Ta Malu pa Ta Tristu?

Bo a yega di bira malu pa un tempu kòrtiku? Kisas bo a rekuperá asina lihé ku bo a lubidá mes ku bo tabata malu. Wèl, tristesa sí no ta asina. Dr. Alan Wolfelt a skirbi den su buki Healing a Spouse’s Grieving Heart: “No ta eksistí ‘superá e doló’ ora un ser kerí fayesé.” Pero el a agregá: “Ku tempu i ku yudansa di otro hende, bo doló lo fria un poko.”

Por ehèmpel, wak kon e patriarka Abraham a reakshoná ora su kasá a muri. E teksto original di Beibel ta bisa ku “Abraham a kuminsá tene rou pa Sara i yor’é.” E ekspreshon “a kuminsá” ta duna e idea ku a tuma tempu pa e trata ku e pèrdida di su esposa.a Un otro ehèmpel ta Yakòb, kende a kere ku ta un bestia salbahe a mata su yu hòmber Yosef, sin sa ku ta gaña nan a gañ’é. El a tene rou pa “hopi dia,” i su famia no por a konsol’é. Hopi aña despues, ainda e morto di Yosef tabata traha kuné.—Génesis 23:2; 37:34, 35; 42:36; 45:28.

Awe ta meskos. Hopi hende ta pena debí na morto di un ser kerí. Wak e siguiente ehèmpelnan.

• “Mi kasá, Robert, a fayesé dia 9 di yüli 2008. E dia ku e aksidente mortal a sosodé tabata un dia meskos ku kualke otro dia. Despues ku nos a desayuná, nos a hasi loke semper nos tabata hasi ora e tabata sali pa bai trabou; nos a duna otro un brasa i un sunchi i a bisa otro ‘mi stima bo.’ Seis aña despues, ainda mi kurason ta hasi doló. Mi no ta kere ku un dia lo mi superá e doló di a pèrdè Rob.”—Gail di 60 aña.

• “Maske mi kasá stimá a fayesé mas ku 18 aña pasá, ainda mi ta tristu i ta sinti su falta. Kada biaha ku mi mira algu bunita den naturalesa, mi ta kòrda riba dje, i mi no por keda sin pensa kuantu lo el a disfrutá di mira loke mi ta mira.”—Etienne di 84 aña.

Klaru ku ta natural ku nos ta sinti doló, i e sintimentunan ei no ta kita fásil. Kada persona ta pena na su mes manera, i lo no ta sabí pa husga kon hende ta reakshoná ora un tragedia sosodé. Pero na mes momento, nos mester evitá di sinti nos mes malu si e manera ku nos ta reakshoná ta parse di ta poko eksagerá. Pues anto, kon nos por dil ku tristesa?