Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 28 di febrüari 2005. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 3 di yanüari te ku 28 di febrüari 2005. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.
KUALIDAT DI PAPIA
1. Kon nos por papia na un manera mas komprendibel? [1, be-PA pág. 226 §1–pág. 227 §2] Dor di usa palabra simpel manera Hesus a hasi den e Sermon Riba Seru, usa mas tantu frase kòrtiku, enfatisá un par di punto prinsipal so, organisá nos informashon, splika ekspreshonnan ménos konosí i no bula bai di un teksto pa otro sin duna sufisiente splikashon.
2. Ki tipo di ekspreshonnan kisas lo bo mester splika? [2, be-PA pág. 227 §3–pág. 228 §1] (1) Ekspreshonnan ku tin un nifikashon partikular pa Testigunan di Yehova, manera “pionero,” “superintendente di sirkuito” i “Memorial”; (2) palabranan komun ku hopi hende no ta komprondé bon, manera “alma,” “Armagedón” i “inmoralidat”; (3) Ekspreshonnan bíbliko relashoná ku kustumbernan òf midínan di antigwedat, manera “kodo.”
3. Kiko lo yuda nos presentá e informashon na un manera berdaderamente instruktivo pa nos ouditorio? [6, be-PA pág. 231 §1-3] Nos mester stimulá nos mes pensamentu dor di puntra nos mes kiko, dikon, na ki tempu, na unda, ken i kon. En bes di dependé riba ideanan ku bini na nos mente òf ripití informashon ku e oyentenan sa kaba, nos mester amplia nos punto di bista di e informashon dor di hasi investigashon.
4. Kiko nos por hasi ora di lesa un teksto di Beibel konosí, pa esaki por ta instruktivo pa nos ouditorio? [7, be-PA pág. 231 §4-5] Nos lo por parti e teksto na pida-pida i isolá e palabranan òf ekspreshonnan ku ta relashoná ku nos tema. Por ehèmpel, despues di lesa Mikeas 6:8 nos lo por puntra: “Kiko ta ‘hustisia?’ ” “Ken su norma di hustisia e versíkulo ta trata?” “Kiko kier men ‘hasi hustisia’?” Despues nos lo por splika e teksto na un manera ku ta kuadra ku nos tema, nos meta i nos ouditorio.
5. Kiko nos lo por logra si nos animá nos oyentenan pa paga tinu na sierto detayenan di un relato bíbliko konosí? [9, be-PA pág. 232 §2-4] Nos oyentenan por siña hopi si nos hala atenshon na e konteksto di un versíkulo, e identidat di e persona ku ta papia i e sirkunstansianan bou di kua el a wòrdu skirbí. Esaki por yuda nan lesa e Palabra di Dios ku mas atenshon, i komprondé mihó e importansia di susesonan den Beibel. (Mat. 22:41-45; Luk. 20:37, 38)
PARTI NUM. 1
6. Siña hende pa “teme Dios i warda su mandamentunan” ta inkluí kiko? (Ekl. 12:13) [1, be-PA pág. 272 §3–pág. 273 §1] Mester siña hende ku e Kreadó di shelu i tera ta e úniko Dios berdadero. E ta predisí futuro na un manera konfiabel i ta kumpli ku su palabra meskos ku el a hasi den pasado. Tur hende mester rindi kuenta na dje. (Isa. 45:18, 21, 22; 55:10, 11; Echo. 17:30, 31)
7. Kon nos por hala atenshon no solamente na e nòmber Yehova sino na e persona ku e nòmber ei ta representá? (Joel 2:32) [3, be-PA pág. 274 §3-5] Ora nos siña hende ku e Kreadó tin un nòmber, nos por hala nan atenshon na e klase di Dios ku e ta. (Eks. 34:6, 7) Ora nos ta papia tokante Dios su mandamentunan, su rekisitonan i e bendishonnan ku e Reino lo trese, nos por mustra e persona kiko e kosnan aki ta bisa nos tokante e kualidatnan di Yehova. Nos meta ta pa stimulá hende pa haña un temor sano di Dios, ya ku nos speransa pa biba den futuro ta dependé di dje. (Sal. 89:7; Rom. 14:12)
8. Kon importante ta pa siña konosé Hesus i duna testimonio di dje? (Juan 17:3) [5, be-PA pág. 276 §1] Konosementu eksakto di Hesukristu ta un rekisito pa bida eterno. E boluntat di Dios ta pa tur hende “konfesá ku Hesukristu ta Señor.” (Fil. 2:9-11) P’esei, komo leal sirbidónan di Dios, nos no por evitá di duna testimonio tokante Hesus. (1 Tim. 2:3-7)
9. Dikon nos mester komprondé i rekonosé e papel di Hesus si nos ke tin un bon relashon ku Dios i komprondé Beibel korektamente? [6, be-PA pág. 276 §2] Juan 14:6 ta bisa ku ta pa medio di Hesukristu so hende por haña un posishon aprobá dilanti Dios i bin serka dje. Yehova a hasi su yu unigénito e figura sentral den e kumplimentu di tur Su propósitonan. (Kol. 1:17-20) Profesia bíbliko ta drei rònt di e realidat aki. (Rev. 19:10)
10. Kon nos por demostrá ku di bèrdat nos ta kere ku Hesukristu ta Rei? [8, be-PA pág. 277 §4] Nos ta demostrá si realmente nos ta kere dor di sigui pone interesnan di Reino na promé lugá den bida i dor di prediká i hasi disipel selosamente. (Mat. 6:19-34; 24:14; 28:19, 20) Tambe nos mester mustra berdadero amor, segun e ehèmpel di Hesus, i kumpli ku e “mandamentu nobo” ku el a duna na Juan 13:34 i 35.
LESAMENTU SEMANAL DI BEIBEL
11. Taré, tata di Abraham, tabata un adoradó di dios falsu? (Jos. 24:2) Na prinsipio, Taré no tabata un adoradó di Yehova Dios. Probablemente el a adorá e dios-luna ku yama Sin, un dios popular na Ur. Segun tradishon hudiu, Taré kisas asta tabata un trahadó di ídolo. [2, w04-PA 1/12 “Puntonan Sobresaliente di e Buki di Josué”]
12. Gideon a falta kurashi pa kumpli ku e asignashon ku Yehova a dun’é? Pakiko bo ta kontestá asina? (Hues. 6:25-27) Hebreonan 11:32-38 [NW] ta konfirmá ku Gideon tabatin kurashi, pasobra ei e ta ser inkluí entre esnan ku “a bira balente den guera.” Pero el a demostrá modestia i diskreshon tambe den e manera ku el a kumpli ku su asignashon. El a traha durante skuridat di anochi, ora ku muy probablemente hende lo no a ripar’é. Ademas, el a ehersé e debido koutela dor di hiba dies sirbidó huntu kuné, kisas pa un par di nan por a keda vigilá tanten ku e otronan tabata yud’é destruí e altar i e palu sagrado. [4, w00-PA 1/8 pág. 17 §12]
13. Ki lès nos por saka for di e manera ku Gideon a papia ku e tribu di Efrain? (Hues. 8:1-3) Dor di su palabranan kalmu i bon skohé, Gideon a evitá loke por a bira un guera desastroso entre e tribunan. Kisas e problema dje hòmbernan di e tribu di Efrain tabata ku nan a sinti nan mes importante i nan tabata orguyoso. Sin embargo, esei no a stroba Gideon di hasi esfuerso pa kos kaba na un manera pasífiko. Awe tambe rabia por lanta den otro hende i pone nan bira hostil kontra nos. Nos mester rekonosé nan sintimentunan i hasi esfuerso pa komprondé nan punto di bista. [5, w00-PA 15/8 pág. 25 §3-4]
14. Kiko e echo ku e pueblo di Gabaa no tabata dispuesto pa mustra hospitalidat a indiká? (Hues. 19:14, 15) E aktitut ei tabata hopi straño pa un stat israelita. E echo ku nan no tabata dispuesto pa mustra hospitalidat tabata un indikashon di un defisiensia moral serio ku a bira asta mas bisto segun ku a bira anochi. Beibel ta manda kristiannan pa ‘praktiká hospitalidat.’ (Rom. 12:13) [8, w05-PA 15/1 “Puntonan Sobresaliente di e Buki di Huesnan”]
15. Si ‘kada hende tabata hasi loke tabata bon den nan mes bista,’ esaki no a fomentá un situashon di anarkia? (Hues. 21:25) Nò, pasobra Yehova a hasi vários areglo pa guia su pueblo. El a duna nan e Lei i e saserdosio pa eduká nan den su kaminda. Pa medio di e Urim i e Tumim, e sumo saserdote por a buska e guia di Dios riba asuntunan importante. (Eks. 28:30) Ademas, tur stat tabatin ansianonan kapas pa duna konseho sano. Si un israelita a hasi bon uso di e areglonan aki, i despues a hasi “loke tabata bon den su mes bista,” e lo tabatin bon resultado. [8, w05-PA 15/1 “Puntonan Sobresaliente di e Buki di Huesnan”]