E Pueblo Mas Felis na Mundu
1 “Felis ta e pueblo kende su Dios ta Yehova!” (Sal. 144:15, NW) E palabranan ei ta deskribí Testigunan di Yehova komo e pueblo mas felis na mundu. No tin goso mas grandi ku esun ku un hende ta haña dor di sirbi Yehova, e úniko Dios bibu i berdadero. Siendo ku e ta “e Dios felis,” esnan ku ta ador’é ta reflehá su goso. (1 Tim. 1:11, NW) Kua ta algun aspekto di nos adorashon ku ta hasi nos asina felis?
2 Motibunan Dikon Nos Ta Felis: Hesus a sigurá nos ku nos ta haña felisidat ora nos ta “konsiente di [nos] nesesidat spiritual.” (Mat. 5:3, NW) Studia Beibel kontinuamente i asistí na tur nos reunionnan kristian ta satisfasé e nesesidat ei. Dor di siña e bèrdat dje Palabra di Dios, nos a ser librá di falsedat i eror religioso. (Huan 8:32) Tambe e Skritura a siña nos e mihó manera pa hiba nos bida. (Isa. 48:17) Debí na esei, nos ta disfrutá di amistatnan kristian saludabel den nos asosiashon felis di ruman.—1 Tes. 2:19, 20; 1 Ped. 2:17.
3 Nos ta haña gran satisfakshon ora nos ta obedesé Dios su normanan moral haltu, pasobra nos sa ku esaki ta protehá nos i ta hasi Yehova kontentu. (Pro. 27:11) Un reportero a remarká: “Apesar di nan normanan estrikto, Testigunan di Yehova no ta parse hende infelis. Al kontrario. Tantu . . . hóben komo hende grandi, tin un aparensia eksepshonalmente felis i masha balansá.” Kon nos por yuda otro hende kompartí nos estilo di bida felis?
4 Yuda Otro Hende Haña Felisidat: Mundu ta yen di infelisidat, i hende en general ta mira futuro skur. Sin embargo, nos perspektiva pa futuro ta briante, pasobra nos sa ku un dia lo no tin tristesa mas. (Rev. 21:3, 4) P’esei nos ta partisipá ku selo den e ministerio, buskando hende di kurason sinsero pa kompartí ku nan nos speransa i nos kreensianan tokante Yehova.—Eze. 9:4.
5 Un ruman muhé pionero a bisa: “No tin nada ku ta duna mas satisfakshon ku yuda hende konosé Yehova i su bèrdat.” Laga nos hasi tur nos posibel pa animá hopi hende mas pa aseptá un studio di Beibel na kas. Sirbi Yehova i ofresé nos mes pa yuda otronan sirbié, ta produsí e felisidat di mas grandi.—Echo. 20:35.