Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 29 di desèmber 2003. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 3 di novèmber te ku 29 di desèmber 2003. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Dikon ta asina importante pa usa Beibel den sirbishi di vèlt? [be-PA pág. 145 §2, kuadro] Beibel por motivá hende mansu manera karné mas lihé ku kualkier kos ku nos por bisa personalmente. Loke un persona mira ku su mes wowo den Beibel por kousa un impreshon profundo.
2. Kon e konteksto ta influensiá e manera ku bo ta introdusí un teksto bíbliko? [be-PA pág. 149] E ta identifiká e persona ku a skirbi òf bisa loke tin den e teksto sitá. Por ehèmpel, no ta David a komponé tur e salmonan, ni no ta Salomon a skirbi henter e buki di Proverbionan. Tambe e konteksto ta determiná kiko nos por bisa di esun na ken e eskritor bíbliko ta referí, ki tema tabata wòrdu tratá i ki sirkunstansianan a eksistí tempu ku e relato bíbliko a wòrdu skirbí.
3. Pakiko ta importante pa enfatisá e palabranan korekto ora di lesa un teksto bíbliko, i kon nos por determiná kua nan ta? [be-PA pág. 151 §2, kuadro] Ora nos pone énfasis riba e palabranan korekto, e splikashon ta bira mas kla i mas fásil pa e ouditorio kapta. Ora di analisá un teksto, puntra bo mes: ‘Kua ta e palabranan ku mi mester enfatisá pa logra e meta pakiko mi ta lesa e teksto aki?’
4. Kon nos ta apliká e konseho di Pablo pa “parti e palabra di bèrdat na un manera korekto” ora nos ta siña otro hende, i dikon esaki ta importante? (2 Tim. 2:15) [be-PA pág. 153 §2, kuadro] Pa nos por “parti e palabra di bèrdat na un manera korekto,” nos splikashon di tekstonan bíbliko mester ta kuadra ku loke Beibel mes ta siña. Esaki ta rekerí pa nos tene kuenta ku e konteksto i evitá di duna nos mes interpretashon basá riba nos ideanan personal òf filosofia mundano. Esaki ta importante pasobra Dios su boluntat ta pa hende “yega na konosementu di e bèrdat.” (1 Tim. 2:3, 4)
5. Kon Pablo a ‘rasoná for di e Skrituranan’? (Echo. 17:2, 3) [be-PA pág. 155 §6–pág. 156 §1] Pablo a konta algun suseso di Hesus su bida i su sirbishi, el a mustra kon e Skritura Hebreo a profetisá esakinan, anto kaba el a duna un konklushon ku no a laga ningun duda den nan mente. El a sita tekstonan bíbliko, destaká algun palabra òf frase, i despues a mustra kiko ta nan importansia.
PARTI NUM. 1
6. Ora nos ta usa nos fuente prinsipal di informashon—Beibel—pa prepará un diskurso, dikon ta probechoso pa (1) eksaminá e konteksto di e versíkulonan, (2) buska e referensianan den márgen i (3) hasi uso di un konkordansia bíbliko? [be-PA pág. 34 §3–pág. 35 §2] (1) Eksaminashon di e konteksto por yuda nos komprondé e nifikashon di tekstonan bíbliko i ta perkurá detayenan ku por hasi un diskurso interesante. (2) Referensianan den márgen ta klara tekstonan bíbliko i por mustra e kumplimentu di un profesia bíbliko òf e patronchi di un pakto di Lei; otro referensianan den márgen kisas simplemente ta referí na pensamentunan paresido òf na informashon biográfiko òf geográfiko. (3) Usando un konkordansia bíbliko por yuda nos lokalisá versíkulonan ku tin di haber ku e tema ku nos ta investigando i ta permití nos mira evidensia di “e ehèmpel” òf patronchi di e bèrdat presentá den e Palabra di Dios. (2 Tim. 1:13)
7. Kon nos por reflehá berdadero lealtat i na ken? [w01-PA 1/10 pág. 22-3] Dor ku lealtat ta sinónimo di bondat amoroso, e ta transmití tambe e sentido fuerte ku e mester bini di dos banda. Si bondat amoroso ser mustrá na nos, anto nos mester hasi meskos bèk. Komo un persona ku a risibí Yehova su bondat amoroso, David a ser motivá pa adorá i alabá Dios. (Sal. 138:2) Lealtat na Yehova ta enserá ser leal na su Palabra i na su organisashon. Tambe nos mester mustra lealtat na nos kasá, famianan kreyente i amigunan.
8. Kiko ta indiká ku Yehova ta opservá tempu na un manera eksakto? (Dan. 11:35-40; Luk. 21:24) [si-S pág. 284 §1] Ora ku e angel di Yehova a duna e vishon di “e rei di nort” i “e rei di zùit,” el a usa vários biaha e ekspreshon “e tempu stipulá.” Tin hopi otro teksto bíbliko ku ta indiká ku Yehova ta opservá tempu na un manera eksakto, i ku e ta kumpli ku su propósitonan presis na ora.
9. Despues di a hasi investigashon, ki faktornan nos mester tene na mente ora di disidí kua ta e puntonan ku nos lo usa den un diskurso? [be-PA pág. 38] Usa solamente puntonan ku ta kontribuí ku algu balioso den e presentashon di e tema. Hasi sigur ku e informashon ta al dia i na armonia ku loke tin den e publikashonnan mas último di Testigunan di Yehova. Tene kuidou ora di usa informashon for di fuentenan di mundu, kòrdando ku e Palabra di Dios ta e bèrdat i ku Hesus ta okupá e papel klave den kumplimentu di Dios su propósito. (Juan 17:17; Kol. 2:3) Nos ta hasi un esfuerso diligente pa reflehá Dios su manera di pensa. (Pro. 2:1-5)
10. Dikon loke Hesus a deklará relashoná ku “e dianan di Noe” ta importante pa nos situashon awe? (Mat. 24:37) [w01-PA 15/11 pág. 31 §3-4] Kristiannan djawe ta predikadónan di hustisia ku ta urgi hende pa nan repentí. (2 Ped. 3:5-9) Noe a obedesé Yehova apesar di oposishon i difikultat. E ku su famia no tabata sa na ki tempu presis Dios lo a trese e Diluvio, pero fe den e palabra di Dios a sostené nan atraves di añanan di labor teokrátiko. (Heb. 11:7)
LESAMENTU SEMANAL DI BEIBEL
11. Kon Pablo su karta na Filemon ta mustra ku e tarea di un kristian ta pa yuda personanan bira kristian, no pa promové kambionan sosial? (Flm. 12) Pablo ta referí na Onésimo, un katibu ku a hui, komo ‘mi yu, kende mi a engendrá’ i komo “un ruman stimá.” (Flm 10, 16) Ounke Onésimo a skucha loke Pablo a prediká i a bira un kristian, Pablo no a deklar’é un hòmber liber. Mas bien, el a mand’é bèk kaminda e tabata pertenesé legalmente bou di e órden sosial romano di e tempu ei ku a permití hende pa ta doño legal di katibu. [1, w98-PA 15/1 pág. 30-1; w63-S 268-71 (w62-E pág. 653-6)]
12. Pa ki peliger Hebreonan 2:1, 3:12 i 6:6 ta spièrta nos? [w99-PA 15/7 pág. 19 §12; w86-S 1/6 pág. 14 §16-17; w81-S 15/5 (w80-E 1/12) pág. 23 §8] Un hende por kuminsá apartá (òf, “drif bai,” NW ) for di e bèrdat na un manera inosente dor di optené un par di kos material, dor di asosiashon mundano òf dor di spekulá riba asuntunan bíbliko. Di otro banda, ta un piká serio si un hende alehá for di e bèrdat. Dor di bira apóstata e persona aki ta dal un paso deliberá. Tambe un persona por rechasá e bèrdat deliberadamente, i yega na un punto ku e no por repentí mas. Ta Yehova ku Hesus so por determiná si un persona a yega na e punto ei.
13. Kon nos por evitá ku e ekspreshon ‘si Yehova ke’ ta bira un kos insignifikante? (Sant. 4:15) [cj-S pág. 170 §2–pág. 171 §1] Nos mester evitá di usa e ekspreshon ei pa loko, djis komo un kustumber pa impreshoná otro hende òf pa hustifiká desishonnan ku nos ta tuma. Mas bien, kiko ku nos ta bai hasi, manera por ehèmpel kumpli ku nos obligashon bíbliko di perkurá pa nos famia, nos mester ta berdaderamente interesá den tuma Dios su boluntat na kuenta i determiná den nos kurason pa kumpli kuné.
14. Kiko ta nifiká “sperando i purando e binida di e dia di Dios,” i kon nos por hasi esei? (2 Ped. 3:12) [w97-PA 1/9 pág. 19-20] E ta nifiká ku nos ta keda alerta i ansiosamente ta antisipá yegada di “e gran dia di Dios Todopoderoso” na Armagedón. (Rev. 16:14) Nos por hasi esei dor di kòrda “e palabranan ku a wòrdu papiá ántes pa medio di e profetanan santu” tokante e presensia di Hesus den poder di Reino i e huisio di e malbadonan. Tambe nos tin ku tene na mente “e mandamentu di e Señor i Salbadó” pa keda alerta. (2 Ped. 3:2; Luk. 21:34-36)
15. Ki konseho importante pa kristiannan awe nos ta haña den e mensahenan dirigí na e shete kongregashonnan menshoná den Revelashon kapítulo 2 i 3? (Rev. 2:4, 5, 10, 14, 20; 3:3, 10, 11, 17, 19) Pa nos ta kristiannan viktorioso, nos no mester pèrdè nos vigor spiritual ni nos amor pa e bèrdat. Nos mester ferwagt ku nos lo ser poní na prueba plenamente i nos mester ta determiná pa keda fiel henter nos bida. Tambe nos tin ku rechasá inmoralidat i apostasia, perseverá i keda spiritualmente lantá, i no permití indiferensia òf materialismo afektá nos. [7, re-PA pág. 34 §5-6; pág. 38 §5; pág. 44 §10-11; pág. 49 §7; pág. 56 §7; pág. 64 §20; pág. 68 §8]