Enfrentando un Emergencia Médico

“LO MI ta franco cu bo; loke bo tin ta un tumor maligno. Si nos no sak’é pronto, lo e haci daño na otro órganonan vital. P’esei mi ta recomendá kitamentu di bo pia completo.”

E palabranan dje dokter a dal mi, manera nos ta bisa aki na Perú, manera un hember di awa friu. Mi tabatin solamente 21 aña di edad. Un luna promé mi a cuminsá sinti dolor den mi rudia robes i nan a tratá mi pa reumatismo. Sin embargo, dentro di poco dia, mi no por a para mes riba mi pia.

N’e tempu ei, mi tabata sirbi como un evangelisador di tempu completo di Testigonan di Jehova den Andes den central di Perú. Despues di a bolbe na mi pueblo natal di Huancayo, mi mama a compañá mi bahando n’e stad di Lima na costa. Ei, dia 22 di juli di 1994, mi a drenta e mihó hospital di cancer den e pais, unda mi a tende cu mi enfermedad ta yamá osteosarcoma.

Un Asuntu di Concenshi

Pronto nan a informá mi cu e hospital no ta haci operacion sin usa sanger. Un dokter asta a bisa: “Mi ta preferá pa bo muri na cas pa mi no keda responsabel pa bo morto dor cu bo ta nenga transfusion di sanger.” Pero e Comité di Contacto cu Hospital (CCH), un grupo di Testigonan di Jehova cu ta promové cooperacion entre hospital i pashent, a media pa mi. Como resultado, e ciruhano principal dje hospital a duna permiso pa cualkier dokter dje hospital operá si e kier aceptá e desafio. Un dokter a keda dispuesto, i mi tabata prepará inmediatamente p’e operacion.

Mi tabatin hopi bishita promé cu e operacion. Un pastor católico, cu Bijbel na man, a bishitá mi i a bisa cu mi enfermedad ta castigu di Dios. El a instá mi pa probechá di cualkier tratamentu cu por a salba mi bida. Mi a bis’é cu mi tabata determiná di obedecé e mandamentu bíblico di ‘abstené di sanger.’—Echonan 15:19, 20, 28, 29.

Enfermeranan tambe a drenta i a murmurá: “Ki bobo, ki bobo!” Gruponan di dokter tambe a pasa. Nan tabata kier a mira e hóben cu a nenga di aceptá transfusion di sanger durante operacion den locual nan a considerá sanger necesario. Sin embargo, e bishitanan di mas importante tabata esnan di mi compañeronan cristian i mi famia. E enfermeranan a keda basta impresioná pa asina hopi bishita animador.

Tratamentu Exitoso sin Sanger

Un poco minuut so promé cu nan a mandá mi leu, mi a tende un anestesiólogo bisa: “Mi no ta responsabel pa loke ta sosodé!” Pero e otro anestesiólogo i tambe mi ciruhano i e director dje hospital, a respetá mi peticion di no ricibí sanger. E siguiente cos cu mi a tende tabata un anestesiólogo bisa: “Samuel, lanta. E operacion a caba.”

Aunke nan a kita mi pal’i pia completo, mi a cuminsá sinti un dolor severo unda e tabata. Mi kier a aliviá e dolor dor di hala mi bel di pia, locual, naturalmente, no tabatei mas. Mi a experenciá e fenómeno straño yamá dolor fantasia. Mi realmente a sinti dolor, agonia mes, aunke e pia for di locual e dolor a parce di bini, a ser kitá.

Siguientemente, mi tabatin cu ricibí kimoterapia. Un efecto secundario di tal tratamentu ta perdementu di cel corá i blancu di sanger i plaketa di sanger, locual ta necesario pa sanger forma casca. Esei a nificá cu un grupo nobo di dokter tabatin cu ser informá di cu mi a nenga di aceptá transfusion di sanger. Atrobe CCH a comunicá cu esnan responsabel, i e dokternan a cumbiní pa duna e tratamentu sin sanger.

Efecto secundario di custumber a sigui e kimoterapia—mi a perde mi cabei i a experenciá mareo, sacamentu, i depresion. Nan a bisá mi tambe cu lo tin 35 porciento di rísico di hersenbloeding. Mi a sintí mi obligá di puntra un dokter, cua lo matá mi—e cancer of e kimoterapia.

Despues, e dokternan a bisa cu nan no por duna mas kimoterapia sin aumentá promé celnan corá i blancu di mi sanger cu transfusion di sanger. Un dokter rabiá a bisá mi cu si e por, lo el a mandá mi leu i duná mi sanger. Mi a bis’é cu promé cu mi laga esei sosodé, lo mi descontinuá e kimoterapia henteramente. E dokter a expresá admiracion pa mi posicion firme.

Mi a cumbiní pa aceptá erythropoyetin pa aumentá cel di mi sanger. Ora nan a duná mi esei, mi celnan a aumentá. Despues, kimoterapia a ser mandá den mi bena durante un periodo di un par di dia. Mi a drumi ei durante e terapia pensando, ‘Esaki lo ta e dósis cu lo causa hersenbloeding?’ Agradecidamente, mi a caba di tuma tur e medicamentu sin consecuencianan desastroso.

Promé cu mi operacion, e procedura dje hospital tabata pa nenga di aceptá hende si nan no aceptá transfusion di sanger. Pero tal procedura a cambia. Realmente, net e dia despues di mi operacion mi ciruhano a haci un otro operacion sin usa sanger, i e biaha aki e pashent no tabata un Testigo di Jehova! Awor vários dokter den e hospital ei ta cooperá estrechamente cu CCH, i nan a cumbiní pa aceptá pashentnan cu kier operacion sin sanger.

Ahuste na Limitacionnan

Desde cu mi tabata mucha, mi a ser siñá e caminda di Dios. Mi ta sigur cu esei a yudá mi mantené mi conviccion fundá riba e Bijbel den e emergencia médico aki. Pero, recientemente mi ta keda molestiá cu mi no por haci tantu cu mi kier den e sirbishi di Dios. Mi a mencioná mi sintimentunan na un tio cu ta un anciano cristian. El a hací mi corda cu asta apostel Pablo tabatin loke el a yama un ‘sumpiña den su carni’ i cu esaki a strob’é di sirbi Dios tantu plenamente como el a deseá. Pero, Pablo a haci loke e tabata por. (2 Corintionan 12:7-10) E palabranan di mi tio a yudá mi mashá.

Recientemente, nan a pone un pia artificial pa mi. Mi ta spera cu esei ta haci posibel pa mi rindi sirbishi mas extenso na nos Dios, Jehova. Mi ta gradicidu cu mi a mantené un bon concenshi durante mi emergencia médico. Mi tin e confiansa di cu si mi sigui fiel, Jehova lo recompensá mi cu un curpa sano i bida eterno den un tera paradísico, unda lo no existí dolor ni sufrimentu mas.—Revelacion 21:3, 4.—Relatá dor di Samuel Vila Ugarte.