Protehá e Salú di Mucha

UN RAPORT recien, The Progress of Nations, publicá dor di Fondo di Nacionnan Uní pa Mucha (UNICEF), ta mustra cu den hopi pais tin un mehoransa significativo den e condicion di salú di muchanan. Atrabes di esfuersonan conhunto di gobiernunan i organisacionnan internacional, e índice di mortalidad pa muchanan bou di cincu aña a baha den vários pais. No obstante, The Progress of Nations ta mustra tambe cu tur aña por salba miyones di bida hóben mas cu medionan simpel i barata, specialmente den paisnan den desaroyo. Kisas mayornan den e paisnan aki i tambe otro caminda ta haña e siguiente recomendacionnan cu e raport a contené útil.

Duna pechu. E raport ta consehá: “Duna pechu ta e mihó comienso pa un bon salú i nutricion.” Segun e Organisacion Mundial di Salú (OMS), “tur aña por salba mas cu 1 miyon baby si cria nan na pechu so pa mas of ménos e promé seis lunanan.” Ya cu hospitalnan i kraamkliniek tin un influencia poderoso, UNICEF i OMS ta promoviendo un campaña pa ‘premia hospitalnan cu ta animá dunamentu di pechu.’ Nan obhetivo ta pa motivá hospitalnan pa duna mamanan di yunan recien nací e apoyo i conseho apropiado relacioná cu dunamentu di pechu.

Higiena i awa limpi. E raport ta declará: “Por baha e cantidad di víctima di malesa drásticamente dor di usa awa limpi, usa pochi di w.c. i dor di laba man promé cu atendé cu cuminda i prepará i warda cuminda di un manera cu e no ta daña.” Maske den hopi comunidad hende mester haci hopi esfuerso pa obtené suficiente awa limpi, e ta indispensabel pa salú di mucha i famia.

Nutricion. Segun e raport, por prevení te cu tres miyon mucha di muri tur aña dor di duna suplemento di vitamina A. E raport ta bisa cu e solucion pa e problema ta disponibel i por ser financiá. Por realisá esaki dor di mehorá e dieta, enrikesé alimentonan of parti cápsulanan di vitamina A. Den paisnan caminda deficiencia di vitamina A ta comun, a logra bon éxito caba cu parti cada tantu luna cápsulanan di vitamina A, cu ta costa solamente cuater cen, na muchanan chikitu. Tambe ta recomendá alimentonan manera papaya, mango, wortel, berduranan blachi berde i webu.

Terapia di Rehidratacion Oral. UNICEF ta bisa cu lo por salba mitar dje muchanan cu ta muri tur aña pa causa di diarea cu mesclanan barata i fácil pa prepará di awa limpi, salu i sucu of di hariña di aros.a Tambe mayornan mester sigui duna e mucha cuminda. Ya caba ta salbando mas of ménos un miyon bida tur aña cu e medionan aki.

[Nota]

[Plachi Rekonosementu na página 30]

WHO