu di Abraham, a muda bai Egipto, kaminda su famia a krese bira e nashon di Israel.

Ma despues di un tempu, un Fárao kruel a hasi e israelitanan katibu di e egipsionan. Anto Dios a disidí di saka e israelitanan for di Egipto i, pa hasi esei, el a laga profeta Moises parti Laman Kòrá na dos pa medio di un milager. Mas despues, Dios a duna Israel su leinan, inkluso e Dies Mandamentunan, ku a sirbi komo guia i protekshon pa nan. Den e leinan ei Dios a spesifiká kon nan mester a hasi sakrifisio pa haña pordon pa piká. Dios a inspirá Moises pa bisa Israel ku Dios lo a manda un otro profeta pa nan. E profeta ei lo a bira e “desendiente” primintí.

Mas ku 400 aña despues, Dios a primintí Rei David ku e “desendiente” primintí den Edén lo a bira rei di un reino ku lo dura pa semper. E “desendiente” ei lo a bira e Mesías, e Libertador ku Dios a nombra pa salba humanidat i hasi planeta Tera un paradeis.

Gradualmente, Dios a duna mas detaye di e Mesías pa medio di David i otro profeta. Nan a profetisá ku lo el a bira un rei humilde i bondadoso i ku su reinado lo pone fin na hamber, inhustisia i guera. Hende lo biba na pas ku otro i asta ku bestia. Malesa, sufrimentu i morto—ku nunka tabata parti di Dios su propósito—lo disparsé, i hende ku a muri lo bolbe na bida riba tera.

Dios a bisa pa medio di profeta Mikéas ku e Mesías lo a nase na Bètlehèm. Pa medio di profeta Daniel, el a bisa ku nan lo a mata e Mesías pero ku Dios lo a lant’é for di morto i hasié Rei den shelu. Daniel a skirbi tambe ku e Reino di e Mesías lo remplasá tur otro gobièrnu pa semper. Di bèrdat e Mesías a bini manera a ser profetisá?

​—Basá riba Génesis kapítulo 22-50, tambe Éksodo, Deuteronomio, 2 Samuel, Salmo, Isaías, Daniel, Mikéas i Zakarías 9:9.