For di Nos Lectornan

Confiansa Mi tabata sintí mi deprimí pa motibu cu mi a ser traicioná dor di algun amigu i conocí. Mi a cuminsá duda dje credibilidad di tur hende rond di mi. Pero e seri “Ken Bo Por Confia?” (8 di februari, 1996) a duná mi un punto di bista mas balansá di confiansa. Danki pa informacion oportuno asina.

E. I., Korea

Den transcurso di añanan, mi a ser traicioná dor di mi tata, kende tabata abusá di mi, dor di dos esposo, i dor di un ruman cristian. Na dado momento mi a dicidí pa no confia ningun hende mas. Mi a convencé mi mes cu mi no tabatin mester di hende. Pero e artículo a yudá mi bira mas balansá. Aunke ta hopi difícil pa mi confia den hende, mi ta bai sigui purba. E biaha aki lo mi bai tin mas cuidou ken mi ta confia.

C. H., Merca

Cervino Mi a lesa e artículo “E Ceru Cervino Excepcional.” (¡Despertad! di 8 di februari, 1996) E potret dje ceru bunita aki berdaderamente a capta mi atencion! E artículo a hací mi apreciá e creacion di Dios mas ainda.

J. W., Merca

Apel Masha masha danki p’e artículo “Cu un Apel pa Dia, Bo Ta Keda Riba Pia.” (¡Despertad! di 8 di februari, 1996) El a stimulá mi interes, ya cu nos tin mas cu 100 palu di apel den nos hacienda chikitu. Nos ta disfrutá di snui i drecha e palunan aki pa haci nan producí bon. Nos ta apreciá e exactitud di tur boso artículonan. Nan ta duna informacion refrescante i confiabel.

P. B., Merca

Comportacion Compulsivo Danki pa e excelente artículo “Comportacion Compulsivo—E Ta Controlá Bo Bida?” (¡Despertad! di 8 di februari, 1996) Mi tin solamente 20 aña i ta sufri di comportacion compulsivo. Hopi biaha mi a pidi Jehova den oracion pa mandá mi informacion tocante loke tabata pasando cu mi.

M. A. C., Spaña

Rond dje tempu cu mi a cuminsá traha pionero, sirbiendo como un evangelisador di tempu completo, sin cu mi tabata kier, pensamentunan irespetuoso tocante Dios a cuminsá molestiá mi. Ami a kere cu mi a cometé un picá imperdonabel, i mi a yora hopi biaha. Boso no por imaginá con mi ta sinti awor cu mi ta mira mi sintimentunan describí pretu riba blancu. Nunca mi a kere cu algun otro hende por tabata sufriendo di esaki. Danki, rumannan, pa ta semper ei pa nos.

C. B., Nigeria

Mi a lesa e artículo bes tras bes, cu awa na wowo. E artículo a describí mi condicion asina detayá! Mi tabata puntra mi mes si mi tabata birando loco of si e demoñonan tabata controlando mi mente. Tabata un alivio pa sa cu otronan entre e rumannan ta sufri di e mésun trastorno.

K. T., Hapon

Hopi biaha mi a acudí na Jehova pa yudansa cu e problema aki. Pero mi a dicidí di entregá, pasobra mi a sinti cu esei tabata en bano i cu no tabatin nada cu por a yudá mi. Awor mi ta comprendé mi mes, i mi ta sintí mi aliviá. Mi ta duda cu e artículo por a ser skirbí mas amorosamente. Mi tin sigur cu Jehova realmente ta interesá den nos.

J. F., República Checo

Mi a ser tormentá cu pensamentunan compulsivo pa shete aña caba. Esei a lagá mi ta sinti acabá i deprimí. Mi a sintí mi demasiado bergonsá i culpabel pa papia esaki cu un hende. Di berdad mi a kere cu mi a bira loco. Ora mi a lesa e artículo aki, mi no por a kere. Tabatin mas hende eifó cu a pasa dor di loke ami tabata pasando aden! Awa a yena mi wowo. Ya mi no tabata mi so mas. Mi no a cometé e picá imperdonabel, i Jehova no tabata rabiá cu mi.

S. B., Sur Africa