Caha Di Pregunta

◼ Ki cautela nos mester mustra ora nos ta den compania di un persona dje sexo opuesto den e ministerio?

Nos tin motibu di spera cu nos rumannan tin intencion di pega na e norma moral di mas haltu den nan conducta personal. No obstante, nos ta biba den un mundu impuru i permisivo cu tin poco limitacion moral. Maske nos por tin tur bon intencion, nos mester ta constantemente alerto pa evitá di causa reproche of pa haña nos enbolbí den algu indecente. Esaki ta incluí tene cuidou ora nos ta participando den e ministerio.

Hopi bes den sirbishi di veld nos ta topa hende dje sexo opuesto cu ta mustra loke ta parce di ta interes sincero den e berdad. Si nos ta nos so ora nos yama n’e cas i un persona dje sexo opuesto habri porta i no tin ningun otro hende na cas, generalmente lo ta mihó pa duna un testimonio na porta en bes di drenta paden. Si tin interes, nos por haci areglo pa bolbe bek ora cu nos lo ta compañá pa un otro publicador of ora otronan dje famia di cas tambe lo ta presente. Si esaki no ta posibel, lo ta sabí pa pasa e rebishita pa un otro publicador dje mésun sexo cu e doño di cas. Esaki ta aplicá tambe ora di conducí studio di Bijbel cu un persona dje sexo opuesto.—Mat. 10:16.

Nos tin cu tene cuidou ora di scoge un persona pa traha cuné den e ministerio. Aunke publicadornan di sexo opuesto por traha cu otro de bes en cuando, ta mihó pa haci esaki ora ta cu un grupo. Normalmente, asta ora nos ta den e ministerio, no ta sabí pa nos pasa tempu nos so cu un persona dje sexo opuesto cu no ta nos casá. P’esei, e ruman homber encargá cu e grupo pa sirbishi mester usa bon huicio ora di asigná publicadornan, incluyendo tienernan, pa traha huntu.

Dor di usa semper bon huicio, nos lo evitá di “duna un motibu pa trompecá” sea nos mes of otronan.—2 Cor. 6:3.