Un Klechi pa Tempu di Friu

BO NUNCA a para mira, encantá, e caimentu di sneu? Si bo a mir’é, sin duda bo ta confirmá cu esei ta un dje bistanan di mas bunita i trankilu—specialmente si bo ta paden unda cu tin siguridad i calor i no tin motibu urgente pa sali. Miéntras cu e klechi blancu aki ta bira mas pisá, ta parce cu e ta plama un pas i trankilidad profundo na tur parti. Miéntras cu pidacito di sneu ta cai suavemente na miyones, e ta dof asta ruido di stad.

Sin embargo, no ta asombroso cu algu aparentemente asina suave manera caimentu di sneu por bira destructivo? Stad druk tal como New York—hopi bes yamá “e stad cu nunca ta drumi”—por ser paralisá humiyantemente si sneu montoná suficientemente haltu.

No ta straño, anto, cu Dios a puntra e homber fiel Job: “Bo a drenta den e depósitonan di sneu, of bo sikiera ta mira e depósitonan di piedra di ijs, cu mi a warda p’e tempu di afliccion, p’e dia di pelea i guera?” (Job 38:22, 23) Bou di control di su Creador, Jehova Dios, sneu por ta un arma formidabel en berdad.

No obstante, hopi bes sneu ta hunga un papel conserbando bida en bes di introducí destruccion. Por ehempel, Bijbel ta bisa cu Dios “ta duna sneu manera lana.” (Salmo 147:16) Di ki manera sneu ta manera lana? Bijbel ta usa sneu i tambe lana pa representá blancura i puresa. (Isaías 1:18) Pero, tin un otro similaridad importante. Tantu sneu como lana ta sirbi como aislador. The World Book Encyclopedia ta bisa: “Lana . . . ta aisla tantu contra friu como contra calor.” I World Book ta bisa tocante sneu cu e tambe “ta sirbi como bon aislador. Sneu ta duna proteccion contra aire friu di winter na mata i bestia drumí bou di dje.”

Pues, e siguiente bes cu bo ta mira sneu cai for di cielu, bo por corda e poder asombroso di Dios. Of bo por dicidí di corda e proteccion suave cu Dios ta duna ora e ta habri un klechi blancu riba su creacion, manera un mayor amoroso ta cubri un yu den cama cu klechi p’e sintié protehá.