Hóbennan Sa Puntra . . .

Pakico Dios Ta Laga Cos Malu Sosodé?

LIDIJA tabata solamente un tiener ora guera a cuminsá den su pais natal—e pais anteriormente conocí como Yugoslavia. “Mi a pasa hopi dia i anochi den un escondite scur,” e ta corda. “Hopi biaha mi a sinti gana di core bai pafó, asta si esei lo a nificá cu nan lo a matá mi! Promé cu e guera, bo tabatin tur loke bo tabata kier, pero awor bo tabata contentu djis pa ta na bida.”

E tension i presion di guera pronto a afectá Lidija spiritualmente. E ta bisa: “Nos no por a participá den e trabou di predicá ni bai reunion pa simannan largu. Ami di berdad a pensa cu Jehova tabata neglishando nos. Mi tabata puntra mi mes, ‘Pakico e no ta yudando nos awor?’”

Guera, crímen, violencia, malesa, desaster, accidentenan—cosnan malu manera esakinan por sosodé asta cu hóbennan. I ora desgracia afectá bo personalmente, ta natural cu bo ta puntra bo mes, ‘Pakico Dios ta laga e cosnan malu aki sosodé?’

Hombernan di Dios den pasado a haci preguntanan manera esei. Ora e profeta Habacuc, por ehempel, a mira e estado baho di cosnan cu tabata existí entre e pueblo di Dios, el a lamentá: “Pa cuantu tempu, O Jehova, mi mester grita pa yudansa, sin cu bo ta tende? Pa cuantu tempu lo mi sclama na bo pa yudansa for di violencia, sin cu bo ta salba? Pakico bo ta hací mi wak loke ta perhudicial, i bo ta sigui mira simpel penoso afan?” (Habacuc 1:2, 3) Algun hóben cristian awe ta pasa dor di afliccion emocional similar.

Tuma, por ehempel, con un cristian hóben a sinti despues dje morto repentino di su tata. E ta bisa: “Mi a bira loco, gritando for dje bentana, gritando na Jehova Dios. . . . Mi a culp’é pa tur cos. Con esaki por a sosodé? Papi tabata un dushi tata i un esposo amoroso, i awor esaki ta sosodé—acaso Jehova no tin cu nes?” Den un situacion manera esaki, ta solamente natural pa bo sinti un poco confundí, duele of asta rabia. Corda, e fiel profeta Habacuc tambe a keda perturbá p’e echo cu a ser permití pa maldad existí. No obstante, si un hende sigui carga sintimentunan di amargura, tin un peliger. E por bira “rabiá contra Jehova mes.”—Proverbionan 19:3.

Con, anto, bo por evitá di entregá na sintimentunan di rabia i amargura? Promé, bo mester comprendé di unda maldad ta bini.

Cos Malu No Ta Bini di Dios

Bijbel ta mustra claramente cu nunca tabata Dios su intencion pa nos sufri asina aki. El a pone e promé pareha den un hogar paradísico cu tabata liber di dolor i sufrimentu. (Génesis 1:28) Sin duda bo sa bon con cos a bai malu: Un criatura spiritual invisibel, cu despues a bira conocí como e Diabel i Satanas, a inducí Adam cu Eva pa desobedecé Dios. (Génesis, capítulo 3; Revelacion 12:9) Dor di haci esaki, Adam a condená henter su desendencia na picá i su efectonan devastador.—Romanonan 5:12.

Ta bisto cu no ta Dios a trece maldad riba humanidad, sino hende mes. (Deuteronomio 32:5; Eclesiástes 7:29) Realmente, tur e cosnan malu cu hende ta sufri di dje awe—malesa, morto, guera, inhusticia—ta consecuencia di Adam su acto deliberá di desobedencia. Ademas, nos tur ta exponé na loke Bijbel ta yama “tempu i suceso imprevisto.” (Eclesiástes 9:11) Tantu e malbadonan como e hustunan ta haña nan den accidente i desgracianan inesperá.

E Echo cu Dios Ta Permití Maldad

Aunke ta un consuelo pa sa cu Dios no ta e fuente di maldad, tog bo por ta puntra puntra bo mes, ‘Pakico e ta permití maldad sigui?’ Atrobe, esaki tin di haci cu cuestionnan cu a lanta den Eden. Dios a bisa Adam cu si e desobedecé, lo e muri. (Génesis 2:17) Sin embargo, e Diabel a bisa Eva cu si e come dje palu prohibí, lo e no muri! (Génesis 3:1-5) Eigenlijk, Satanas a yama Dios un mentiroso. Ademas, Satanas a implicá cu lo bai mihó cu hende si nan tuma nan mes decision i si nan no tabatin Dios pa bisa nan kico pa haci!

Dios no por a pasa por haltu dje acusacionnan aki. Bo a yega di mira un mucha den klas desafiá e autoridad di un maestro? Si e maestro no straf e, otro alumnonan lo cuminsá rebelá tambe. Di un manera similar, un cáos universal por a cuminsá si Jehova no a enfrentá e desafio di Satanas directamente. Jehova a haci esei dor di permití pa hende sigui e manera di Satanas pa haci cosnan. Hende ta disfrutá dje independencia manera esun di Dios cu Satanas a primintí? No. E gobernacion di Satanas a trece devastacion i sufrimentu, dunando prueba cu e ta un mentiroso malicioso!

Dios lo permití maldad continuá pa semper? No. Pa resolvé e cuestionnan cu Satanas a lanta, Dios pronto lo trece un fin na tur maldad. (Salmo 37:10) Pero, miéntras tantu, con nos mester enfrentá e situacion?

Un Cuestion cu Ta Enbolbé Bo

Promé cu tur cos, sabi cu e cuestion aki entre Dios i Satanas ta enbolbé abo! Con asina? Tuma, por ehempel, e buki di Bijbel cu ta carga nomber dje hustu homber Job. Ora Dios a mustra riba Job como un ehempel di un adorador fiel, Satanas a contestá: “Acaso Job lo adorá bo si e no ta haña nada for di esei?” (Job 1:9, Today’s English Version) Asina mes, Satanas a argumentá cu si permitié pone presion, lo e por kita cualkier hende di sirbi Dios!—Job 2:4, 5.

P’esei, Satanas a calumniá tur hende temeroso di Dios. El a calumniá abo. Sin embargo, Proverbionan 27:11 ta bisa: “Sea sabí, mi yu, i alegrá mi curason, pa mi por contestá esun cu ta desafiá mi cu desprecio.” Sí, ora bo ta sirbi Dios apesar di dificultadnan penoso, en realidad bo ta yuda duna prueba cu Satanas ta un mentiroso!

Ta berdad cu ora nos ser confrontá cu cos malu, no ta fácil pa pensa dje cuestionnan enbolbí. Diane, kende tabatin solamente dies aña di edad ora su mama a muri, ta bisa: “Mi tabatin miedu di bira un hende duru i amargá pa motibu di e pruebanan den mi bida.” Sin embargo, sabiendo pakico Dios a permití maldad a yud’é haña un punto di bista corecto di su problemanan. Awor e ta bisa: “Maske tin cosnan cu ta difícil pa trata cuné den mi bida, Jehova su man semper ta cu mi.”

Diane ta haci nos corda un echo masha importante: Jehova no ta spera pa nos enfrentá e presionnan aki riba nos mes. Salmo 55:22 ta duna nos e siguransa: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” E hóben Kotoyo a haña cu esaki ta cierto. El a enfrentá tragedia ora su mayornan a muri den e temblor di 1995 cu a dal Kobe, Hapon. Papiando di su mes i di su rumannan mas chikitu, e ta bisa: “Dor cu mi mama a siña nos pa confia riba Jehova, nos por wanta.”

Kico di Lidija, e hobencita mencioná na cuminsamentu? Cu tempu, el a bin realisá cu Jehova no a bandon’é ningun momento. Awor e ta bisa: “Jehova semper tabata ei pa nos. El a guia nos i a dirigí nos pasonan.”

Jehova—Un Dios Amoroso Cu Ta Interesá

Abo tambe por sinti e yudansa for di Dios ora cos malu pasa cu bo. Di con? Pasobra Jehova ta interesá den bo! I maske e ta permití cos malu sosodé cu hende bon, e ta duna consuelo amoroso tambe. (2 Corintionan 1:3, 4) Un manera cu e ta haci esaki ta mediante e congregacion cristian. Eiden bo por haña ‘amigunan cu ta mas pegá cu un ruman,’ cu por fortalecé bo ora bo hañá bo den un crísis. (Proverbionan 18:24) Kotoyo ta corda: “Desde e promé dia despues dje temblor, nos a bai n’e lugá unda e rumannan a reuní, i nos a ricibí animacion i cosnan necesario. Esei a hací mi sinti a salbo. Tanten cu nos tin Jehova i e rumannan, mi ta sinti cu nos por wanta cualkier cos.”

Dor cu Jehova conocé bo personalmente, e por soru tambe pa bo necesidadnan ora cos malu pasa. Daniel ta corda bek con el a trata cu e pérdida di su tata, bisando: “Jehova ta bira un tata pa bo, i su organisacion ta percurá hombernan spiritual como ehempel pa sigui. Semper Jehova ta duna contesta na preguntanan cu mi tin cu den un situacion normal lo mi a considerá cu mi tata.” Di un manera similar Diane a sinti Jehova su cuido amoroso desde e morto di su mama. E ta bisa: “Mediante esnan di mas edad i spiritualmente mas maduro cu a duná mi animacion, guia i conseho, Jehova a guiá mi i a yudá mi enfrentá cualkier desanimacion.”

Naturalmente, nunca ta agradabel pa pasa dor di cos malu. Pero haña consuelo sabiendo pakico Dios ta permití cosnan asina. Recordá bo mes constantemente cu Dios lo solucioná e problema masha pronto. Sí, tur rastro di cos malu cu nos a pasa aden, cu tempu lo ser kitá! (Isaías 65:17; 1 Juan 3:8) Dor di saca probecho di tur e provisionnan cu Dios ta haci ta yuda nos enfrentá problema, bo por haci bo parti den duna prueba cu Satanas ta un mentiroso. Cu tempu ‘Dios lo seca tur lágrima di bo wowo.’—Revelacion 21:3, 4.

[Plachinan na página 19]

Pronto Jehova lo pone fin na tur cos malu