Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 27 di ougùstùs 2007. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 2 di yüli te ku 27 di ougùstùs 2007.
KUALIDAT DI PAPIA
1. Kon nos por mustra rèspèt pa otro hende den nos sirbishi i den e kongregashon? [be-PA pág. 192 §2-4] Ora nos ta prediká na otro hende, nos no mester ta lihé pa korigí nan punto di bista robes; nos mester mustra rèspèt tambe dor di skucha nan ku pasenshi i tene kuenta ku nan sintimentunan. (1 Ped. 3:15) Nos por mustra rèspèt den kongregashon ora nos ta kòrda ku nos rumannan ta stima Yehova i ke sirbié. Nos oyentenan lo sinti ku nos ta respetá nan si nos ta inkluí nos mes entre esnan ku tin ku apliká loke e Skritura ta bisa i ta evitá di usa konstantemente e pronòmber personal “abo” òf “boso.”
2. Kiko ta nesesario pa nos por ekspresá nos mes ku konvikshon? [be-PA pág. 196 §1-3] Pa nos konvikshon keda bisto ta importante pa nos papia ku sinseridat i pa nos ta plenamente konvensí ku loke nos ta bisando ta bèrdat. Ora nos ta komprondé e informashon i ta ekspres’é den nos mes palabranan, esaki ta mustra ku nos ta konvensí ku loke nos ta bisando tin balor pa nos oyentenan.
3. Kua ta algun sugerensia ku lo yuda nos pa papia ku takto ora nos ta prediká na otro hende? [be-PA pág. 198 §1–pág. 199 §1] Purba kuminsá e kòmbersashon papiando di algu ku ta interesá e persona. Ora nos ta mustra interes den otro hende su opinion- i puntonan di bista, esaki lo yuda nos kòmbersá ku nan en bes di skual nan. Nos por puntra nos mes: ‘Ki impreshon loke mi ta bisa ta duna e otro persona?’ Esaki por yuda nos usa sano huisio i evitá di lanta opstákulonan innesesario. (Pro. 12:8)
4. Kon takto ta yuda nos determiná e momento apropiá pa bisa algu ora di duna testimonio na otro hende? (Pro. 25:11) [be-PA pág. 199 §2-4] Ounke kisas nos no ta di akuerdo ku tur loke e doño di kas ta bisa, nos no tin nodi ekspresá esei mesora kada bes ku su opinion no ta kuadra ku Beibel. (Juan 16:12) Tene pasenshi i no eksitá ora hende bin ku opheshon. Keda kalmu i konsiderá esaki komo un bon chèns pa konosé e manera di pensa di e persona.
5. Kon nos por mantené un tono positivo ora di duna diskurso? [be-PA pág. 203 §3–pág. 204 §1] Si nos tin sigur ku nos rumannan den fe kier agradá Yehova, loke nos ta bisa i e manera ku nos ta papia lo reflehá e konfiansa ei. (1 Tes. 4:9, 10; 2 Tes. 3:4, 5) Asta ora mester duna konseho pa korigí un asuntu, e diskurso por keda positivo si e diskursante pone mas énfasis riba e manera pa evitá mal kondukta i riba e protekshon ku e rekisitonan di Yehova ta brinda nos. (Sal. 119:1)
PARTI NUM. 1
6. Nos por bisa ku ta Ezekiel ta e eskritor di e buki ku ta karga su nòmber, i ku e buki aki ta outéntiko i ta pertenesé na e kánon di Beibel? [si-S pág. 133 §3] Sí. E buki di Ezekiel tabata inkluí den e kánon di tempu di Esdras i e ta aparesé den katalògnan den tempu di e promé kristiannan, prinsipalmente den e kánon di Orígenes. Loke ta duna prueba di su outentisidat tambe ta e similaridat remarkabel ku tin entre e símbolonan ku e buki aki i e bukinan di Jeremias i Revelashon ta usa.
7. Ki kualidat ta masha importante pa un persona por soportá inhustisia? [w05-PA 1/6 pág. 29 §4] Humildat ta masha importante. Un persona ku ta pensa ku e ta masha kos, probablemente lo no tolerá maltrato. Nos tin ku hasi esfuerso pa imitá Hesus, kende “a humiá su mes dor di bira obedesidu te na morto.” (Fil. 2:5, 8) Ademas, nos tin ku siña konsiderá otro hende komo “mas importante” ku nos, poniendo nan interesnan promé ku esnan di nos. (Fil. 2:3, 4)
8. Kiko nos por siña for di e kontesta ku Hesus a duna e saduseonan ora nan a hasié pregunta tokante e resurekshon? (Luk. 20:37, 38) [be-PA pág. 66 §4] Hesus tabata sa e punto di bista di e saduseonan; e tabata sa ku en realidat nan no tabata kere den resurekshon. P’esei ora el a rospondé nan pregunta, el a hasié di tal manera ku e kontesta a trata ku nan punto di bista ekiboká ku tabata e motibu pakiko nan a hasi e pregunta. Usando un rasonamentu maestral i un relato bíbliko konosí, Hesus a hala nan atenshon riba algu ku nunka promé nan no a para ketu na dje: evidensia kla ku Dios realmente ta bai resusitá e mortonan.
9. Ora un studiante di Beibel òf un ruman den fe puntra bo kiko e mester hasi den un sierto situashon, kiko bo mester kontest’é? [be-PA pág. 69 §4-5] Kada persona tin ku karga responsabilidat pa su propio desishonnan ku e tuma den bida. (Gal. 6:5) Un persona ku ta tuma su desishonnan pensando prinsipalmente pa komplasé esun ku ta siñ’é Beibel òf un otro persona, ta sirbiendo hende i no ta bibando pa medio di fe. (Gal. 1:10) Pues, ora bo ta yuda un persona haña kontesta pa su pregunta, e mihó kos pa hasi ta di hala e persona su atenshon na prinsipio- i ehèmpelnan bíbliko ku ta kuadra ku su pregunta, i puntr’é si e ta mira algu den nan ku lo por yud’é tuma un desishon sabí.
10. Kiko ser “renobá den e spiritu di [nos] mente,” ta enserá? (Efe. 4:23) [be-PA pág. 74 §4] Si nos ke “bisti e hende [òf “personalidat,” NW] nobo,” nos tin ku ta kultivá un inklinashon mental fuerte ku ta na armonia ku esun di Dios i di Kristu. (Efe. 4:23, 24) Pa logra esei nos tin ku apsorbá nan pensamentunan konstantemente. Ora nos ta studia e Evangelionan, nos mester mira e relatonan aki di e bida di Kristu komo un modelo pa nos sigui. Nos mester purba identifiká karakterístikanan spesífiko di Hesus su personalidat, anto hasi un berdadero esfuerso pa imitá nan den nos bida. (1 Ped. 2:21)
LESAMENTU SEMANAL DI BEIBEL
11. Ken e hòmber bistí na paña di lino den Ezekiel 9:2-4 ta representá, i kiko e marka òf “señal riba frenta” ta indiká? [w00-PA 1/1 pág. 11 §3; wt-PA pág. 124 §10] E hòmber bistí na paña di lino ta representá e grupo di kristiannan ungí ku ta riba tera aktualmente. Nan ta pone un marka simbóliko riba esnan ku ta bira parti di e “multitut grandi,” ku ta “suspirá i keha” pa motibu di tur e abominashonnan ku ta sosodé den kristiandat. (Rev. 7:9, 10, 14) E marka ta un indikashon ku e persona ta un hende dediká i batisá ku un personalidat manera esun di Kristu.
12. Den ki sentido lidernan religioso di kristiandat ta manera e “profetanan bobo ku [tabata] sigui nan mes spiritu,” deskribí na Ezekiel 13:3? [w99-PA 1/10 pág. 13] Meskos ku e lidernan religioso prominente i poderoso den tempu di Ezekiel, lidernan religioso di kristiandat no ta spièrta hende di Dios su binidero dia di huisio. Klero di kristiandat no ta splika ku Yehova su Reino establesí ta serka di intervení den asuntunan di tera. (Dan. 2:44) Ounke nan ta pretendé di papia den e nòmber di Dios, nan ta konta nan tounan loke nan ke tende.
13. Kiko e israelitanan tabata purba hasi ora nan tabata ekspresá e “proverbio” na Ezekiel 18:2, i ki lès importante tokante duna kuenta na Yehova ta ser enfatisá aki? [w88-S 15/9 pág. 18 §10] E israelitanan a purba di libra nan mes di e kulpa pa e kondishon desfaborabel ku e nashon tabata eksperensiando. Nan a pretendé ku nan tabata kosechá e konsekuensianan di maldat ku nan antepasadonan a kometé. Sin embargo, Ezekiel a señalá ku kada hende tabata responsabel pa su mes kondukta i ku lo e tabatin ku rindi kuenta na Yehova. (Eze. 18:20, 27-30)
14. Den ki sentido Ezekiel a bira “muda” durante e periodo ku sòldánan a rondoná Yerusalèm i despues destruyé? (Eze. 24:27; 33:22) [w03-PA 1/12 pág. 29] Ezekiel no a bira literalmente muda. Simplemente e no tabatin nada mas pa bisa relashoná ku Yerusalèm segun ku Yehova su huisio tabata ser ehekutá. Sin embargo, el a pronunsiá mensahenan di huisio relashoná ku e enemigunan di e pueblo di Dios ku a alegrá riba e kaida di Yerusalèm. (Eze. kapítulo 25-32) Despues, ora e notisia di e destrukshon di Yerusalèm a yega Babilonia, Ezekiel a profetisá tokante e restorashon ku lo a tuma lugá.
15. Ken ta “Gòg di tera di Magòg” i na ki tempu e ta lanta ku intenshon di destruí e pueblo di Yehova? (Eze. 38:2, 16) [w97-PA 1/3 pág. 14 §1–pág. 15 §3] Gòg di Magòg ta referí na Satanas e Diabel for di tempu ku el a ser saká for di shelu i bentá den bisindario di e tera. (Rev. 12:13, 17) E ta dirigí un koalishon di nashon, i lo lansa un atake total riba e pueblo di Yehova ku aparentemente ta indefenso despues ku Babilonia e Grandi a ser destruí. (Eze. 38:4-6, 8, 11, 15; Rev. 17:12-14) E atake aki lo kousa e inisio repentino di Armagedón, ora Yehova ta vindiká su soberania i reskatá su pueblo. (Eze. 38:21-23)