Un Muestra di Nan Fe!
1 E apòstelnan a skucha ku atenshon ora Hesus tabata papia tokante su presensia i e konklushon di e sistema di kosnan. Humanidat lo a bai eksperensiá susesonan ku ta kousa angustia—guera, skarsedat di kuminda, temblor i pèst. Hesus a sigui bisa ku hende lo odia su siguidónan, entregá nan na tribulashon i mata nan. Tambe el a bisa ku lo lanta profeta falsu i nan lo gaña hopi hende, i ku amor di hopi lo fria.
2 Ku e informashon ei na mente, e apòstelnan lo mester a keda sorprendí ora nan a tende Hesus bisa ku e bon nobo di e Reino di Dios lo ser prediká den henter mundu. (Mat. 24:3-14) Awe nos ta mira e kumplimentu remarkabel di e profesia eksitante aki. Apesar ku mundu ta peligroso, tòg, Testigunan di Yehova ta proklamá e bon nobo ku entusiasmo. Amor di mundu ta fria, pero nos amor sí ta manera un kandela ardiente. Apesar ku “tur nashon” ta odia nos, tòg nos ta prediká den kasi tur nashon.
3 No ta un animashon pa mira e aktividatnan di Testigunan di Yehova di e aña di sirbishi ku a pasa na página 3 pa 6? Pa 16 aña konsekutivo, nan a dediká mas ku mil mion ora den e trabou di prediká i hasi disipel. Ki un muestra di fe! Tabatin un oumento di 5,8 porshento den e kantidat di pionero; 3,1 porshento den e kantidat di publikadó; i 4,4 porshento den estudio di Beibel. Kompará ku e aña di sirbishi ku a pasa, tabatin un oumento di 20,1 porshento. Ta emoshonante pa mira ku kasi shete mion hende ta sirbiendo Yehova fielmente! Nunka den historia humano no tabatin asina tantu sirbidó! Kiko ta loke ta animá bo mas tantu ora bo wak e rapòrt?
4 Maske e sifranan ta impreshonante, nunka nos no mester lubidá ku nan ta representá hende ku a duna prueba di nan fe. Konsiderá un ehèmpel. Guillermo a nase na 1935 i a lanta na Bolivia. Na edat di nuebe aña, el a kuminsá traha den un plantashon di koka. E tabata traha hopi duru for di su infansia, i pa e haña alivio for di loke e tabata pasa aden, e tabata kou riba blachi di koka. Mas despues el a kuminsá huma sigaria i bebe di mas. Pero ora el a kuminsá siña kiko Yehova ta rekerí di dje, el a stòp di bebe di mas i di huma. E desafio di mas grandi tabata pa el a stòp ku e bisio ku e tabatin for di chikitu di kou riba blachi di koka. El a hasi orashon sin stòp i a vense e bisio aki. Despues ku su bisionan tabata tras di lomba, el a batisá. “Awor,” e ta bisa, “Mi ta sinti mi limpi i masha felis.”
5 Yehova realmente ta interesá den hende. Ta su deseo pa tur hende arepentí. (2 Ped. 3:9) E ta nos deseo tambe. Ohalá ku nos kurason por konmové nos pa hasi tur loke nos por pa sigui yuda hende sinsero siña konosé i stima Yehova meskos ku nos ta stim’é.
[Study Questions]
1. Ki susesonan ku ta kousa angustia Hesus a profetisá di dje?
2. Dikon ta remarkabel ku e bon nobo ta ser prediká rònt mundu?
3. Ki animashon bo ta haña ora bo wak e sifranan den e rapòrt mundial?
4. Ki problemanan un hòmber a vense pa e por a yega na boutismo?
5. Kiko ta nos deseo?