E Conmemoracion Mundial dje Morto di Cristo
1 Jehova a duna nos un abundancia di regalo. Bijbel ta describí su gran bondad amoroso di un manera elocuente como “su don grátis indescriptibel.” Sí, e “bondad inmerecí di Dios” ta asina maraviyoso cu nos no tin palabra pa describié.—2 Cor. 9:14, 15.
2 Su Mayor Regalo: Como e Rescatador di humanidad, Jesucristo ta e regalo di mas grandi. Demostrando su gran amor pa humanidad, Jehova a duna su kerido Yu unigénito. (Juan 3:16) Un bendicion inmerecí asina di parti di Dios ta merecé un conmemoracion mundial. Ki dia i con? Diahuebs anochi, 1 di april 1999, cristiannan rond mundu lo conmemorá e Cena di Señor, i asina celebrá e Memorial di e sacrificio di mas grandi.—1 Cor. 11:20, 23-26.
3 Cristo a muri pa nos asta “miéntras nos tabata pecadó ainda,” i nos por mustra nos gratitud personal dor di celebrá e Memorial di su morto i dor di invitá otro hende pa ta presente huntu cu nos n’e ocasion di sumo importancia aki.—Rom. 5:8.
4 E Evento di Mas Importante: Na promé lugá, e conmemoracion dje morto di Cristo ta resaltá e echo cu el a apoyá Dios su soberania perfectamente. Tambe e ta recordá nos cu nos por tin un posicion limpi dilanti di Jehova dor di ehercé fe den e sacrificio di Jesus, i asina sigurá nos salbacion. (Echo. 4:12) Sí, esaki ta e evento di mas importante di aña!
5 Nos ta mustra amor pa nos próhimo dor di invitá nan pa celebrá e Cena di Señor huntu cu nos. E beneficionan dje rescate ta disponibel ainda pa miyones di hende cu siña di su balor precioso. (Fil. 3:8) Esnan cu ta ehercé fe den e sacrificio di Cristo por tin e speransa firme di bida eterno.—Juan 17:3.
6 E temporada di Memorial ta duna nos oportunidadnan único pa mustra aprecio p’e bondad inmerecí sublime di Dios. Esaki ta un periodo excelente pa participá celosamente den e trabou di predicá e bon nobo dje Reino di Dios. Beneficionan grandi ta spera tur cu ta meditá huntu cu oracion riba Jehova su don grátis indescriptibel i haci areglo pa nan ta presente n’e celebracion dje Cena di Señor dje aña aki!