E Leim di Kokolishi

Algun Zoólogo a tuma nota di e manera ku un kokolishi ta dal pega na baranka, na pir i bou di barku. Nan ta bisa ku e leim di e kokolishi ta mihó ku kualke leim sintétiko òf artifisial. Te ku resientemente, e manera ku e kokolishi ta pega na un superfisie muhá tabata algu deskonosí.

Pensa riba esaki: algun estudio a demostrá ku e larva òf e bichi ku ta bira kokolishi ta landa rònt i ta tèst vários superfisie promé ku e skohe un pa pega na dje. Ora ku e haña un lugá, e bichi ta produsí dos supstansia. E promé supstansia ta un líkido manera un tipo di zeta ku ta kita e awa for di riba e superfisie ku el a skohe. E zeta akí ta prepará e lugá pa e por usa e di dos supstansia ku ta konsistí di algun proteina ku nan ta yama phosphoproteins.

E dos supstansianan akí huntu ta bira un leim asina fuerte ku ni bakteria no por destruyé. Ta masha importante pa e leim akí ta resistente, pasobra e kokolishi lo keda pa restu di su bida pegá na e lugá ei.

E produkshon di e leim akí ta mas kompliká ku loke hende a pensa promé. Un miembro di e tim ku a deskubrí e proseso pa traha e leim a bisa: “Esaki ta un solushon natural masha sabí pa resolvé e problema di ekseso di awa riba un superfisie.” E deskubrimentu akí por yuda e investigadónan traha un leim ku nan por usa bou di awa i tambe leim sintétiko pa usa den industria elektróniko i implante médiko.

Kiko abo ta pensa? E leim di e kokolishi, ta kasualidat òf diseño?