Un Encuentro Increibel

“E COS di mas excitante cu mi a yega di haci den mi bida!” Asina Kristie a describí su encuentro increibel. Ta asina abo lo a sinti si bo lo por a landa cu dolfijnnan den e Golfo di México?

Tur hende ta emocioná ora nan wak dolfijnnan landa i haci kenshi den awa, manera cana bai patras riba nan rabu, bula for di awa na halturanan asombroso of laga hende core riba nan. Djis di wak e shownan aki por haci un hende deseá di drenta den e awa i hunga cu e dolfijnnan ei.

Semper Kristie a sinti asina. Anto un dia, miéntras e tabata keiru cu boto i landando den e Golfo di México, di ripiente un cabes a bula sali su dilanti. Pronto a parce cu tres dolfijn caweta a kere cu nan a haña un compañera pa hunga cuné. Na cuminsamentu, Kristie tabatin un tiki miedu, pero despues su miedu a cambia bira excitacion segun cu el a reaccioná riba loke e dolfijnnan tabata haci. Lagando nan haci loke nan tabata kier, el a relahá pa wak kico nan lo haci siguientemente.

Kristie a bisa: “Un dolfijn tabata djis bula sali mi dilanti—i ei nos tabata, un ta wak otro. Mi a hañá mi ta carici’é i ta papia cuné—mescos cu lo mi a haci cu mi cachó.”

Debí na nan inteligencia, dolfijnnan ta entretenedornan popular, i mayoria entrenador ta bisa cu, debí cu nan ta amistoso pa cu hende, bo no tin nodi duna dolfijnnan cuminda tur biaha pa nan efectuá nan truconan.

Ora nan a puntra Liz Morris, un investigador di conducta di animal di Sea World na Flórida, Merca, cua tabata e cos di mas dushi tocante traha cu dolfijnnan, el a bisa: “Mi ta kere cu esei ta nan caracter. Debí cu nan ta asina hugueton i caweta di naturalesa, bo por berdaderamente desaroyá un relacion cu nan . . . Nan ta reaccioná masha bon na mishimentu i cariño.” Den Dios su sistema nobo di cosnan primintí, nos tur lo por tin hopi encuentronan increibel manera esun di Kristie.