Ai, Ki Dushi Lo Ta pa Haña Aire Puru!

DJE CORESPONSAL DI SPIERTA! NA INGLATERA

ORA bo ta hala rosea, bo ta respirá aire puru? Contaminacion di aire djawe ta “un enemigu pió cu humamentu,” segun un médico citá den The Times di Londen. Na Inglatera i Gales, aire contaminá ta mata, segun calculacion, 10.000 hende tur aña. Mundialmente, specialmente den stadnan grandi, e situacion ta serio.

Hopi hende ta acusá e industria di auto pa contaminacion dje atmósfera. Pa reducí gas peligroso, vehículonan nobo den hopi pais ta yega awor cu instalacion di conbertidor catalítico, cu ta reducí contaminacion. Hidrocarburo den gas di motor a baha te na 12 porciento dje nivel di 1970, cu reduccion similar di nitro oxide i koolmonoxide. Babynan den garoshi ta specialmente vulnerabel pasobra nan ta drumi na nivel cu auto ta saca gas. Pero, contaminacion di aire ta un peliger pa hende den auto tambe. Segun informe, contaminacion ta tres bes mas haltu paden di auto cu pafó. Mas peliger ta bini di respiracion di gas di benzeen di combustibel ora bo ta yena e tanki di gasolin.

Segun un informe di datos dje medio ambiente di 1993-1994 di Nacionnan Uní, e forma mas prevalente di contaminacion di aire mundialmente ta “Stof Fini Flotando na Laira.” Aparentemente, pida fini di carbon, of di stof fini por penetrá hundu den pulmon i laga ei kímico perhudicial.

Destruccion di capa di ozon na haltu riba tera ta e tema di hopi comentario di prensa. Sin embargo, na nivel dje tera rayonan di solo ta afectá nitro oxide i otro gas di contaminacion di aire pa producí nivel haltu di ozon. E nivelnan aki a redoblá na Inglatera durante e siglo aki. E gasnan aki ta daña verf i otro material di construccion, ta causa malesa den palu, mata, i cosechanan, i ta parce di producí problemanan di respiracion den algun hende. Aunke e mayor parti di contaminacion di ozon ta sosodé den stadnan, ta un sorpresa cu hende di campo ta sufri di efecto mas malu. Den stad, nitro oxide ta absorbá e exceso di ozon, pero unda cu no tin hopi di tal oxide, ozon tin un rienda liber pa causa daño.

Ademas, contaminacion di aire ta “te na 70 bes mas haltu den cas cu den aire liber,” segun The Times. Tin gas di ‘air freshener,’ kanfer, i asta paña di ‘dry clean’ ta contaminá aire. Huma di cigaria tambe ta aumentá peliger pa salú den cas.

Pues, kico anto bo por haci pa protehá bo famia? The Times di Londen a ofrecé e siguiente sugerencianan.

• Usa bo auto ménos. Si ta posibel, bai cu otro hende. Core suavemente. Si bo pega den tráfico of pa otro motibu ta keda pará pa mas cu un par di minuut, paga e motor. Si ta posibel, stacioná bo auto den sombra, pa reducí contaminacion cu evaporacion di combustibel ta producí.

• Haci ehercicio mainta trempan ora nivel di ozon pafó generalmente ta abou.

• Prohibí humamentu den bo cas.

• Habri bentana di kamber un poco anochi pa reducí humedad i saca alergeno afó.

Sin duda abo tambe ta di acuerdo: Ai, ki dushi lo ta pa haña aire puru!