Usa e Buki Adorá Dios pa Dirigí Studio di Beibel

E buki Adorá e Úniko Dios Berdadero ta prepará spesialmente pa yuda esnan nobo progresá den e bèrdat i pa profundisá nan apresio pa Yehova i su organisashon. Por us’é ku studiantenan di Beibel komo e segundo buki di studio. Nos Ministerio di Reino di yüni 2000, na página 4, a splika: “Si ta bisto ku un persona ta hasiendo progreso, ounke pokopoko, i e ta desaroyando apresio pa loke e ta siña, e ora ei sigui ku e studio di Beibel den un di dos buki despues ku terminá ku e foyeto Rekerí i e buki Conocimentu. . . . Den tur kaso, mester studia e foyeto Rekerí i e buki Conocimentu promé. Mester konta i raportá e studio di Beibel, rebishitanan i tempu ku dediká na sigui e studio, asta si e studiante batisá promé ku kompletá e di dos buki.”

Ken mas por benefisiá di un studio di Beibel for di e buki Adorá Dios? E mesun artíkulo ta sigui bisa: “Si bo sa di algun hende ku a studia [e foyeto Rekerí i] e buki Conocimentu den pasado pero ku nunka no a progresá te na dedikashon i boutismo, kisas lo bo kier tuma e inisiativa pa wak si nan lo kier reanudá nan studio di Beibel.” Laga nos hasi un esfuerso spesial pa kuminsá studionan for di e buki Adorá Dios ku hendenan asina durante mart ku aprel.