Un Karta di Kuerpo Gobernante
MIRANDO ku nos ta na drèmpel di e binidero sistema nobo di kosnan, ta urgente pa nos keda den ekspektativa i spera riba Yehova. (Sof. 3:8) Profeta Daniel a bisa ku ‘Dios ta revelá misterio i a hasi konosí kiko lo sosodé den e último dianan.’ (Dan. 2:28) Nos tin e gran privilegio di ta biba na final di e periodo ei ku Beibel a profetisá di dje, i di ta komprondé e sekretonan di Yehova ku e ta hasiendo konosí awor.
Mediante “e esklabo fiel i prudente,” progresivamente Yehova a revelá su propósito pa rekohé un “multitut grandi” internashonal di adoradó durante e “último dianan” trabahoso aki. (Mat. 24:45; Rev. 7:9; 2 Tim. 3:1) Segun e deskripshon di Isaias 2:2 i 3, e movementu mundial aki tin ku sosodé “den e último dianan.” Tur aña e rekohementu aki ta sigui meimei di e turbulensia i violensia ku ta plamá riba e mundu aki.
Durante aña 2004, e esklabo fiel a hasi nos mas konsiente di e nesesidat di obedesé e palabranan di Hesus: “Sea alerta . . . Sea prepará.” (Mat. 24:42, 44) Sin duda, loke ta pasando riba esena mundial tin gran nifikashon pa kristiannan, kendenan ta diserní “e señalnan di e tempunan” i ta reakshoná di akuerdo ku nan. (Mat. 16:1-3) Kumpliendo ku su Palabra, Yehova lo sigui ta ku su pueblo ku el a organisá pa hasi su trabou apesar di kualke oposishon ku nan lo por haña nan kuné.
Apesar di e esfuersonan ku algun hende ta hasi pa stroba òf stòp e proklamashon di Reino, nos rumannan ta sigui papia e bèrdat i reuní huntu. (Echo. 5:19, 20; Heb. 10:24, 25) Na Rusia durante yüni 2004, un korte di apelashon na Moskú a konfirmá e veredikto ku un korte menor a duna pa prohibí e aktividatnan di Testigunan di Yehova i likidá nan entidat legal den e stat ei. Sin embargo, esei no ta stòp e rumannan; nan sa kiko Dios ta rekerí di nan, i nan ta obedes’é komo Gobernante mas ku hende. (Echo. 5:29) Nos tin konfiansa ku Yehova lo sigui guia su sirbidónan apesar di e akshonnan legal desfaborabel.
Durante último añanan na e Repúblika di Georgia, nos rumannan a pèrdè nan propiedatnan, sufri di violensia na man di multitut desordená i a mira kon opositornan tabata kima nan literatura. Pero ningun arma ku nan a usa kontra nos rumannan no tabatin éksito. (Isa. 54:17) Durante e aña di sirbishi 2004, Testigunan di Yehova a bolbe haña rekonosementu legal na Georgia. Nan a tene kongresonan sin ningun opstákulo i literatura ta drenta e pais libremente. Nan a raportá máksimonan nobo den e kantidat di publikadó i di asistensia na Memorial.
Na Armenia, Eritrea, Repúblika di Korea, Ruanda i Turkmenistan, e rumannan a ser enkarselá pa motibu di nan fe. Ounke nan ta ser maltratá, nan sa e motibu bíbliko di nan pruebanan, i esaki ta yuda nan mantené nan fieldat segun ku nan ta spera riba Yehova pa haña liberashon.—1 Ped. 1:6; 2 Ped. 2:9.
Segun ku bo ta analisá e Rapòrt di Aña di Sirbishi den e Toren di Vigilansia di 1 di febrüari 2005, lo bo alegrá ora bo ripará Yehova su bondat. (Sal. 31:19; 65:11) Nos ta spera ku e rapòrt aki lo animá bo pa sigui kana den un manera ku ta agradá Dios.—1 Tes. 4:1.
Esfuersonan grandi pa alkansá tur klase di hende ku e bèrdat ta sigui tuma lugá. A prepará por ehèmpel, vidio, DVD i otro informashon na idioma di seña i braille pa duna yudansa spiritual na hende surdu i siegu. Hopi publikadó di Reino a siña idioma ku imigrantenan den e teritorio di nan kongregashon ta papia.
Ademas, a forma sentenáres di grupo isolá den teritorionan ku ta difísil pa alkansá. Tin un sukursal ku mas di 300 grupo isolá ku na tur ta forma mas ku 7.000 publikadó. Esta un gran potensial pa kongregashonnan nobo! Ademas, na e Memorial di e aña di sirbishi 2004 tabatin 16.760.607 persona presente di kua mas ku 10 mion no tabata Testigu. Esaki ta un indikashon fuerte di e kosecha hechu ku ta kla pa ser rekohé.
Nos ta gradisí Yehova pa su bendishon riku i e manera amoroso ku e ta perkurá pa nos diariamente. (Pro. 10:22; Mal. 3:10; 1 Ped. 5:7) Ku pleno konfiansa den Yehova, nos ta move unidamente padilanti den e “último dianan aki.” Sin importá ki problema nos por haña nos kuné, laga nos tuma na pechu nos teksto di aña pa 2005: ‘Mi yudansa ta bin for di Yehova.’ (Sal. 121:2) Por fabor, sea sigur di nos amor i orashonnan pa boso.
Boso rumannan,
Kuerpo Gobernante di Testigunan di Yehova