Hóbennan Sa Puntra . . .

Mi Mag Bai na Concierto di Rock?

Un banda famoso di rock ta toca den bo becindario. Carchi pa entrada ta bende lihé, pues, bo tin cu dicidí un bes. Bo ta bai?

MUSICA saludabel den un ambiente apropiado por ta gososo. En todo caso, Jehova Dios a crea nos cu e don di disfrutá di música, i un gran cantidad di música ta aceptabel p’e.

Den hóbennan djawe, e música cu nan ta scoge ta generalmente música di rock den cualkier di su variedad di forma. Hopi hóben ta gust’é mas ora cu e ta ser tocá ‘live.’ No obstante, entre otro cosnan, informe di violencia i conducta salbahe na concierto di rock ta lanta pregunta serio pa hóbennan temeroso di Dios. Exactamente kico ta sosodé na concierto di rock? Ta un bon idea pa asistí na concierto asina?

Purbando e Música

Promé, laga nos considerá e música mes. Música por expresá—i instigá—un variedad grandi di emocion. Den tempu bíblico, e pueblo di Dios a usa música hopi bes pa expresá nan amor pa Dios. (Salmo 149:3; 150:4) Música tabata usá tambe pa expresá goso, excitacion, i tristesa. (Génesis 31:27; Huesnan 11:34; 1 Samuel 18:6, 7; Mateo 9:23, 24) Pero, lamentablemente, música no tabata semper saludabel ni den tempu bíblico. Música bárbaro i sensual por a hunga un papel instigando algun israelita pa peca ora e nacion tabata acampá n’e Ceru di Sínai.—Exodo 32:1-6, 17, 18, 25.

Berdaderamente, hopi música di rock tambe ta promové cos malu—inmoralidad sexual, droga, rebelion, i spiritismo. Esei no necesariamente kier men cu bo tin cu condená música, pero e Bijbel sí ta bisa hende cristian pa “sigui sigurá boso di loke ta aceptabel pa Señor.” (Efesionan 5:10) P’esei, bo tin cu haci bon scogementu i usa dicernimentu en cuanto música.a

Con bo scogementu di música ta afectá bo? E ta hací bo sintí bo felis, calmu, of trankilu? Of e ta hací bo sintí bo rabiá, rebelde, of deprimí? Un homber cristian na Dinamarca ta corda e tempu cu e tabata un fanático di heavy metal, esta, un forma di música di rock. E ta bisa: “Mi tabata scuch’é durante trabou. I si mi a haci fout, mi tabata rabia asina tantu cu mi tabata machicá e cos cu mi tabata traha i tir’é afó den un atake di rabia!” Un otro hóben a admití: “Mi a scucha hopi rap i heavy metal cu a glorificá sex i un moda di biba mundano. Tal música a instigá mi mente, i e resultado tabata un deseo ardiente p’e cosnan cu nan a mencioná den nan cantamentu.” Awor, si un simpel grabacion por tene asina un efecto, corda e poder di música ‘live.’

Tuma na cuenta tambe: Exactamente ki duru nan ta toca? Ta cierto cu hende tin diferente preferencia en cuanto esei. I e Bijbel no ta condená música na un nivel razonablemente haltu. Sí, na dedicacion dje tempel di Sálomon, e tocadornan di trompet so tabata 120 na cantidad! (2 Crónicanan 5:12) Esei mester tabata impresivamente duru! Sin embargo, tin un mundu di diferencia entre un gritu duru di alabansa pa Dios i música di rock cu ta hací bo surdu. Nan ta toca música di rock duru hopi bes pa instigá un spiritu di desenfreno salbahe. Pero e Bijbel ta condená “paranda,” of “fiesta bárbaro.” (Galationan 5:21; Byington) I cu respet pa bo curpa bo ta evitá di scucha música tocá asina duru cu bo ta risca daño na bo oido.—Romanonan 12:1.

Un otro punto pa tuma na cuenta ta pará skirbí den Job 12:11. E Bijbel ta puntra ei: “Bo oido no ta purba palabra mescos cu bo lenga ta purba cuminda?” Na armonia cu esei, bo mester “purba” letra di cantica! Un hóben cristian a admití: “Mi a cuminsá scucha letra di algun cantica cu mi tabata gusta, i pa mi sorpresa nan no tabata apropiado pa hende cristian scucha. Mi a haña cu tabata necesario pa deshací di tal música.” (1 Corintionan 14:20; Efesionan 5:3, 4) Un advertencia di antemano, tambe, hopi músico ta usa concierto pa promové nan disco mas recien—música cu ta mashá distinto di nan música mas bieu cu tal bes ta mas saludabel.

Ademas, bo tin cu keda sigur cu e música no ta manchá cu demonismo—algu specialmente prominente den algun forma di música di heavy metal. Banda di heavy metal ta famoso pa nan bistí i album cu símbolonan demoniaco i accesorionan satánico. (Santiago 3:15) Asistencia na un concierto di un grupo asina apénas por agradá Dios, cu ta manda nos “oponé e Diabel”!—Santiago 4:7.

Fuera di Control

Kico por sosodé n’e concierto mes? Un hobencita yamá Stacey a bai cu su amiganan pa mira un banda di rock cu nan a kere a toca música relativamente inocente. Pero net durante e concierto, e cantante principal dje banda a imitá un sesion spiritista i a invitá público pa participá den esfuerso pa haci contacto cu e mundu spiritista! Djis un truco? Kisas. Pero, siendo cu e Bijbel ta condená spiritismo den cualkier forma, Stacey i su amiganan a sinti nan obligá di bandoná e lugá.—Levítico 19:31; Deuteronomio 18:10-13; Revelacion 22:15.

Otro hóbennan cristian tabatin experencia igualmente spantoso, pasobra aunke spiritismo abierto por ta relativamente raro pa concierto di rock, conducta fuera di control ta comun. Na un concierto e banda di rock a yuda instigá un multitud desordená cu a resultá den 60 herido i mas cu US$200.000 di daño! Pero, na un otro concierto, tres hóben a muri aplastá. Ta cierto cu e mayoria di concierto di rock no ta resultá den un multitud desordená, ni herido, ni morto. Pero, tin un necesidad claro pa cautela. Proverbionan 22:3 ta bisa: “Astuto ta esun cu a mira calamidad i ta procedé di sconde su mes, pero hende sin experencia ta sigui numa i mester sufri castigu.”

Pues, si bo ta pensa di asistí na un concierto, poné bo na altura dje echonan. E banda tin e fama di ser instigador di conducta fuera di control? Ki sorto di hende e banda ta atraé? (1 Corintionan 15:33) Te na ki grado tin uso di alcohol i droga? I kico dje sitio mes dje concierto? E tabatin problema den pasado cu siguridad? Ki areglo tin pa asiento? Ora hende no ta asigná na un cierto asiento, e posibilidad di ser heridá ta aumentá mashá.

Tin epidemia di abusu di droga i alcohol na concierto di rock. Segun un homber cristian desilusioná cu a asistí na un concierto di un banda di rock tradicional den su hubentud, “Hende no ta bini pa scucha música, nan ta bini pa bebe burachi.” El a dicidí cu esei tabata su último concierto di rock. Un hobencita cristian a informá di igual manera: “Mi ta corda cu mi a bai na un concierto unda banda ‘progresivo’ tabata toca. E tabata mashá teribel! Hende tabata huma marihuana. Nan a usa palabra mashá malu, i hopi hende a parce adorador di Satanas debí na nan manera di bisti.” Asta unda droga i alcohol ta vigorosamente prohibí, no ta raro pa hopi hende den e multitud yega burachi caba. Asistencia na un asuntu asina por posiblemente ser na armonia cu e mandamentu bíblico di “rechasá maldad i deseo mundano i biba cu sano huicio”?—Tito 2:12.

Influencia di Ambiente

Sin embargo, bo por kere cu bo no tin cu preocupá bo tocante con hende rond di bo ta actua tan tempu cu bo mes no ta participá den e violencia. Pero, e ambiente sí ta afectá bo. Na Efesionan 2:2, e Bijbel ta mencioná e “autoridad di laira, e spiritu cu ta obra awor den e yunan di desobedencia.” Ripará cu mundu tin un “spiritu,” of actitud mental dominante. E ta na tur parti, tantu prevalente como e aire mes. Pero, ripará tambe cu tal spiritu, of actitud, tin “autoridad”—e poder pa cambia bo pensamentu, sintimentu, i conducta—si bo ta poné bo na contacto cuné! Bo simplemente no por respirá tal aire sterki sin cu e afectá bo.

Den mayoria caso di concierto di rock, bo ta na contacto total cu e spiritu di mundu. Ta fácil p’e ambiente ruidoso cu generalmente ta prevalecé dominá bo—of bo ta keda dominá tambe p’e gritamentu i saludo duná na músiconan cu ta casi mescos cu adoracion. Demasiado admiracion asina ta contrario cu e adoracion cu ta pertenecé hustamente na Dios. E ta igual cu idolatria, algu cu e Scritura ta condená abiertamente. (1 Corintionan 10:14; 1 Juan 5:21) Bo kier core e rísico di ser hibá huntu cuné?

Siguramente casi tur concierto di rock ta enbolbé rísico cu ta cancelá cualkier beneficio cu hende por gana dor di asistí na nan. Naturalmente, bo mayornan tin cu tuma e decision final en cuanto si nan lo permití bo bai na un cierto concierto. Pero, si bo tin e libertad di tuma bo mes decision, usa sabiduria. Tin hopi diferente manera pa bo dibertí cu ta saludabel i cu no ta encerá rísico di bai na concierto di rock.

[Nota]

[Plachi na página 26]

Alcohol, droga, i conducta salbahe ta presente cada bes na conciertonan di rock