Bo Ta Apreciá Jehova Su Pacenshi?
1 Si Jehova no a tene pacenshi durante e último 10, 20 i mas añanan, permitiendo pa duna un testimonio extenso, abo lo a siña e berdad? Esta gradicidu nos ta cu el a permití hopi mas hende “alcansá repentimentu.” Pero tog, Jehova su gran dia di huicio “lo bini manera ladron.” (2 Ped. 3:9, 10) Pues, nos no mester malinterpretá e pacenshi di Dios como un tardansa den pone fin n’e sistema di cosnan aki.—Hab. 2:3.
2 Sinti Duele dje Hendenan: Nos no por comprendé Jehova su gran pacenshi. Pero, nos no mester perde e propósito di su pacenshi for di bista. (Jón. 4:1-4, 11) Jehova ta mira e condicion lamentabel cu hende ta aden i e tin compasion cu nan. Jesus ta sinti mescos. Dor cu e tabatin duele dje multitudnan cu el a predicá na dje, e tabata kier pa e trabou di evangelisá expandé di tal manera cu mas hende lo por tabatin e chens di gana bida eterno.—Mat. 9:35-38.
3 Ora tragedia i desaster tuma lugá, nos curason no ta sinti pa e hendenan cu no conocé e berdad? Hende awe ta manera “carné sin wardadó” segun cu nan ta purba comprendé i trata cu e cáos cu tin den mundu. (Mar. 6:34) Dor di predicá e bon nobo cu celo, nos ta consolá esnan cu tin un curason corectamente dispuesto, i ta demostrá nos aprecio pa Jehova su pacenshi.—Echo. 13:48.
4 Nos Trabou Ta Urgente: Aña pasá 323.439 persona a bautisá i mas cu 14.000.000 a asistí na Memorial. Esta un gran potencial pa hopi mas hende scapa e destruccion dje sistema malbado aki! Con grandi e “multitud grandi” lo ta, nos no sa. (Rev. 7:9) Con largu nos comision pa predicá lo dura, nos no sa. Pero Jehova sí sa. Lo predicá e bon nobo te na su satisfaccion, “i e ora ei e fin lo yega.”—Mat. 24:14.
5 E tempu cu a resta ta reducí, i e dia di Dios ta cerca. (1 Cor. 7:29a; Heb. 10:37) Sin duda, “nos salbacion ta mas cerca cu tempu nos a bira creyente.” (Rom. 13:11) Laga nos no keda sin capta e propósito di pacenshi divino. Mas bien, laga nos predicá cu urgencia pa asina mas hende cu ta anhelá husticia por experenciá Jehova su gran misericordia.