Kaha di Pregunta

◼ Kiko nos mester tene kuenta kuné si nos ke laga algun di nos propiedatnan òf tur kos mes pa e organisashon di Yehova ora nos fayesé?

Ora un hende muri, e no por disidí mas kiko ta pasa ku su kosnan material. (Ekl. 9:5, 6) Ta p’esei hopi hende ta traha un tèstamènt òf un dokumento legal ku ta splika kon nan ke pa repartí nan poseshon- òf propiedatnan. (2 Rei. 20:1) Generalmente, nan ta skirbi den e dokumento akí tambe ken lo keda enkargá pa repartí e herensia. Nan ta yama e persona ei e ehekutor di tèstamènt. Den hopi pais, ora un hende fayesé sin laga tèstamènt, lei ta disidí kon ta repartí su propiedatnan. P’esei, si nos tin un deseo spesífiko enkuanto kiko pa hasi ku nos propiedatnan (por ehèmpel, si nos ke laga algun di nos kosnan òf tur kos mes pa e organisashon di Yehova), ta importante pa nos traha un tèstamènt i skohe bon ken lo ta nos ehekutor.

E ehekutor di tèstamènt tin un responsabilidat serio. Dependiendo di e tamaño di e herensia, e trabou di reuní e propiedatnan i despues repartí nan por ta mará na trámitenan ku por tuma hopi tempu. Ademas, hopi biaha instansianan gubernamental ta stipulá proseduranan ku mester kumpli kuné. En bista di esaki, no ta kualke miembro di e kongregashon lo por ta un bon ehekutor. E persona ku nos skohe mester ta un persona ku nos sa ta kapas, konfiabel i dispuesto pa kumpli ku nos deseonan.—Wak e artíkulo “E Benefisionan di Plania Bo Herensia,” den e ¡Despertad! di 8 di desèmber 1998.

Si un Hende Pidi Bo pa Ta Ehekutor di Su Tèstamènt: Kiko si un hende puntra bo si bo ta dispuesto pa keda enkargá pa repartí su herensia? Promé ku tur kos, hasi sigur di kalkulá e gastu i, huntu ku orashon, analisá si bo por kumpli ku e responsabilidat akí. (Luk. 14:28-32) Ora e persona fayesé, abo tin e responsabilidat di notifiká e benefisiarionan. Despues ku bo risibí e outoridat nesesario, lo bo tin e responsabilidat di repartí e herensia di akuerdo ku lei i presis manera e tèstamènt ta bisa. Un ehekutor mester ta konsiente ku, sea e herensia ta grandi òf chikitu, e no por pasa por haltu di loke tin pará den e tèstamènt. Tur poseshon i propiedat ku un persona laga pa un entidat hurídiko di Testigunan di Yehova ta fondo dediká na Dios ku ta pertenesé na e organisashon di Yehova.—Luk. 16:10; 21:1-4.