TÓPIKO PRINSIPAL | DI BÈRDAT DIABEL TA EKSISTÍ?
Di Bèrdat Diabel Ta Eksistí?
Un estatua di Satanas, komo un di e angelnan malbado, saká for di shelu (Madrid, Spaña)
“Tempu mi tabata chikí, mi a kere den Dios, pero no den Diabel. Ora mi hasi kos di mala mucha, mi mama tabata bisa mi: ‘Diabel ta bin kue bo bai kuné!’ I mi tabata kontest’é: ‘Lag’é bin!’”—ROGELIO, EL SALVADOR.
Abo tambe ta pensa meskos ku Rogelio? Segun bo, kua di e siguiente opinionnan ta mas lógiko?
Diabel no ta eksistí; e ta djis un símbolo di maldat.
Diabel ta eksistí, pero e no tin kunes ku hende.
Diabel ta un ser spiritual poderoso ku ta trata di manipulá hende.
Kada un di e puntonan di bista akí tin hende ku ta di akuerdo kuné, kisas asta miónes di hende. Pero ta importá kua di e opinionnan akí ta korekto? Wèl, si Satanas e Diabel no ta eksistí, e ora ei e personanan ku ta kere den dje a ser engañá. Si Satanas ta eksistí pero no tin kunes ku hende, e ora ei hopi hende ta preokupá innesesariamente òf asta tin miedu di dje pòrnada. Pero, si Satanas ta eksistí i ta trata di manipulá nos, e ora ei e ta mas peligroso ku hopi hende ta imaginá.
Laga nos wak kon e Santu Skritura ta kontestá e preguntanan akí: Diabel ta eksistí di bèrdat, òf e ta djis un símbolo di maldat? Si e ta un persona real, e por hasi bo daño? I si ta asina, kon bo por protehá bo mes?