Dikon Bo Mester Ta Interesá den e Reino di Dios?

Miónes di hende rònt mundu ta pone nan speransa den e Reino di Dios. Nan ta imitá e ehèmpel di Hesus, kende a siña su siguidónan pa pidi den orashon pa: “Laga bo reino bini; bo boluntat sea hasí na tera.”—Mateo 6:10, BPK.

Pa straño ku por parse, aunke hopi hende ta sumamente interesá den e Reino di Dios, mayoria di religion ta dun’é poko importansia. Relashoná ku esaki, e historiadó H.G. Wells a haña ta remarkabel kuantu importansia Hesus a duna e siñansa di loke el a yama e Reino di Shelu, miéntras ku pa mayoria di iglesia kristian e siñansa akí ta masha insignifikante.

Na kontraste ku e iglesianan ei, Testigunan di Yehova ta pone hopi énfasis riba e Reino di Dios. Por ehèmpel, nos revista prinsipal, ku bo ta lesando aworakí, ta ser publiká den 220 idioma. Kasi 46 mion kopia di kada edishon ta ser di prent, lokual ta hasi e revista akí esun di mas distribuí na mundu. I kiko ta e revista akí su mensahe prinsipal? Tuma nota di e título kompleto: E Toren di Vigilansia Anunsiando e Reino di Yehova Dios.a

Dikon Testigunan di Yehova ta hasi asina tantu esfuerso pa anunsiá e Reino di Dios? Pa kuminsá, nos ta kere ku e Reino di Dios ta e tema sentral di e buki di mas importante na mundu, esta, Beibel. Ademas, nos ta konvensí ku e Reino di Dios ta e úniko solushon pa e problemanan ku humanidat ta enfrentá awe.

Testigunan di Yehova ta hasi hopi esfuerso pa sigui Hesus su ehèmpel ora nan ta siña hende tokante e Reino di Dios. Tempu ku Hesus tabata riba tera, el a pone e Reino na promé lugá den su bida i sirbishi. (Lukas 4:43) Dikon e Reino tabata asina importante pa Hesus? I kiko e por nifiká pa abo? Nos ta invitá bo pa lesa e kontestanan ku Beibel ta duna riba e preguntanan akí den e siguiente artíkulonan.