Hóbennan Sa Puntra . . .

Mi Mester Bira Miembro di un Club Deportivo?

UN ARTICULO den e revista Seventeen a puntra: “Pakico ta tantu importante pa ser miembro di un club?” Dunando un contesta, e artículo a bisa: “Boso ta trahando huntu pa cumpli cu un doel comun, p’esei boso realmente ta bira amigu íntimo. Tambe, boso ta siña con pa trata cu otro hende, tal como resolvé problema cu un grupo, con pa ser flexibel i mustra consideracion, i con pa haci compromiso.”

Pues, ta parce cu wega di deporte organisá tin beneficio, lo mínimo di locual ta diberticion i ehercicio.a Algun hende asta ta bisa cu wega cu club deportivo ta yuda un persona desaroyá caracter. P’esei, un liga di baseball di hóbennan tin e lema, “Caracter, Curashi, Lealtad.”

E problema ta cu, deporte organisá no semper ta cumpli cu tal ideal noble. Segun e buki Kidsports: “Den algun caso hóbennan impresionabel ta siña usa palabra malu, usa fraude, bringa, intimidá, i heridá otronan.”

Gana, Cueste Loke Cueste?

Un artículo den Seventeen a admití: “Tin un banda scur di deporte, unda hende ta duna ganamentu un balor tremendo.” Esei ta contradicí directamente e palabra bíblico: “Laga nos no bira egotista, instigando competencia un cu otro, envidiando otro.” (Galationan 5:26) Aunke un tiki competencia amistoso por haci un wega mas interesante i gososo, demasiado spiritu di competencia por cria enemistad—i daña e goso dje wega.

Jon, un ex-hungador di futbol den scol secundario, ta corda: “Nos tabatin e coach aki cu tabata un berdadero maniak, cu semper a grita i a zundra nos . . . Mi no tabatin gana di bai pa entrenamentu . . . Mi a sintí mi como si mi tabata den un campo di concentracion.” Aunke tur coach no ta abusivo, hopi sí ta pone demasiado énfasis riba ganamentu. Un autor a concluí: “Hopi atleta . . . ta yega e punto unda e carga insoportabel di gana ta eliminá e goso di competí.” Kico por ta e resultado?

Science News a informá tocante un investigacion cu a mustra cu den hungador di futbol i di basketball den colegio, “12 porciento di nan a informá di problema den por lo ménos dos di cincu categoria: pena sicológico, pena físico, dificultad di evitá droga of alcohol, abusu mental i físico, i poco progreso den klas.” En cuanto e mésun asuntu, e buki On the Mark a informá: “Casi tur hende conectá cu atletismo organisá ta afirmá cu tin un problema grandi den abusu di droga den deporte di tur categoria.”

Compromiso Moral

E presion pa gana por causa un hungador hóben comprometé tambe normanan razonabel di husticia i onrades. E buki Your Child in Sports ta bisa: “Den e mundu di deporte moderno, ganamentu no ta solamente bon sino ta e único cos aceptabel. Perdementu no ta solamente malu sino ta inaceptabel.”

Un otro realidad penoso: Hopi bes coachnan ta pone hungadornan bou di tremendo presion pa heridá nan opositornan. Un artículo den Psychology Today a bisa: “Pa logra den deporte, bo tin cu ser un mal hende. Of esei ta loke hopi atleta, coach i fanático di deporte ta kere.” Un hungador profesional di futbol a bisa cu den su personalidad normal e ta “papia suave, ta mustra consideracion i ta cariñoso.” Pero, riba veld di bala, e ta bira diabel. Describiendo su personalidad riba veld di bala, e ta bisa: “E ora ei mi ta cruel i malicioso. . . . Mi ta asina bestial. Mi ta falta respet totalmente p’e homber cu mi ta bai golpia.” Hopi bes coachnan ta crea un disposicion asina.

E Bijbel ta consehá hende cristian: “Bisti boso cu e tierno cariño di compasion, bondad, humildad di mente, suavedad, i gran pacenshi.” (Colosensenan 3:12) Bo por cultivá cualidad asina si bo ta ricibí conseho diario cu ta animá bo pa heridá, machicá, i manca bo opositornan? Robert, di dieseis aña di edad a admití: “Mi a hunga den deporte organisá. No ta importá bo ken bo ta heridá tan tempu cu bo ta gana.” Awor cu e ta un cristian bautisá, su punto di bista a cambia. E ta bisa: “Lo mi nunca bolbe haci esei.”

Entrenamentu Físico of Daño Físico?

Tampoco, no pasa por haltu di rísico físico. Ta cierto cu deporte ta encerá rísico asta ora bo ta hunga cu amigu estrictamente pa dibertí. Pero e peliger ta aumentá mashá ora hóbennan ta ser entrená pa purba di hunga casi na nivel di hungador profesional.

E buki Your Child in Sports ta bisa: “Hungadornan profesional por haña herida. Pero nan ta masha capas, den bon estado físico, i ta adulto maduro cu ta core e rísico boluntariamente di herida i ta bon pagá pa hacié. Ademas, generalmente nan ta ricibí e clase di entrenamentu di mas mihó i di mas experto, e mihó ekipo, i e mihó cuido médico di vários specialista cu ta para cla. . . . Mucha di scol no tin tal bentahanan.” Hende cristian ta ser consehá pa ‘presentá nan curpa como un sacrificio bibu, santu, i aceptabel pa Dios.’ (Romanonan 12:1) Bo no mester considerá cuidadosamente corementu di rísico físico innecesario of irazonabel?

Otro Factornan pa Considerá

Asta ora e rísico di salú ta mínimo, deporte organisá ainda ta ocupá hopi tempu. Tempu pa entrená no solamente ta horta tempu for di bo bida social sino tambe por horta hopi tempu for di loke bo mester dedicá na estudio i huiswerk. Science News a bisa cu atleta di colegio tin e tendencia di ricibí “marca un poco mas abou” cu otro alumnonan cu ta participá den actividadnan fuera di scol. Mas importante, bo por haña cu wega di club deportivo ta haci mas dificultoso pa bo haci loke e Bijbel ta yama “e cosnan mas importante”—interesnan spiritual. (Filipensenan 1:10) Puntra bo mes, ‘Si mi ta bira miembro dje club, mi mester perde reunion cristian, of lo e limitá mi tempu dedicá n’e trabou di predicá?’

Considerá cuidadosamente, tambe, e posibel resultadonan di pasa hopi tempu cu hóbennan i adultonan cu no ta kere loke mi ta kere tocante moralidad, papiamentu decente, of competencia. Di tur manera e Bijbel sí ta bisa cu “mal asociacion ta daña custumber útil.” (1 Corintionan 15:33) Por ehempel, considerá un artículo deportivo den The New York Times: “Baño dje gimnasio . . . ta un lugá unda homber ta papia tocante curpa di muher usando palabranan sexual gráfico, unda nan ta gaba tocante ‘conkista’ i ta chansa tocante golpiamentu di muher.” Con lo para cu bo spiritualmente si bo ta scoge di ser presente den un ambiente asina?—Compará cu Santiago 3:18.

Tumando un Decision Sabí

Bo ta pensa di bira miembro di un club deportivo? Anto tal bes e relato anterior por yudá bo calculá e costo di hacimentu di dje. Tuma na cuenta e concenshi di otro hende ora bo ta tuma bo decision. (1 Corintionan 10:24, 29, 32) Naturalmente, nos no por traha regla estricto i incambiabel, ya cu circunstancianan ta varia den tur e mundu. Algun scol asta ta exigí pa alumnonan participá den deporte. Pero, si bo ta keda dudoso, papia riba dje cu bo mayornan of cu hende cristian maduro.

Hopi hóben cristian a tuma e decision dificultoso di no bira miembro di club deportivo. Esei no ta fácil si bo ta atleta i realmente ta gusta deporte! Presion di parti di maestro, coach i mayornan por aumentá e frustracion. E hóben yamá Jimmy a admití: “Mi ta haña cu mi mester lucha cu mi mes pa no hunga. Mi tata no-creyente tabata un bon atleta ora e tabata bai scol. Tin bes cu ta dificultoso pa mi no bira miembro di un club.” Sin embargo, e apoyo di mayornan creyente i di cristiannan maduro den e congregacion por haci hopi pa yudá bo cumpli cu bo decision. Segun Jimmy: “Mi ta gradicidu na mi mama. Tin bes cu mi ta bira deprimí bou di presion di participá den deporte. Pero, mi mama t’ei tur ora pa hací mi corda e berdadero meta di mi bida.”

Deporte di club por siña hungador cooperacion i con pa resolvé problema. Pero, tin oportunidad amplio pa siña tal cosnan trahando den e congregacion. (Compará cu Efesionan 4:16.) Deporte cu e club por ta un goso tambe, pero bo no tin cu ser miembro di club pa disfrutá dje wega. Bo por disfrutá di algun deporte cu amigu cristian den curá of riba veld local. ‘Buitendag’ cu e famia tambe por ta oportunidad pa wega saludabel. Segun Gregorio di 16 aña di edad: “Ta hopi mas mihó pa hunga cu otronan di bo congregacion. Nos ta hunga pa dibertí, i ta huntu cu bo amigunan!”

Ta cierto cu wega cu amigunan so probablemente lo no emocioná bo manera ora di hunga den un club ganador. Pero, no lubidá, e mayor probecho di “entrenamentu corporal ta beneficioso pa poco; pero debocion piadoso ta beneficioso pa tur cos.” (1 Timoteo 4:8) Desaroyá debocion piadoso, i lo bo berdaderamente ser un ganador den bista di Dios!

[Nota]

[Komentario na página 22]

“Nos tabatin e coach aki cu tabata un berdadero maniak, cu semper a grita i a zundra nos . . . Mi no tabatin gana di bai pa entrenamentu”

[Plachi na página 23]

Demasiadamente, coachnan ta exigí ganamentu—asta si esei ta nificá causa herida na otro hungadornan