Participá den e Trabou cu Nunca Mas Lo Ser Ripití
1 Na vários ocasion durante historia di humanidad, tabata necesario pa Jehova ehecutá huicio riba su enemigunan. Sin embargo, debí na su misericordia, el a percurá un oportunidad di salbacion pa esnan di curason recto. (Sal. 103:13) Nan reaccion na su misericordia a determiná nan destino.
2 Por ehempel, promé cu e Diluvio, na 2370 P.E.C., Noe tabata “un predicador di husticia.” Esnan cu a perecé tabata esnan cu a ignorá e spiertamentu divino. (2 Ped. 2:5; Heb. 11:7) Promé cu e destruccion di Jerusalem na 70 E.C., Jesus claramente a describí e accion cu lo tabata necesario pa cualkier persona scapa e destruccion cu lo a bini riba e stad. Tur cu a rechasá su mensahe di spiertamentu a sufri consecuencianan teribel. (Luc. 21:20-24) Tal spiertamentu i huicionan divino a ser ripití hopi biaha atrabes di historia.
3 Un Trabou di Spiertamentu den Tempu Actual: Hopi tempu pasá Jehova a declará cu su rabia lo baha riba e sistema malbado djawe i cu solamente e mansunan lo sobrebibí. (Sof. 2:2, 3; 3:8) E tempu pa predicá e mensahe di spiertamentu aki ta cabando lihé! E “tribulacion grandi” ta djis nos dilanti, i awor e mansunan ta ser recogé. Di berdad, e “cunucunan” ta “blancu pa cosechá.” P’esei, ningun otro trabou ta mes importante of urgente cu esun aki.—Mat. 24:14, 21, 22; Juan 4:35.
4 Nos mester participá den proclamá e spiertamentu di tempu actual na otronan, “sea cu nan lo tende of laga” di tende. Esaki ta un asignacion duná-di-Dios, cu nos no mester tribi ignorá. (Eze. 2:4, 5; 3:17, 18) E echo cu nos tin un pleno participacion den e trabou aki ta duna un muestra convincente di nos amor profundo pa Dios, nos interes intenso i genuino den nos próhimo i nos fe inkebrantabel den nos Salbador, Jesucristo.
5 Awor Ta e Tempu pa Actua: Den pasado, despues dje huicionan cu Jehova a ehecutá, maldad semper a bolbe lanta cabes debí cu Satanas i su demoñonan tabata activo ainda. Sin embargo, e biaha aki esei lo ta diferente. Influencia satánico lo ser eliminá. Nunca mas un spiertamentu mundial tocante un inminente “tribulacion grandi” lo ta necesario. (Rev. 7:14; Rom. 16:20) Nos tin e privilegio special di ta parti di un trabou cu nunca mas lo ser ripití. Awor ta e tempu pa nos haci máximo uso dje oportunidad aki.
6 Apostel Pablo, cu gran conviccion, a declará tocante su actividad di predicá: “Mi ta limpi dje sanger di tur hende.” (Echo. 20:26) E no a sinti su mes culpabel di sanger debí na cualkier negligencia den proclamá e spiertamentu. Pakico no? Pasobra e por a bisa di su ministerio: “P’esei mes en berdad mi ta trahando duru, forsando mi mes.” (Col. 1:29) Laga nos disfrutá dje mésun satisfaccion di participá te n’e grado mas pleno posibel den e trabou cu nunca mas lo ser ripití!—2 Tim. 2:15.