Ki Excelente Ta pa T’ei Semper Presente!
1 Pa décadanan, hopi di nos kerido rumannan na Oost Europa no tabatin mag di reuní públicamente. Imaginá nan goso ora e prohibicionnan a kita i nan por a reuní huntu libremente!
2 Un superintendente di circuito a skirbi relacioná cu su bishita na un congregacion asina: “Diamars anochi, net na comienso di mi bishita, e sistema di verwarming a daña. Pafó, e temperatura tabata rond di vrispunt, i paden tabata solamente 5° Celsius. E rumannan tabata sintá bistí cu nan jas, shal, handschoen, mùts i boets. Niun hende no por a busca e textonan den Bijbel, ya cu tabata imposibel pa boltu e blachinan. Pará riba plataforma den mi bachi, mi tabata stijf-stijf di friu, i cada bes cu mi a papia, huma tabata sali for di mi boca. Pero loke a impresioná mi tabata cu mi no a tende ni un solo keho. Tur e rumannan a bisa con dushi i excelente tabata pa t’ei presente!” E rumannan aki no a pensa mes di falta e reunion ei!
3 Asina Nos Tambe Ta Sinti? Nos ta atesorá e oportunidad di reuní huntu libremente na nos reunionnan semanal? Of ora circunstancianan ta faborabel, nos ta mustra falta di aprecio p’e reunionnan? Kisas no ta fácil pa asistí regularmente na reunion, i por tin biaha cu nos tin un motibu válido pa no ta presente. Pero, no lubidá nunca cu entre nos tin rumannan cu apesar di edad avansá, problema grave di salú, hendikep físico, orario pisá di trabou i otro responsabilidadnan serio, ta mira e importancia dje reunionnan i casi semper t’ei presente. Ki ehempelnan excelente pa nos imitá!—Compará cu Lucas 2:37.
4 Laga nos hacié nos custumber pa apoyá adoracion berdadero dor di asistí na tur nos reunionnan cristian, for di un grupo chikitu di studio di buki te na un congreso grandi. Pakico nos mester tuma asistencia n’e reunionnan aki asina na serio? Pasobra ta un mandato divino pa nos reuní huntu. Pero tin otro motibunan importante. Nos tur tin mester dje beneficionan cu ta bini dor di instruccion divino i dje yudansa dje spiritu santu cu nos ta ricibí n’e reunionnan. (Mat. 18:20) Nos ta ser edificá dor di un intercambio di estímulo ora nos asociá cu nos rumannan.—Heb. 10:24, 25.
5 Na e transfiguracion, Pedro di: “Instructor, ta excelente cu nos ta aki.” (Luc. 9:33) Nos mester sinti mescos pa cu tur nos reunionnan cristian. En berdad, ki excelente ta pa t’ei semper presente!