E Doló Ku Morto Ta Kousa

Kasi niun hende no ta gusta papia tokante morto pasobra e ta hasi hopi doló. Pero, tardi òf trempan e ta afektá nos tur.

No tin nada ku por prepará nos pa e pèrdida di un mayor, un kasá òf un yu. E por sosodé diripiente òf despues di un temporada largu di sufrimentu. Den tur dos kaso, nos tur ta sufri ora nos pèrdè un ser kerí. I e sintimentu ku morto ta fin di tur kos ta algu duru pa trata kuné.

Antonio a pèrdè su tata den un aksidente di tráfiko. El a bisa: “Ta manera un hende a sera tur entrada di bo kas anto kita e yabinan for di bo. Nunka mas bo por drenta, ni sikiera pa tira un bista. Ta rekuerdo so a keda atras. Esei ta e tristu realidat. E ta asina inhustu ku bo no ke aseptá, pero no tin nada ku bo por hasi.”

Dorothy, un anglikano i maestra di ‘zondag school,’ tabatin 47 aña tempu el a pèrdè su esposo. Aunke nunka el a pensa ku morto ta fin di tur kos, tabatin algu ku e no a komprondé muchu bon. P’esei el a puntra su pastor: “Kiko ta pasa ora nos muri?” E pastor a kontest’é: “Ningun hende no por bisa. Ta di sinta warda.”

Ta bèrdat ku esei ta e úniko kos ku nos por hasi, esta, di sinta warda? Òf tin un manera pa nos haña sa si en realidat morto ta fin di tur kos?