Desaroyá e Abilidat di Rasoná ku Otro Hende
1 Apòstel Pablo su diskurso den e snoa na Antiokia di Pisidia, registrá na Echonan 13:16-41, ta un bon ehèmpel di kon pa rasoná ku otro hende. Pablo a tene kuenta ku e background i e manera di pensa di su oyentenan i a adaptá su presentashon di e bon nobo di akuerdo ku eseinan. Segun ku nos ta analisá e relato aki, laga nos wak kon nos por hasi meskos den nos ministerio.
2 Buska un Base Komun: Ounke Pablo su mensahe a enfoká riba e papel importante ku Hesus a hunga den kumplimentu di Dios su propósito, Pablo no a kuminsá su diskurso menshonando e punto ei. En bes di esei, el a papia di algu ku e tabatin en komun ku su oudiensia di kua e mayoria tabata hudiu: historia di e pueblo hudiu. (Echo. 13:16-22) Di mes manera, si nos buska un base komun ku otro hende, nos lo tin mas chèns di kapta nan atenshon. Esaki kisas ta rekerí pa nos hasi preguntanan ku takto pa animá nan pa ekspresá nan mes, i skucha ku atenshon pa asina nos diserní loke di bèrdat ta interesá nan.
3 Dor di konsiderá e historia di e hudiunan, Pablo a kòrda su oyentenan riba e promesa di Dios pa produsí un Salbadó for di e desendientenan di David. Sin embargo, hopi hudiu tabata spera un héroe militar ku lo a libra nan for di e dominio di e romanonan i halsa e nashon hudiu riba tur otro. Sin duda, nan tabata konsiente ku e lidernan religioso hudiu na Yerusalèm a rechasá Hesus, a entreg’é na outoridatnan romano, i a laga mat’é. Kon Pablo por a konvensé nan ku e Persona aki tabata e Mesias primintí?
4 Adaptá Bo Presentashon: Pablo tabata sa kon su oyentenan tabata pensa, p’esei el a usa tekstonan di Beibel pa rasoná ku nan a base di loke nan a aseptá kaba. Por ehèmpel, el a introdusí Hesus komo desendiente di David i komo e persona ku Juan Boutista—kende generalmente a ser konsiderá komo un profeta di Dios—a identifiká. (Echo. 13:23-25) Pablo a indiká ku dor di rechasá Hesus i konden’é na morto, e lidernan religioso a ‘kumpli ku e palabranan di e profetanan.’ (Echo. 13:26-28) Mas aleu, el a splika ku tabatin testigunan okular di e echo ku Hesus a ser lantá for di morto, i el a hala atenshon di e hudiunan na tekstonan di Beibel ku nan tabata konosé i ku a kumpli den e resurekshon di Hesus.—Echo. 13:29-37.
5 Di otro banda, ora Pablo a dirigí su mes na un públiko griego na e Areópago di Atenas, el a usa un presentashon diferente. (Echo. 17:22-31) I tòg el a trese e mesun mensahe básiko, i den tur dos kaso su esfuersonan a duna bon resultado. (Echo. 13:42, 43; 17:34) Asina tambe awe, nos lo ta mas efektivo den nos ministerio si nos buska un base komun ku nos oyentenan i adaptá nos presentashon di akuerdo ku nan background i manera di pensa.
[Study Questions]
1. Kua relato bíbliko nos ta bai analisá, i dikon?
2. Kiko nos ta siña for di e manera ku Pablo a kuminsá su diskurso?
3. Kiko a pone ku tabata difísil pa Pablo su oyentenan aseptá ku Hesus tabata e Mesias primintí?
4. Kon Pablo a rasoná ábilmente ku su oyentenan hudiu?
5. (a) Kon Pablo a adaptá su presentashon ora el a papia ku un públiko griego? (b) Kon nos por imitá e ehèmpel di Pablo ora nos ta prediká den e teritorio di nos kongregashon?