Adopcion—Con e Ta Toca Ami?

CLARAMENTE problema por presentá si e pareha cu ta haci adopcion divorciá of si unu di nan muri. Pero hopi bes e mucha adoptá ta sinti mas presion cu tur. Pakico?

E mayoria di nos sa ken ta nos mama i tata. Asta si nan por a muri ora nos tabata chikitu, nos tin memoria, of probablemente potret, pa mantené un relacion. Pero, kico di un mucha presentá pa adopcion pronto despues di nacementu? E agencia di adopcion tin informacion dje mama, pero hopi bes tal informacion no ta hací disponibel te cu e mucha yega edad legal. Den otro caso, e mama ta pone su mes nomber riba e certificado di nacementu pero no e nomber dje tata. Algun mucha ta baby bandoná i ta ser descubrí despues cu e mayornan desconocí a bandoná nan. Mucha den tur e situacionnan aki asina ta falta rais—nan por sinti nan desconectá for di nan pasado of orígen.

Ki Firme?

Palu tin mester di rais hundu pa para firme. Un taki nobo geënter den e troncon maduro por florecé bon, pero tambe e por seca i keda sin producí fruta. Di igual manera, aunke tata i mama cu ta adoptá mucha duna nan tur cuido i dedicacion amoroso posibel, algun mucha nunca ta recobrá dje golpi di cortamentu for di nan rais original.

Considerá Catarinaa cu a nace di mayornan di Antianan. Un pareha blancu a adopt’é ora e tabata un yu chikitu, a cuid’é i a stim’é, pero e nunca por a aceptá i trata cu su situacion nobo. Na edad di 16 aña, el a bandoná cas i no a bolbe nunca mas. Ya caba amargura a bira odio irazonabel. El a puntra, “Pakico mi mama a duná mi na boso?” Lamentablemente, e famia aki nunca por a establecé un relacion di famia.

Marvin tabata entregá na cuido di autoridad local na su nacementu i tabata pasá na tata i mama di criansa. Nan a adopt’é n’e edad di nuebe luna. Su pasado insigur desde principio, huntu cu rencor ardiente debí na rasa bruhá, a bira un actitud di rebelion resultando den hopi dificultad pa su mes i duele profundo pa su mayornan adoptivo, cu a haci asina tantu p’e. Su mama a bisa: “Si hende pidi mi conseho tocante adopcion, lo mi bisa awor, ‘Pensa hopi tempu riba dje promé.’”

Na contraste, considerá e experencia di Roberto i Silvia. Nan tabatin un yu i no por a haña mas. Hende a puntra nan, “Boso nunca a considerá adopcion di un mucha di otro nacionalidad?” Pronto nan a adoptá Mak-Chai, un baby mucha muher di nuebe luna di edad di Hong Kong. Segun Mak-Chai, “Hopi bes mi ta puntra pakico mi tabata bandoná i si mi no tin ruman homber i muher. Pero mi ta kere cu mi ta mas pegá cu mi mama i tata adoptivo cu hopi yu natural. Si mi por a conocé mi mayornan biológico, esei lo no a haci hopi diferencia, kisas yudá mi comprendé un poco mas algun característica di mi.” Su mayornan di criansa ta recomendá adopcion? Nan ta bisa cu “sí, pasobra pa nos esei tabata un experencia maraviyoso!”

Motibu pa Cautela

Graham i Ruth a adoptá dos yu chikitu, un mucha homber i un muher, pa compañá e yu homber i muher di nan mes. Tur cuater yu a ser criá como un solo famia uní den un ambiente felis. Segun Ruth, “Tur nos yunan a sali for di cas hopi aña pasá i a sigui nan mes caminda. Nos ta mantené contacto regularmente i ta stima nan tur.” Pero, lamentablemente, tur dos yu adoptá tabatin problemanan serio. Pakico?

Segun Graham, “Nos dokter a bisa nos cu ambiente ta di sumo importancia pa yu.” Pero, awor Graham ta kere cu inclinacion heredá tambe ta un factor principal. El a sigui: “Ademas, kico di salú dje mama durante cu e ta na estado? Nos sa awor cu droga, alcohol i tabaco, por afectá yu den barica. Mi ta recomendá un investigacion completo dje dos mayornan, i asta di abuelo si ta posibel, promé cu bo haci adopcion.”

E mama di Pedro a casa cu otro homber, i Pedro a sufri di abusu físico i mental for di su tata di criansa. N’e edad di tres aña, nan a entregu’é pa adopcion. Pedro a bisa: “Mi a rechasá mi mayornan adoptivo mesora despues di a sali for di corte.” El a agregá: “Mi a destruí tur cos den mi poder. Ora mi pega soño, mi tabatin nachtmerrie horibel. Recordando awor, mi por mira ki molestiá mi tabata. Despues cu mi mayornan adoptivo a divorciá tambe, cosnan a bai di malu pa pió pa mi—droga, ladronicia, vandalismo, paranda diario.

“N’e edad di 27, mi no por a mira ningun motibu pa sigui biba i a considerá suicidio. Anto un dia un hende straño a duná mi un tratado bíblico cu a bisa cu pronto e tera lo ser un paradijs. E mensahe a atraé mi. El a parce e berdad. Mi a cuminsá lesa i studia e Bijbel i a cuminsá haci cambio den mi bida i caracter, pero bes tras bes mi a cai bek na mi bida di ántes. Despues di hopi animacion i asociacion cristian útil, awor mi ta sintí mi mas felis i sigur den e sirbishi di Dios cu mi por a imaginá poco aña pasá. Ademas, mi por a rebibá un relacion amoroso cu mi mama, locual ta gososo.”

Enfrentando e Realidad

Den e asuntu di adopcion, emocion ta intenso. Amor i gratitud extremo ta ser expresá huntu cu amargura i ingratitud. Por ehempel, Edgar Wallace nunca a pordoná su mama cu a bandon’é, locual ta loke e ta yama e mama su accion. Su mama a bishit’é durante e último aña di su bida, buscando yudansa financiero contra su boluntad, pero Edgar, aunke e tabata ricu, a nenga bruscamente di yud’é. Pronto despues, ora el a tende cu su mama lo a ser derá den graf di hende pober si no tabata pa amigunan cu bondadosamente a paga pa su entiero, Edgar a sinti un duele profundo pa su falta di amor.

Hende cu ta considerá adopcion mester ta prepará pa enfrentá realísticamente problema i desafio cu por presentá. Yunan no ta semper gradicidu pa loke nan mayornan—sea adoptivo of natural—ta haci pa nan, asta den e mihó circunstancia. Realmente, e Bijbel ta mencioná hende di nos tempu como “sin cariño natural” i como “malagradecidu” i “desleal.”—2 Timoteo 3:1-5.

En cambio, habriendo bo cas—i bo curason—na un mucha cu tin mester di mayornan por ta un experencia positivo, i recompensador. Por ehempel, Cathy ta profundamente gradicidu na su mayornan adoptivo cu a dun’é un famia cristian i a atendé na su necesidad físico i spiritual.—Mira e cuadro “Adopcion A Sali Bon pa Nos,” página 8.

Ora e mayornan ta splica con nan ta sinti nan tocante nan yu homber of muher adoptivo, nan por wel corda e palabra dje salmista: “Yunan ta un don di Señor; nan ta un berdadero bendicion.”—Salmo 127:3, Today’s ­English Version.

[Nota]