Amor Ta e Yabi pa un Ministerio Fruktífero
1 “Bin serka mi . . . i lo mi duna boso sosiegu.” (Mat. 11:28) E palabranan bunita ei tabata un refleho di e amor profundo ku Hesus tabatin pa hende. Komo minister kristian, nos ke imitá Hesus i demostrá nos amor pa hende ku ta sinti nan agotá debí na e mundu sin amor aki. Kon nos por demostrá e amor ei den nos predikashon di e bon nobo?
2 Ku Palabra: Amor pa hende a motivá Hesus pa probechá di tur oportunidat pa prediká e bon nobo. (Juan 4:7-14) Si nos ta vasilá pa prediká informalmente, amor lo yuda nos superá esei. Un mucha muhé di seis aña a duna un bon testimonio na un señora sintá banda di dje den sala di espera na dòkter. Kiko a motiv’é pa hasi esei? El a splika: “E señora su kara tabata mustra ku e ta un hende ku tabatin mester di tende tokante Yehova.”
3 Nos por demostrá nos interes den hende ku un sonrisa sinsero i kaluroso, i un tono di bos amabel. Loke tambe ta demostrá amor ta ora nos ta skucha ku atenshon na loke otro hende ta bisa, ora nos ta rekonosé ku nan tin motibunan válido pa nan preokupashonnan i ora nos ta mustra berdadero interes personal. (Pro. 15:23) Meskos ku Hesus, nos tin ku enfatisá e mensahe alentador di Reino i e kompashon amoroso ku Yehova tin pa hende.—Mat. 24:14; Luk. 4:18.
4 Ku Echo: Hesus tabata kla pa reakshoná riba e nesesidatnan di otro hende den maneranan práktiko, ku kos material. (Mat. 15:32) Kisas nos tambe ta haña oportunidat pa hasi aktonan di bondat ora nos ta den e ministerio. Un ruman muhé a mira kon un señora tabata bringa pa komprondé un yamada telefóniko importante. Nos ruman a ofresé pa tradusí loke e otro persona tabata bisa. E akto amoroso aki a habri kaminda pa un kòmbersashon bíbliko ku a yuda e señora aseptá un estudio di Beibel. Den un otro kaso, un ruman hòmber ku a bai pa hasi rebishita a topa e doño di kas man na kabes pasobra un sofá pisá a keda pegá den porta. Djis despues di a dun’é un man, e ruman tabata sintá riba e mesun sofá ei pa kuminsá un estudio di Beibel ku e hòmber ku a keda hopi gradisidu ku e yudansa ku el a haña.
5 Ora nos ta partisipá den e ministerio, nos ta demostrá nos amor pa Dios i nos amor pa próhimo. (Mat. 22:36-40) Tal demostrashon ku palabra i ku echo ta yuda hende di kurason sinsero realisá ku nos tin e bèrdat.