Di Berdad Tambúnan Africano Ta Papia?

Dje coresponsal di Spierta! na Nigeria

DURANTE su biahe a lo largu di Riu Congo na 1876-77, exploradó Henry Stanley no tabatin hopi oportunidad pa pensa riba e méritonan dje tocamentu di tambú local. Pa e i esnan cu tabata biaha cuné, e mensahe dje tambúnan generalmente por a ser resumí den un palabra: guera. E zonido dòf di tambú den leu cu nan tabata tende a nificá cu nan tabata a punto di ser atacá dor di guereronan violento armá cu lansa.

Ta solamente mas despues, den tempu di pas, cu Stanley a haña sa cuantu mas tambúnan por a expresá cu un yamada pa guera. Describiendo un grupo étnico cu tabata biba a lo largu di Congo, Stanley a skirbi: “[Nan] no a adoptá e sistema di señalnan eléctrico ainda, pero tog ta poseé un sistema di comunicacion casi mésun eficas. Nan tambúnan inmenso batí na diferente parti ta transmití un idioma mes cla cu abla pa esnan cu conoc’é.” Stanley a realisá cu e tocadónan di tambú tabata manda hopi mas cu un señal di un trompet of un sirena; tambúnan tabata por a transmití mensahenan specífico.

E mensahenan ei por a ser pasá di pueblito pa pueblito. Tabata tende algun tambú na un distancia di ocho pa diesun kilometer, specialmente si nan a ser batí anochi for di un vlot riba awa of for di top di un ceritu. Tocadónan di tambú na un distancia tabata scucha, comprendé i pasa e mensahenan over pa otronan. E biahero ingles A. B. Lloyd a skirbi na 1899: “Nan a bisá mi cu di un pueblito pa otro, un distancia di mas cu 100 miya [160 kilometer], por a manda un mensahe den ménos cu dos ora, i mi ta ègt kere cu ta posibel cu nan por hacié den muchu ménos tempu.”

Leu den siglo 20, tambúnan a sigui hunga un papel importante den transmití informacion. E buki Musical Instruments of Africa, publicá na 1965, a declará: “Tambúnan cu ta papia ta ser usá como telefon i telegraf. Ta manda tur sorto di mensahe—pa anunciá nacementu, morto i matrimonio; eventonan deportivo, bailenan i ceremonianan di iniciacion; mensahenan gubernamental i guera. Tin biaha e tambúnan ta transmití redu i chiste.”

Pero con e tambúnan tabata comunicá? Na Europa i na otro partinan, tabata manda mensahenan cu impulsonan eléctrico via liñanan di telegraf. Cada letter dje alfabet tabata haña su mes code, di manera cu por a spel palabra i frasenan letter pa letter. Sin embargo, e pueblonan di Africa Central no tabatin idioma skirbí, di manera cu e tambúnan no tabata spel palabra. Tocadónan di tambú di Africa tabata usa un otro sistema.

E Idioma dje Tambú

E clave pa comprendé comunicacion cu tambú ta sinta den comprendé e idiomanan africano mes. Hopi idioma di Africa Central i West ta en esencia bitonal—cada sílaba di cada palabra papiá tin un dje dos tononan fundamental, sea haltu of abou. Un cambio den tono ta cambia e palabra. Tuma, por ehempel, e palabra lisaka, dje idioma kele di Zaire. Ora tur tres sílaba ta ser pronunciá den un tono abou, e palabra ta nificá “plas of moeras”; un pronunciacion abou-abou-haltu dje sílabanan kier men “promesa”; un entonacion abou-haltu-haltu ta nificá “veneno.”

Africa su tambúnan cu gleuf, usá pa transmití mensahenan, tambe tin dos tono, haltu i abou. Di igual manera, ora tambúnan di cueru manda un mensahe, nan ta ser usá den par, cu un tambú cu tin un tono haltu i e otro cu un tono abou. Pues, un tocadó di tambú ábil ta comunicá dor di imitá e patronchi di tono di palabranan cu ta componé e idioma papiá. E buki Talking Drums of Africa (Tambúnan di Africa cu Ta Papia) ta declará: “E asina yamá idioma di tambú aki ta en esencia e mésun cu e idioma papiá dje tribu.”

Naturalmente, un idioma bitonal generalmente ta usa hopi palabra cu tono i sílabanan idéntico. Por ehempel, den e idioma kele, rond di 130 sustantivo tin e mésun patronchi (haltu-haltu) cu sango (tata). Mas cu 200 tin e mésun patronchi (abou-haltu) cu nyango (mama). Pa evitá confusion, tocadónan di tambú ta duna un contexto pa palabranan asina, dor di hinca nan den un frase corticu bon conocí cu ta contené suficiente variacion pa laga e scuchadó comprendé kico ta ser bisá.

Papia cu Tambúnan cu Gleuf

Un tipo di tambú cu ta papia ta e tambú cu gleuf trahá di palu. (Mira potret na página 23.) Ta forma e tambúnan ei dor di coba un hol den un seccion dje troncon. No tin cueru na ningun dje dos extremonan. Maske e tambú riba e potret tin dos gleuf, hopi tin solamente un gleuf largu. Un tocá riba un dje bandanan dje gleuf ta producí un tono haltu; un tocá riba e otro banda ta producí un tono abou. Por lo general tambúnan cu gleuf ta rond di un meter largu, maske cu nan por ta asta mei meter corticu of te cu 2 meter largu. E diameter lo por varia entre 20 centimeter te cu asta un meter.

Tambúnan cu gleuf a ser usá pa mas cu solamente manda mensahe di pueblito pa pueblito. Autor Francis Bebey di Camerun a describí e papel dje tambúnan aki den lucha libre. Miéntras cu dos tim opositor a prepará pa topa riba e plenchi dje pueblito, e campionnan tabata baila riba e ritmo dje tambúnan cu gleuf segun cu e tambúnan tabata canta homenahe na nan. E tambú di un banda lo por bisa: “Campion, bo a yega di topa bo pareu? Ken por ta bo rival, bisa nos ken? E pober criaturanan aki . . . ta kere cu nan por vencé bo cu un of otro pober [alma] cu nan ta yama campion . . . , pero ningun hende por vencé bo nunca.” E músiconan den e campo rival tabata comprendé e cherchenan yen di humor aki i tabata core respondé cu un proverbio riba nan tambú: “E macacu chikitu . . . e macacu chikitu . . . e kier subi e palu, pero tur hende ta kere cu lo e cai. Pero e macacu chikitu ta cabesura, lo e no cai for dje palu, lo e subi bai te na top, e macacu chikitu aki.” E tambúnan tabata sigui toca pa animá i entretené atrabes di henter e pelea.

E Tambúnan cu Ta Papia Mihó cu Tur

Tambúnan di presion ta bai un stap mas aleu. E tambú cu bo ta mira riba e potret banda drechi yama dundun; e ta e famoso tambú yoruba for di Nigeria cu ta papia. E tambú aki tin e forma di un zandloper i na cada un dje extremonan tin cueru di cabritu, fini i curtí, di span. E extremonan ta mará na otro cu stribunan di cueru. Ora trek e stribunan, e tension riba e cueru ta aumentá di manera cu e por producí notanan cu un variacion di un octaf of mas. Dor di usa un pal’i tambú curvá i cambia e tono i e ritmo dje zonidonan, un tocadó di tambú ábil por imitá e tononan haltu i abou di bos humano. Asina tocadónan di tambú por tene “combersacionnan” cu otro tocadónan di tambú cu por interpretá i toca e idioma di tambú.

Na mei 1976 e abilidad notabel di tocadónan di tambú pa comunicá cu tambú a keda demostrá dor dje músiconan di palacio di un hefe yoruba. Boluntarionan for dje auditorio tabata fluister un seri di instruccion n’e maestro tocadó di tambú, kende, na su turno, tabata toca e instruccionnan riba e tambú na un otro músico situá leu for dje patio real. Respondiendo na e instruccionnan cu e tabata tende dje tambú, e músico tabata move di un banda pa otro i tabata cumpli cu cualkier cos cu el a ser pidí pa haci.

No ta fácil pa siña manda mensahe tocá cu tambú. Escritor I. Laoye a comentá: “Tocamentu di tambú yoruba ta un arte complicá i difícil, cu ta rekerí hopi aña di studio. E tocadó di tambú no solamente mester poseé gran abilidad manual i un sentido di ritmo, sino tambe un bon memoria pa poesia i e historia dje pueblito.”

Den e último décadanan aki tambúnan di Africa no ta papia mes tantu cu un tempu nan tabata haci, aunke ainda nan ta hunga un papel importante den música. E buki Musical Instruments of Africa ta bisa: “Ta extremamente difícil pa siña toca mensahenan riba tambú; p’esei, e arte aki ta disparciendo rápidamente for di Africa.” Robert Nicholls, specialista den medionan di comunicacion, ta agregá: “E tambúnan inmenso di pasado, kende nan bosnan a biaha pa miyanan leu i kende nan único funcion tabata pa transmití mensahenan, ta destiná pa bai den extincion.” Awendia mayoria hende ta haña ta mas fácil pa usa pa coge un telefon.

[Plachi na página 23]

Tambú cu gleuf

[Plachi na página 23]

Tambú yoruba cu ta papia