Bo Tabata Sa?

Hende tabata usa e prinsipionan di e Lei di Moises pa resolvé desakuerdonan legal di tur dia den Israel di antigwedat?

TIN biaha sí. At’akí un ehèmpel. Deuteronomio 24:14 i 15 ta bisa: “No oprimí un sirbidó kontratá ku ta pober i den nesesidat, sea ku e ta un di bo paisanonan òf un di e estranheronan . . . pa e no sklama na SEÑOR kontra bo i esaki bira piká den bo.”

Den bisindario di Asdod a haña un pida klei di rònt di siglo 7 promé ku Kristu. E informashon riba e klei ta kontené un apelashon relashoná ku un kaso similar na loke Deuteronomio ta papia di dje. Kisas ta un kunukero, kende supuestamente no por a entregá e kantidat di grano ku a ser eksigí di dje, a pone su apelashon riba e pida klei akí. Su apelashon ta bisa: “Despues ku bo sirbidó, [esun ku a hasi e apelashon] a kaba di warda e kosecha algun dia pasá, Hoshayahu, yu di Shobay, a bin i a bai ku bo sirbidó su paña di bisti. . . . Tur mi kompañeronan ku tabata traha huntu ku mi den un higra di solo por sirbi komo testigu . . . ku loke mi a bisa ta bèrdat. Mi no a hasi nada malu. . . . Mi ta pidi bo mi gobernador, por fabor, yuda bo sirbidó haña su paña bèk; tene duele di mi! Bo no por keda ketu tanten ku bo sirbidó no tin su paña.”

Segun e historiadó Simon Schama: “E apelashon akí no ta papia solamente di un trahadó desesperá ku ke haña [su paña] bèk. E ta indiká tambe ku esun ku a hasi e apelashon tabata sa algu di e leinan bíbliko, foral esnan na Levítiko i Deuteronomio ku ta kondená maltrato di hende pober.”