BO TABATA SA?

Kon bida di un esklabo tabata den e Imperio Romano?

Den e Imperio Romano, hopi hende a bira esklabo sea pa motibu di konkista militar òf sekuestro. Nan tabata bende esnan kapturá i mayoria di nan nunka mas a mira nan famia.

Hopi esklabo mester a traha asina duru den mina te ku nan a muri. E esklabonan ku mester a traha den kunuku òf hasi trabou di kas tabatin un bida basta bon. E doñonan tin biaha tabata pone nan esklabonan bisti un banchi di heru ku un hanger na dje. Riba e hanger tabatin skirbí ku esun ku entregá e esklabo ku a hui lo haña un rekompensa. Kasi semper nan tabata marka lèter F di fugitivus (fugitivo) ku heru kayente riba frenta di un esklabo ku a purba di skapa vários biaha.

E buki bíbliko di Filemon ta menshoná ku apòstel Pablo a manda e esklabo Onésimo, kende a hui, bèk serka su doño, Filemon. Maske Filemon pa lei tabatin derecho di kastigá Onésimo, Pablo a pidi Filemon pa laga amor kristian i nan amistat personal konmov’é pa “risibí [Onésimo] amablemente.”—Filemon 10, 11, 15-18.

Dikon Fenisia di antigwedat tabata famoso pa su tinzja koló püs?

Fenisia, un region ku aktualmente ta Líbano, tabata bon konosí pa su tinzja koló püs di e stat Tiro. Rei Sálomon di Israel di antigwedat a dekorá su tèmpel ku “tela púrpura,” òf püs, ku un artesano di Tiro a produsí.—2 Krónikanan 2:13, 14.

E tinzja koló püs di Tiro tabata esun di mas kostoso den e tempu ei. Un di e motibunan ta ku hende mester a hasi hopi esfuerso pa produsié. Pa di promé, piskadónan mester a kue for di laman un gran kantidat di kokolishi di e género murex,a pasobra pa tinzja un solo bistí mester a usa un 12.000 kokolishi. Despues, nan tabata saka e slak for di den e kokolishi pa kita e klirnan ku ta produsí e tinzja. Hende ku tabata traha e tinzja tabata bruha e klirnan ei ku salu i laga nan para den solo na aire liber pa tres dia. Kaba, nan tabata pone e meskla ei den un barí yená ku awa di laman i tap’é, i nan tabata pon’é riba un kandela abou pa un par di dia mas.

Pa sientos di aña, e hendenan di Fenisia a produsí i bende e ­tinzja koló püs di Tiro. I nan a hasi meskos na e lugánan ku nan a konkistá. Rònt di e kosta di Laman Mediteráneo te na lugánan manera Cádiz, Spaña, hende a haña restunan di e produkshon di e tinzja ei.