Caha Di Pregunta

◼ Con ushernan por asistí mayornan pa yuda nan yunan mantené e debido ordu na reunion?

Di naturalesa mucha ta enérgico, i no tin custumber di sinta pa periodonan largu di tempu. Despues di reunion, mucha tin yen di energia acumulá cu kisas ta pone nan core tras di otro mucha den Salon di Reino of na otro lugánan di reunion, den parkeerplaats of riba acera. Sin embargo, e proverbio aki ta cierto: ‘Un mucha lagá pa su cuenta lo causa bergwensa pa su mayor.’—Pro. 29:15.

Lamentablemente, algun di nos rumannan di mas edad a ser lesioná gravemente dor cu mucha a core dal den nan i benta nan abou. Esaki a causa sufrimentu innecesario i tambe gastunan sin nodi pa e mayornan i e congregacion. Pa nan mes siguridad i e siguridad di otro hende, no mester laga mucha core rond i hunga paden ni pafó di Salon di Reino.

Mayornan tin e responsabilidad bíblico di entrená nan yunan pa nan trata nos lugá di adoracion cu e debido respet. (Ecl. 5:1a) Na nos reunion, asamblea i congresonan cristian, tin usher asigná pa soru cu “tur cos ta tuma lugá decentemente” i cu tin “bon ordu.” (1 Cor. 14:40; Col. 2:5) Promé, durante i despues di programa ushernan tin cu keda alerto, tantu paden como pafó. Si tin un mucha ta core of ta haci desordu, e usher por stop e mucha suavemente, i e por splica e mucha di con e comportacion ei no ta aceptabel. Tambe, den un manera bondadoso mester notificá e mayor dje mucha di e problema i dje necesidad di supervisá e mucha. E mayor mester respondé apropiadamente.

Ta di comprendé cu tin biaha durante reunion baby i mucha chikitu por yora of causa disturbio. Ushernan, yegando por lo ménos 20 minuut promé cu e programa cuminsá, por reservá e último rijnan den auditorio pa mayornan cu lo kier sinta ei cu nan yu chikitu. E resto di nos mester cooperá dor di laga e stulnan ei disponibel pa nan.

Si un mucha ta haci desordu, e mayor mester tuma algun accion. Si e mayor no haci esei i e desordu ta distraí esnan presente, den un manera bondadoso un usher mester pidi e mayor si e por bai cu e yu for di den auditorio. Ora nos invitá hende nobo na reunion i nan tin yu chikitu, nos tin cu sinta cu nan i ofrecé pa yuda nan cu e muchanan si nan ta yora of causa desordu den un of otro manera.

Ta un goso pa nos mira mucha di tur edad na Salon di Reino i pa observá nan bon comportacion den e cas di Dios. (1 Tim. 3:15) Dor di respetá Jehova su areglo di adoracion, nan ta dun’é onor i tur hende den congregacion ta apreciá nan.