Evolucion Falta Su Fundeshi?

KICO ta e esencia di Darwin su teoria di evolucion? “Den e sentido biológico mas acabá, . . . evolucion ta nificá un proceso segun cua bida a bini di materia no-bibiente i despues a desaroyá henteramente via medionan natural.” E evolucion segun Darwin ta postulá cu “prácticamente tur forma di bida, of por lo ménos su rasgonan mas interesante, a resultá di seleccion natural trahando riba variacionnan cu a bin pa casualidad.”—Darwin’s Black Box—The Biochemical Challenge to Evolutiona (Darwin Su Black Box—Biokímica Ta Desafiá Evolucion), di Michael Behe, profesor asociado di biokímica na e Universidad di Lehigh, Pennsylvania, Merca.

Complehidad Ireducibel —Strobansa pa Evolucion?

Ora Darwin a desaroyá su teoria, científiconan tabata sa masha poco of nada mes dje complehidad asombroso di e cel bibiente. Biokímica moderno, e estudio di bida na nivel di molekuul, a revelá algu dje complehidad ei. Tambe el a lanta pregunta i dudanan serio tocante e teoria di Darwin.

E componentenan di cel ta trahá di molekuul. Celnan ta e blokinan di construccion di tur criatura bibiente. Profesor Behe ta un católico romano i ta kere den evolucion pa por splica e desaroyo mas despues di animalnan. Sin embargo, e ta lanta dudanan serio tocante si evolucion por splica e existencia dje cel. E ta yama nan mashinnan molecular cu “ta hala carga di un lugá pa otro den e cel a lo largu di ‘careteranan’ trahá di otro molekuul . . . Celnan ta landa usando mashinnan, nan ta duplicá nan mes cu mashinnan, nan ta guli cuminda usando mashinnan. Den poco palabra, mashinnan molecular altamente sofisticá ta controlá delaster un proceso celular. Pues, e detayenan di bida ta reglá cu precision, i e mashin di bida ta enormemente complicá.”

Awor, tur e actividad aki ta tumando lugá riba ki escala? Un cel típico ta solamente 0,03 milimeter den diameter! Den e espacio chikititu aki, funcionnan complicá vital pa bida ta tuma lugá. (Mira diagram, página 8-9.) No ta un sorpresa cu a ser bisá: “E punto esencial ta cu e cel—e base mes di bida—ta asombrosamente complicá.”

Michael Behe ta trece e argumento padilanti cu e cel por funcioná solamente como un entidad completo. Pues, e no por funcioná miéntras cu e ta ser formá mediante cambionan lento i gradual inducí dor di evolucion. E ta usa e ehempel di un trampa pa raton. E aparato simpel aki por funcioná solamente ora tur su componentenan ta hincá den otro. Cada componente riba su mes—base, fer, bara pa wanta, klem, hak—no ta un trampa pa raton i no por funcioná como tal. Tur e partinan mester t’ei simultáneamente i mester ta hincá den otro pa por tin un trampa cu ta funcioná. Mescos tambe, un cel por funcioná como tal solamente ora tur su componentenan ta hincá den otro. Behe ta usa e ilustracion aki pa splica loke e término “complehidad ireducibel” ta nificá.b

Esaki ta presentá un problema grandi pa e supuesto proceso di evolucion, segun cua característicanan útil adkerí a aparecé gradualmente. Darwin tabata sa cu su teoria di evolucion gradual dor di seleccion natural a enfrentá un desafio grandi ora el a bisa: “Si por ser demostrá cu a existí un órgano complicá, cu di ningun manera por a forma mediante un cantidad di modificacion chikitu sucesivo, mi teoria lo cai completamente den otro.”—Origin of Species (Orígen di Especienan).

E cel ireduciblemente complicá ta un strobansa grandi pa kere den e teoria di Darwin. Pa cuminsá, evolucion no por splica con materia sin bida por pasa over na materia bibiente. Ademas, tin e problema dje promé cel complicá, cu mester lanta den un solo biaha como un unidad formá. Cu otro palabra, e cel (of, e trampa pa raton) mester aparecé di ripiente, hincá den otro i funcionando!

E Complehidad Ireducibel di Cuahamentu di Sanger

Un otro ehempel di complehidad ireducibel ta un proceso cu mayoria di nos ta tuma como di mes ora nos haña un cortá—cuahamentu di sanger. Normalmente, cualkier líkido lo cuminsá lek di biaha for di un envase cu haña un buracu i lo sigui lek te ora e envase bira bashí. Pero, ora nos hinca of corta nos cueru, e herida ta stop di sangra dor dje formacion di un klompi. Sin embargo, manera dokternan sa, “cuahamentu di sanger ta un sistema masha complicá i hincá den otro di un manera compleho, consistiendo di un cantidad di partinan di proteina cu ta interdependiente.” Esakinan ta activá un seri di reaccion kímico i físico complicá cu ta forma e klompi. E proceso delicado aki di drechamentu “ta dependé crucialmente di ki ora i con lihé e diferente reaccionnan ta tuma lugá.” Si no, por pasa cu tur e sanger di un hende ta cuaha i bira duru, of, di otro un banda, cu e ta sangra te muri. Momento corecto i velocidad ta clavenan vital.

Investigacion biokímico a mustra cu cuahamentu di sanger ta enbolbé hopi factor, di cua ningun por falta pa e proceso traha bon. Behe ta puntra: “Una bes cuahamentu cuminsá, kico ta stop e di sigui te cu tur e sanger . . . bira duru?” E ta splica cu “e formacion, limitacion, refuerso i kitamentu di un klompi di sanger” ta constituí un sistema biológico coordiná. Si cualkier un dje partinan faya, anto e sistema ta faya.

Russell Doolittle, evolucionista i profesor di biokímica n’e Universidad di California, ta puntra: “Con por ta cu e proceso complicá i delicadamente balansá aki a desaroyá? . . . E paradox tabata cu si cada proteina tabata dependé di un otro pa ser activá, ta con anto e sistema a cuminsá cana? Di ki uso cualkier parti lo tabata den e cuadro sin e totalidad completo?” Usando argumentonan evolucionista, Doolittle ta purba splica e orígen dje proceso. Sin embargo, Profesor Behe ta señalá cu lo tin “mester di masha hopi suerte mes pa haña e partinan exacto di gene den e lugánan exacto.” E ta mustra cu e splicacion i idioma simpel di Doolittle ta contené dificultadnan tremendo.

Pues, un dje obhecionnan di mas grandi contra e modelo di evolucion ta e obstáculo insuperabel di complehidad ireducibel. Behe ta declará: “Mi ta enfatisá cu seleccion natural, e motor tras dje evolucion segun Darwin, ta funcioná solamente si tin algu pa selectá—algu cu ta útil awor aki, no den futuro.”

“Un Silencio Total i Misterioso”

Profesor Behe ta bisa cu algun científico a studia “modelonan matemático pa evolucion of métodonan matemático nobo pa compará i interpretá datonan di e secuencianan den DNA.” Sin embargo, e ta concluí: “Matemática ta asumí cu evolucion mes ta un proceso gradual i basá riba casualidad; e no ta (ni no por) demostr’é.” (Cursivo den último frase ta di nos.) Anteriormente el a bisa: “Si bo busca den literatura científico tocante evolucion, i si bo concentrá bo búskeda riba e pregunta con mashinnan molecular—e base di bida—a desaroyá, bo ta haña un silencio total i misterioso. E complehidad dje fundeshi di bida a paralisá e intento di ciencia pa splik’é; mashinnan molecular te ainda ta forma un barera impenetrabel pa e aceptacion universal di Darwin su teoria.”

Esaki ta lanta un seri di pregunta pa científiconan conciencial considerá: “Con e centro di reaccion di fotosíntesis a desaroyá? Con transporte intramolecular a cuminsá? Con biosíntesis di colesterol a iniciá? Con retinal a drenta den e proceso di bista? Con e camindanan cu e señalnan di fosfoproteina ta sigui, a desaroyá?”c Behe ta agregá: “E solo echo cu ningun dje problemanan aki no ta ser mencioná mes, corda pa ser solucioná, ta un indicacion masha fuerte cu e teoria di Darwin ta un modelo inadecuá pa comprendé e orígen dje sistemanan biokímico complicá.”

Si e teoria di Darwin no por splica e fundeshi molecular complicá di celnan, anto ta con e por ta un splicacion satisfactorio pa e existencia di miyones di especie cu ta habitá e tera aki? Corda bon, evolucion no por ni producí géneronan nobo dor cu e no por pasa e brecha di un género pa otro.—Génesis 1:11, 21, 24.

E Problemanan dje Comienso di Bida

Sin importá con plausibel e teoria di Darwin por parce di ta den bista di algun científico, finalmente nan mester enfrentá e pregunta, Asta si nos asumí cu formanan di cosnan bibiente a evolucioná dor di seleccion natural, con bida a haña su comienso? Cu otro palabra, e problema no ta sinta den e sobrebibencia di esun mas apto, sino den con esun mas apto i esun promé a yega! Sin embargo, manera e comentarionan di Darwin tocante e evolucion dje wowo ta indicá, e no tabata interesá den e problema dje manera con bida a cuminsá. El a skirbi: “Con un nervio ta bira sensitivo pa lus no ta interesá nos, mescos cu nos no ta interesá den con bida mes a originá.”

Escritor científico frances Philippe Chambon a skirbi: “Darwin mes kier a sa con naturalesa a selectá formanan cu tabata evolucionando promé cu nan tabata perfectamente funcional. E lista di misterionan evolucionista ta infinito. I e biólogonan djawendia tin cu admití humildemente, huntu cu Profesor Jean Génermont dje Universidad di Sur Paris na Orsay, cu ‘e teoria sintético di evolucion no por splica fácilmente e orígen di órganonan complicá.’”

Mirando con tremendo e improbabilidad ta cu evolucion lo por a producí asina un infinidad di variedad i complehidad di formanan bibiente, bo ta haña cu ta difícil pa kere cu tur cos a evolucioná den e bon direccion djis pa casualidad? Bo ta puntra bo mes con cualkier criatura por a sobrebibí den e lucha pa sobrebibencia di esun mas apto miéntras cu ainda e tabata desaroyando wowo? Of miéntras cu ainda e supuestamente tabata formando dedenan primitivo riba un curpa subhumano? Bo ta puntra bo mes con celnan a sobrebibí si nan a existí den un estado incompleto i inadecuado?

Robert Naeye, un escritor p’e revista Astronomy i un evolucionista, a skirbi cu bida riba tera ta e resultado di “un rij largu di sucesonan improbabel [cu] a tuma lugá den exactamente e manera corecto pa producí nos existencia, como si fuera nos a gana un loteria miyonario un miyon di biaha tras di otro.” Probablemente por aplicá e razonamentu ei na cada un criatura cu ta existí awe. Ta masha improbabel mes. Sin embargo, nos mester kere cu pa casualidad evolucion a producí tambe un machu i un hembra n’e mésun tempu pa por continuá e existencia di especienan nobo. Asta mas improbabel ainda, nos tin cu kere tambe cu e machu i e hembra no solamente a evolucioná n’e mésun momento, sino tambe n’e mésun lugá! Si nan no a bini huntu, no tabatin procreacion!

Sigur, pa kere cu bida ta existí den su miyones di formanan perfeccioná como resultado di miyones di purbamentu cu a resultá net bon, ta hiba credulidad te na un grado extremo.

Pakico e Mayoria Ta Kere?

Di con evolucion ta asina popular i asina hopi hende ta acept’é como e único splicacion pa bida riba tera? Un motibu ta cu e ta e punto di bista ortodox cu ta ser siñá na scol i universidad, anto ai di bo si bo tribi di expresá cualkier duda. Behe ta declará: “Hopi alumno ta siña for di nan bukinan di instruccion con pa mira e mundu for dje punto di bista evolucionista. Sin embargo, nan no ta siña con e teoria di evolucion segun Darwin lo por a producí cualkier un dje sistemanan biokímico notablemente complicá cu e bukinan ei ta describí.” E ta agregá: “Pa por comprendé tantu e éxito dje teoria di Darwin como un siñansa ortodox i tambe su fracaso como ciencia na nivel molecular, nos tin cu examiná e bukinan di instruccion cu ta ser usá pa siña científiconan aspirante.”

“Si haci un encuesta bou di tur e científiconan na mundu, e gran mayoria lo bisa cu nan ta kere cu e teoria di Darwin ta cierto. Pero científiconan, mescos cu tur otro hende, ta basa mayoria di nan opinionnan riba e palabra di otronan. . . . Tambe, i desafortunadamente, demasiado biaha e comunidad científico a descartá criticismo pa miedu di duna creacionistanan puntonan na nan fabor. E ironia ta cu, supuestamente pa protehá ciencia, criticismo científico franco riba seleccion natural a ser bentá un banda.”d

Ki alternativa funcional i confiabel tin pa Darwin su teoria di evolucion? Nos último artículo den e seri aki lo considerá e pregunta ei.

[Notanan]

[Komentario na página 6]

“Si por ser demostrá cu a existí un órgano complicá, cu di ningun manera por a forma mediante un cantidad di modificacion chikitu sucesivo, mi teoria lo cai completamente den otro.”

[Komentario na página 10]

Den e cel, tin “un mundu di tecnologia supremo i complehidad aturdidor.”—Evolution: A Theory in Crisis

Pa loke ta e instruccionnan den e DNA dje cel, “si skirbi nan, lo yena mil buki di 600 página.” —National Geographic

[Komentario na página 11]

“Matemática ta asumí cu evolucion mes ta un proceso gradual i basá riba casualidad; e no ta (ni no por) demostr’é.”

[Komentario na página 12]

“E ironia ta cu, supuestamente pa protehá ciencia, criticismo científico franco riba seleccion natural a ser bentá un banda.”

[Kuadro na página 8]

E Molekuul i e Cel

Biokímica—“e estudio di e base mes di bida: e molekuulnan cu ta forma cel i tehido, cu ta catalisá e reaccionnan kímico di digestion, fotosíntesis, inmunidad i mas.”—Darwin’s Black Box.

Molekuul—“e partícula mas chikitu den cua un elemento of un componente por ser dividí sin cambia su propiedadnan kímico i físico; un grupo di atom similar of diferente wantá huntu dor di forsanan kímico.”—The American Heritage Dictionary of the English Language.

Cel—e unidad fundamental di tur organismo bibiente. “Cada cel ta un structura altamente organisá cu ta responsabel pa e forma i funcion di un organismo.” Cuantu cel ta forma un humano adulto? Shen biyon (100.000.000.000.000)! Nos tin rond di 155.000 cel den cada centimeter cuadrá di cueru, i e celebro humano tin entre 10 mil miyon pa 100 mil miyon neuron. “E cel ta e clave pa biologia, pasobra ta na e nivel aki cu un coleccion di awa, salu, macromolekuul i membran berdaderamente ta haña bida.”—Biology.

[Kuadro na página 9]

E “Complehidad Sin Igual” dje Cel

“Pa por capta e realidad di bida manera biologia molecular a revel’é, nos tin cu magnificá un cel mil miyon di biaha te ora e ta binti kilometer den diameter i ta parce un nave aéreo gigantesco suficiente grandi pa cubri un stad grandi manera Londen of New York. Loke nos lo mira e ora ei ta un obheto di complehidad sin igual i diseño adaptivo. N’e superficie dje cel nos lo mira miyones di buracu, mescos cu e bentananan di un inmenso nave espacial, habriendo i cerando pa permití un fluho constante di material drenta i sali. Si nos lo mester drenta dor di un dje buracunan aki, nos lo haña nos mes den un mundu di tecnologia supremo i complehidad aturdidor. Nos lo mira pasiyo i conductonan altamente organisá ta core den tur direccion for dje rand pafó dje cel, algun bayendo n’e banco central di memoria den e núcleo i otronan n’e plantanan di formacion i unidadnan di procesamentu. E núcleo mes lo ta un inmenso cuarto rondó mas cu un kilometer den diameter, cu ta parce un koepel geodésico den cua nos lo mira rijnan ordená di stapelnan nechi poné banda di otro dje miyanan di cadena lorá di molekuul di DNA. Un inmenso escala di producto i materia prima lo pasa bai a lo largu dje múltiple conductonan den un manera hopi ordená pa i for di e vários plantanan di formacion den e regionnan mas na rand dje cel.

“Nos lo keda asombrá cu e nivel di control implicá den e movementu di asina tantu obheto a lo largu di asina tantu conducto aparentemente infinito, tur den armonia perfecto. Nos lo mira tur rond di nos, den tur direccion cu nos wak, tur sorto di mashin manera robot. Nos lo ripará cu e componentenan funcional mas simpel dje cel, e molekuulnan di proteina, ta piesanan asombrosamente complicá di mashin molecular, cada un consistiendo di rond di tres mil atom areglá den formacion espacial tridimensional altamente organisá. Nos lo keda babucá mas ainda pa mira e actividadnan extraordinariamente útil dje mashinnan molecular straño aki, specialmente ora nos corda cu, maske cuantu conocimentu acumulá tocante física i kímica nos tin, e tarea di diseñá un mashin molecular asina—esta un solo molekuul di proteina funcional—lo ta completamente fuera di nos capacidad n’e momento aki i probablemente lo no ser lográ te cu por lo ménos na cuminsamentu dje siguiente siglo. Sin embargo, e bida dje cel ta dependé dje actividadnan coordiná di miles, sigur-sigur dies di miles, i probablemente cientos di miles di diferente molekuul di proteina.”—Evolution: A Theory in Crisis (Evolucion: Un Teoria den Crísis).

[Kuadro na página 10]

Echonan i Mitonan

“Pa un hende cu no ta sintié obligá di limitá su búskeda na causanan sin inteligencia, e conclusion sin falta ta cu hopi sistema biokímico a ser diseñá. Nan a ser diseñá no dor di leynan di naturalesa, ni pa casualidad i necesidad; mas bien, nan a ser planeá. . . . Bida riba tera na su nivel mas fundamental, den su componentenan mas crucial, ta e producto di actividad inteligente.”—Darwin’s Black Box.

“No por tin duda cu despues di un siglo di esfuerso intensivo biólogonan no a logra validá [Darwin su teoria di evolucion] den ningun sentido significante. E echo ta keda cu naturalesa no a revelá un seri di cosnan bibiente estrechamente relacioná cu otro manera e modelo di Darwin ta exigí, ni tampoco a logra duna credibilidad n’e idea cu bida a bin na existencia pa casualidad.”—Evolution: A Theory in Crisis.

“E influencia dje teoria di evolucion riba camponan masha diferente for di biologia ta un dje ehempelnan mas espectacular den historia dje manera con un idea masha speculativo pa cua no tin berdadero evidencia científico sólido por yega na forma e manera di pensa di henter un sociedad i dominá e perspectiva di un era.”—Evolution: A Theory in Crisis.

“Cualkier ciencia di pasado . . . cu ta excluí di antemano e posibilidad di diseño of creacion ta stop di ta un búskeda p’e berdad, i ta bira e sirbidó (of esclabo) di un doctrina filosófico problemático, esta, naturalismo.”—Origins Research.

“Ta un mito . . . cu Charles Darwin a solucioná e problema dje orígen di complehidad biológico. Ta un mito cu nos tin un bon idea, of sikiera un basta bon idea, dje orígen di bida, of cu splicacionnan corecto ta referí solamente na supuesto causanan natural. Un cos ta sigur, e mitonan aki, i otronan mas, tocante naturalismo filosófico tin un cierto státus. Bo no ta criticá nan demasiado duru den compania di hende refiná. Pero tampoco lo bo no mester aceptá nan sin mas.”—Origins Research.

“Den privá hopi científico ta admití cu ciencia no tin splicacion pa e comienso di bida. . . . Darwin nunca a imaginá e complehidad exkisitamente profundo cu ta existí asta n’e nivelnan mas básico di bida.”—Darwin’s Black Box.

“Evolucion molecular no ta basá riba autoridad científico. . . . Tin afirmacionnan cu un evolucion asina a tuma lugá, pero absolutamente ningun ta haña e apoyo di experimento of calculacionnan relevante. Ya cu ningun hende conocé evolucion molecular via experencia directo, i ya cu no tin ningun autoridad pa basa e afirmacionnan di conocimentu riba dje, berdaderamente por bisa cu . . . e afirmacion di Darwin su evolucion molecular ta solamente tamtam.”—Darwin’s Black Box.

[Kuadro na página 12]

Evolucion—“Un Wega di Suerte”

E teoria di evolucion sigur ta e soño di un hungadó di placa. Di con? Pasobra segun e evolucionista, e teoria ta gana asta ora e tin chensnan astronómicamente chikitu.

Robert Naeye ta skirbi: “Pa motibu cu evolucion ta primeramente un wega di suerte, cualkier suceso di pasado aparentemente di poco importancia lo por a tuma lugá di un manera un tiki diferente, terminando asina nos liña di evolucion promé cu hende a evolucioná.” Pero no, nos mester kere cu cada purbamentu a cai bon, miyones di biaha. Naeye ta admití: “E gran cantidad di obstáculo ta haci claro cu e aparicion di bida inteligente ta muchu mas difícil cu científiconan a yega di pensa. Probablemente tin mas obstáculo cu científiconan no a ni topa ainda.”

[Diagram na página 8, 9]

Diagram Simplifica di un Cel

Ribosom

Structura den cua ta traha proteina

Citoplasma

Area entre e núcleo i e membran di cel

Retículo endoplasmático

Vel di membran cu ta almacená of transportá e proteinanan trahá dor dje ribosomnan pegá riba dje

Núcleo

E ta e centro di control cu ta dirigí e actividadnan dje cel

Nucleolus

E lugá caminda ta traha ribosom

Cromosom

Ta contené e DNA dje cel, su blueprint genético

Vacuole

Ta almacená awa, salu, proteina i carbohidrato

Lisosom

Ta almacená enzim pa digestion

Aparato di golgi

Un grupo di sacu di membran cu ta empaketá i distribuí proteinanan producí dor dje cel

Membran di cel

E tapa cu ta controlá loke ta drenta i sali for dje cel

Centriol

Importante den reproduccion di cel

Mitocondria

Centro di produccion pa ATP, e molekuulnan cu ta suministrá e cel cu energia

[Plachi na página 7]

Riba nan mes e piesanan no ta forma un trampa pa raton—e mester ta completo pa funcioná como tal