PREGUNTA KU BEIBEL TA KONTESTÁ

Kiko nos por siña tokante Dios?

Dios ta un spiritu invisibel. El a krea e shelunan, tera i tur loke ta hala rosea. Pero, ningun persona no a krea Dios​—e no tabatin prinsipio. (Salmo 90:2) Dios ke pa hende busk’é i haña sa e bèrdat tokante dje.—Lesa Echonan 17:24-27.

Dios tin un nòmber i nos por haña sa algun di su kualidatnan ora nos opservá e kosnan ku el a traha. (Romanonan 1:20) Pero pa nos por siña konosé Dios mas mihó, nos mester studia su Palabra. Sí, Beibel ta laga nos sera konosí ku su bunita personalidat.—Lesa Salmo 103:7-10.

Kon Dios ta mira inhustisia?

Yehova ta odia inhustisia, i el a krea hende ku e kapasidat pa reflehá su kualidatnan. (Deuteronomio 25:16) Ta p’esei mayoria di nos ta odia inhustisia. Dios no ta responsabel pa e inhustisia ku nos ta mira rònt di nos. El a duna hende e libertat di tuma nan mes desishon. Pero lamentablemente, hopi hende ta hasi mal uso di nan libertat i ta kometé aktonan di inhustisia. Ta duel Yehova di mira hende hasi esaki.—Lesa Génesis 6:5, 6; Deuteronomio 32:4, 5.

Komo ku Yehova stima hustisia, lo e no tolerá inhustisia pa semper. (Salmo 37:28, 29) Beibel ta primintí ku un djis aki Dios lo kaba ku tur inhustisia.—Lesa 2 Pedro 3:7-9, 13.