Kaha di Pregunta

◼ Kiko nos tin ku kòrda ora nos ta usa telefòn selular i pager elektróniko?

Kasi tur kaminda ku nos ta e aparatonan ei ta hasi posibel pa nos tuma kontakto ku otro hende. Ounke esaki por ta útil, nos tin ku tene kuidou pa no laga e uso di telefòn selular i pager na momentunan inapropiado baha dignidat di nos sirbishi òf reunionnan kristian. Kon esaki por sosodé?

Pensa kiko lo ta e efekto si nos telefòn rin nèt ora nos ta den sirbishi di fèlt dunando un testimonio. Kiko e doño di kas lo pensa? Ki impreshon nos lo dun’é si nos stòp e kòmbersashon pa kontestá e yamada? Un kos ta sigur: nos lo no kier hasi nada ku lo stroba otro hende di skucha e mensahe di Reino. (2 Kor. 6:3) Pues, si nos tin un telefòn selular òf un pager huntu ku nos, nos mester program’é di tal manera ku e no ta interumpí nos òf otro hende ora nos ta den sirbishi di fèlt.

Kiko si nos ta wardando riba un ruman ku ta dunando testimonio? Si nos a apartá un periodo di tempu pa sirbishi di fèlt, nos no mester tene nos mente riba e aktividat ei? Por fabor, komo muestra di rèspèt pa nos sirbishi sagrado, atendé asuntunan personal òf di interes sosial innesesario na otro ora. (Rom. 12:7) Klaro ku esaki no kier men ku no mag usa telefòn pa sigui duna un hende testimonio òf pa traha un sita pa duna testimonio.

Foral ora di kore outo nos mester tene kuidou ku uso di telefòn selular, ya ku algun investigashon a mustra ku esei por oumentá mashá e riesgo di haña un aksidente. Nos tin ku kumpli estriktamente ku lei ku ta prohibí uso di telefòn tras di stür.

Nos ta asistí na reunion-, asamblea- i kongresonan kristian pa adorá Yehova i ser siñá dor di dje. Gratitut pa e okashonnan sagrado aki no mester motivá nos pa perkurá pa telefòn selular i pager no kita atenshon di otro hende? Si tin un asuntu urgente ku mester di nos atenshon inmediato, nos tin ku atend’é pafó di sala di reunion. Òf nos tin ku hasi areglo pa atendé asuntunan personal i ku no ta religioso fuera di oranan asigná pa adorashon.—1 Kor. 10:24.

Laga e manera ku nos ta usa telefòn selular òf kualkier otro aparato elektróniko semper reflehá konsiderashon pa otro hende i apresio profundo pa kosnan spiritual.