Anunsio

◼ Oferta di literatura pa yanüari: Por ofresé kualke buki di 192 página ku su blachinan a bira hel òf a kambia koló òf kualke buki ku a ser publiká promé ku 1991. Kongregashonnan ku no tin ningun di e bukinan mas bieu aki por ofresé e buki Conocimentu òf e foyeto Keda Vigilá! Febrüari: Ofresé e buki Hala Serka Yehova. Kongregashonnan ku no tin e publikashon aki por usa e buki Revelacion—su gran culminacion ta cerca! òf otro buki ku nan tin na stòk. Mart: Ofresé e buki Kiko Beibel Ta Siña Realmente? i hasi esfuerso diligente pa kuminsá estudio di Beibel. April: Ofresé ehemplarnan lòs di tantu E Toren di Vigilansia komo ¡Despertad! Ora di rebishitá hende interesá, bishitá tambe hendenan ku sa asistí na Memorial òf otro eventonan teokrátiko pero ku no ta asosiá aktivamente ku e kongregashon. Ofresé prinsipalmente e buki Kiko Beibel Ta Siña Realmente? Nos meta mester ta pa kuminsá un estudio di Beibel den e buki ei.

◼ Kuminsando na febrüari, i no mas tardá ku 4 di mart, e diskurso públiko nobo pa superintendentenan di sirkuito lo ta “Ken Lo Kualifiká pa Drenta den Dios Su Mundu Nobo?”

◼ Den un Reunion di Sirbishi durante aprel nos lo konsiderá e DVD, Hóbennan Sa Puntra—Kiko Lo Mi Hasi ku Mi Bida? Si ta nesesario, mester hasi pedido p’e DVD aki via kongregashon mas pronto posibel.

◼ Nos literatura na chines ta ser publiká na dos tipo di lèter chines. Hende di Hong Kong i Taiwan por lo general ta lesa e tipo di lèter tradishonal, ku nos a yama “chines” (CH). Mayoria otro lektor chines normalmente ta lesa un tipo di lèter simplifiká ku nos ta referí na dje komo “chines simplifiká” (CHS). Komo ku e tipo di lèter ku un persona ta lesa no tin di haber ku si e ta papia kantones, mandarin òf kualke otro dialekto, ta importante pa saka afó ta kua tipo di lèter e ta preferá. Por usa e foyeto chikí Bon Nobo pa Hende di Tur Nashon, página 19-20, pa kompará i wak. Di e manera ei, publikadónan por hasi pedido di literatura ku tin e tipo di lèter korekto.

◼ Kongregashonnan mester hasi areglo apropiá pa tene e Memorial di e aña aki riba djaluna, 2 di aprel, despues ku solo baha. Maske e diskurso lo por kuminsá mas trempan, e pasamentu di e pan ku biña no mag kuminsá sino te despues ku solo baha. Konsultá ku outoridatnan lokal pa determiná ki ora solo ta baha den boso área. Ounke lo ta preferibel pa kada kongregashon tene nan propio selebrashon di Memorial, no ta tur biaha esaki ta posibel. Den kaso ku normalmente vários kongregashon ta usa e mesun Salòn di Reino, podisé un òf mas kongregashon por usa un otro fasilidat pa e anochi ei. Kaminda ta posibel, nos ta rekomendá un lapso mínimo di 40 minüt entre e programanan pa asina tur hende por benefisiá plenamente di poko asosiashon despues di Memorial. Tambe mester tene kuenta ku e asuntu di tráfiko i parkermentu; esei ta enserá kaminda pa baha pasahero for di outo òf pa rekohé nan. E kuerpo di ansiano mester disidí ki areglonan lo ta mihó lokalmente.

◼ Sekretarionan di kongregashon mester hasi sigur ku nan tin un karta di asignashon di pionero regular (S-202-PA) pa kada pionero regular den kongregashon. Si esei no ta e kaso, nan mester informá sukursal via karta.